【寫作常犯錯誤——病句（一）】

句子成分：主謂賓定狀補

同學平時寫文章嘅時候，有冇試過覺得自己寫嘅句子好奇怪，硬係覺得句子少咗啲咩，唔太完整🧐？呢啲可能係病句嚟。分析句子結構，其實都可以避免病句。今日就想同大家講吓中文嘅六個句子成分，分別係主語、謂語、賓語、定語、狀語同補語。

一、主語

主語通常係名詞、名詞短語或者代詞，係句子陳述或者說明嘅對象，指出謂語講緊嘅係邊個或者係乜嘢。睇吓下面兩句例句：

例一：弟弟（主語）去跑步了🏃🏻。

例二：球鞋（主語）換好了。

二、謂語

謂語嘅目的係說明或者陳述主語，即係話畀讀者聽主語係咩、做啲咩或者係點樣嘅。謂語有廣義同狹義之分。廣義嘅謂語係指非主語部分，好似下面例句咁：

例三：運動員進場了（謂語）🤺。

例四：球落網了（謂語）🏐。

狹義嘅謂語就專指謂語入面嘅動詞：

例五：小明打（謂語）乒乓球🏓。

例六：訓練進行（謂語）得十分順利。

為咗方便討論，下文都會用謂語嘅狹義定義嚟分析。

三、賓語

某啲句子嘅謂語係動作或者行為嚟，會涉及另一個對象。呢個涉及嘅對象，就係賓語喇：

例七：小明贏取（謂語）奬牌（賓語）🥇。

呢度嘅賓語係講緊動作涉及嘅對象，小明贏取嘅係啲乜嘢。

例八：他去（謂語）日本東京（賓語）🗻。

呢度嘅賓語唔同上一句，係講緊動作發生嘅地點，他去嘅係乜嘢地方。

相信主語、謂語同賓語對同學嚟講都唔太難理解，因為英文都有差唔多嘅概念。好似例句五咁，其實就好似英文subject+verb+object (SVO) 嘅結構。

例五：小明（主語＝subject）打（謂語 ≈ verb）乒乓球（賓語＝object）。

下面講嘅定語、狀語同補語對同學嚟講可能比較陌生，不過佢哋都有各自嘅標誌用語幫同學辨認。😬

四、定語

定語係指名詞、代詞前面修飾或者限制嘅附加成分。定語嘅標誌用語係「的」字，好似下面例句咁：

例九：他穿上全新的（定語）球鞋（名詞）。

例十：香港的（定語）運動員（名詞）全力以赴，做到最好💪🏻。

值得一提嘅係，中文嚟講，「後飾」其實比「前飾」簡單，尤其係修飾部分字數比較多嘅時候。換句話說，將「xx的」嘅「xx」放喺名詞後面，其實會易啲寫，讀者亦會易啲理解。同學睇吓面兩句句子：

例十一A（前飾）：在奧運會擔任持旗手、出戰混雙羽毛球賽事的（定語）她（代詞），在比賽中殺入四強，刷新港隊成績🤩。

例十一B（後飾）：她（主語）在奧運會擔任持旗手，出戰混雙羽毛球賽事，在比賽中殺入四強，刷新港隊成績。（定語變成謂語）

覺唔覺得B句易睇啲呢？原因好簡單，由於A句定語比較長，我哋要睇到第二句分句先知定語修飾緊嘅對象係「她」，睇嘅時候，我哋嘅焦點會不自覺放咗喺「何人」，而唔係「何事」；相反B句開門見山，一開始就知句子描述嘅對象係「她」，我哋自然會將重點放喺句子嘅重心，即係「佢做咗啲咩」。同學下次寫文章嘅時候，不妨試吓多用「後飾」嘅方法。

五、狀語

狀語指嘅係動詞、形容詞前面修飾嘅附加成分，表示動作發生嘅情況、方式、時間、地點、性質等。狀語嘅標誌用語係「地」字，好似下面例句咁：

例十二：小明認真地（狀語）做（動詞）熱身運動。

不過好多時候，狀語嘅「地」字係可以省略嘅，好似例句十二咁，寫成「小明認真（狀語）做熱身運動。」其實都可以。

有啲時候，狀語更加唔會有個「地」字。所以分析嘅時候，唔可以過分依賴標誌用語，亦係要留意返佢係咪動詞、形容詞前面修飾嘅附加成分：

例十四：我非常（狀語）欣賞（動詞）運動員的拼搏精神😤。

例十五：這場比賽很（狀語）精彩（形容詞）。

六、補語

補語同狀語唔同，係形容詞、動詞後面嘅補充成分，用嚟補充動作嘅結果、數量、時間、地點、程度等。補語嘅標誌用語係「得」字。

例十六：她得奬後，感動（形容詞）得流下眼淚（補語）。

同狀語一樣，有啲時候，補語未必有個「得」字出現，好似下面例句咁：

這個課題需要研究（動詞）清楚（補語）。

七、小結

希望睇完呢篇文章後，同學會對中文句子成分有多啲了解。小編亦整咗個列表，方便大家重溫😉：

嚟緊小編會有另一篇文章，以句子成分為基礎，同大家拆解各種病句。😉