你的購物車是空的
{{ (item.variation.media ? item.variation.media.alt_translations : item.product.cover_media.alt_translations) | translateModel }} {{ (item.variation.media
                    ? item.variation.media.alt_translations
                    : item.product.cover_media.alt_translations) | translateModel
                }}
{{ 'product.bundled_products.label' | translate }}
{{ 'product.bundle_group_products.label' | translate }}
{{ 'product.gift.label' | translate }}
{{ 'product.addon_products.label' | translate }}
{{item.product.title_translations|translateModel}}
{{ field.name_translations | translateModel }}
  • {{ childProduct.title_translations | translateModel }}

    {{ getChildVariationShorthand(childProduct.child_variation) }}

  • {{ getSelectedItemDetail(selectedChildProduct, item).childProductName }} x {{ selectedChildProduct.quantity || 1 }}

    {{ getSelectedItemDetail(selectedChildProduct, item).childVariationName }}

{{item.variation.name}}
{{item.quantity}}x HK$0 {{ item.unit_point }} 點
{{addonItem.product.cover_media.alt_translations | translateModel}}
{{ 'product.addon_products.label' | translate }}
{{addonItem.product.title_translations|translateModel}}
{{addonItem.quantity}}x {{ mainConfig.merchantData.base_currency.alternate_symbol + "0" }}

【中英比較】時態

2022-01-03
中文冇時態?   唔知大家有冇印象小學嗰時,啱啱學simple past tense,一定會遇到一大堆不規則動詞(irregular verbs),好似go咁,唔知點解past form會變咗went😱 相反中文就簡單得多,無論過去現在將來,都係用同一個動詞😙 冇錯,中英文其實係兩種好唔同嘅語言。呢篇文章,NoteSity小編想同大家講吓中英文有啲咩異同~   一、相異之處🐱🐶英文同中文好唔同嘅一樣嘢,係英文有時態,中文冇。英文會用動詞嘅屈折變化(inflection),表達唔同嘅時態。好似go呢個動詞,past form係went,past participle係gone,gerund就係going。中文嘅動詞就冇屈折變化,要靠詞彙手段(lexical means),例如係助詞、副詞、方位詞,表達句子嘅時間~🧭   而且,英文就算冇助詞,都可以表達到事件發生嘅時間,靠嘅就係時態,好似例一咁~ 例一(英):He is reading a book📘. 呢度英文用咗present continuous tense,所以我哋知道係而家睇緊本書。中文呢?就需要加返個副詞先可以表達到: 例一(中):他在看書。 就咁講「他看書」,我哋未必會知佢係咪而家睇緊書,不過加咗「在」呢個副詞,就好清楚表達到動作發生嘅時間,少咗歧義。   唔單止咁喎,英文都好常會喺一句句子入面用多過一種時態。原因好簡單,句子入面嘅兩個動作發生時間唔一樣。有啲抽象?😖 睇吓例二啦: 例二(英):He had studied Japanese before he went to university. 呢句句子嘅兩個動作其實都發生咗,但係「讀日文💮」比「上大學🏫」更加早發生,所以「讀日文」用past perfect tense,「上大學」用simple past tense。呢個係語法嘅規定,冇得自己作㗎🙅🏻‍♀️🙅🏻‍♂️ 例二(中):他上大學前,就學過日文。 中文嘅話,要表達兩個動作嘅先後次序,就要加方位詞「前」;要表達件事已經發生咗,就要加助詞「過」。   二、相同之處🐱🦁 講咗中英文時態嘅唔同,咁兩者有冇咩共通點?其實有㗎,就係中英文都會用助詞表達時態。有啲咩常見例子?小編整理咗個列表,方便大家參考💁🏻‍♂️:   英文 中文 表達過去 🔙     yesterday 昨日/昨天 (number+hours / days / weeks / months / years) ago Example: three days ago 之前/以前/前     例子:三天前 in (past year) Example: in 2020 (年份)年 例子:2020年 表達現在 ⌚️     now 現在/此時/此時此刻/這一刻 right now at this moment 表達將來 🔜   tomorrow 明日/明天 next (week / month / year) 下星期、下個月、下一年/明年   三、小結💛 睇完呢篇文章,希望大家了解多咗中英文時態嘅異同。最後,小編整理咗下面嘅列表,講吓中文會用啲咩詞彙手段,表達英文唔同時態: 時態 英文 中文 Present continuous I am working. 我在工作。 /我正在工作。 Present perfect I have worked for three hours. 我已經工作了三小時。 /我工作了三小時。 Simple past I worked for a bookshop. 我曾經在書店工作。 /我在書店工作過。 Past continuous I was working when you called me. 你打電話給我時,我在工作。 Past perfect I arrived at the office and found that he had worked the plan out. 我到辦公室,發現他已經定好方案。 Simple future I will work on your application. 我會處理閣下的申請。 /我將處理閣下的申請。*   * 嚴格嚟講,有人會話呢種講法比較歐化,不過而家好多人都會咁樣表遠,同學寫文章嘅時候,都唔需要太擔心咁寫會畀老師話😉 同學如果想知多啲英文唔同時態嘅分別,可以睇吓呢篇文章。英文用時態,可以表達到好多唔同嘅時間同意思,中文就要用詞彙手段先做到。學好英文時態,同時識多啲中文表達時間嘅詞語,咁嘅話,無論寫中文定英文,都可以得心應手啦😤   四、實戰題💪🏻 睇完上面嘅分析同例子,想知自己明咗幾多?做吓下面嘅實戰題,用另一種語言表達句子嘅意思,挑戰吓自己啦! 1. (試吓用中文表達)He has finished a book📙. 2. (試吓用英文表達)這齣電影昨天上映了,你看過了嗎🎬?3. (試吓用中文表達)The employer hoped that the pay rise would not affect the budgetary health of the company💰.   參考答案😬 1. 他看完一本書。 英文用present perfect tense,表達「睇完/書」呢個狀態持續到而家;中文用個「完」字,就可以表達到相似嘅意思。 2. This film was released yesterday, have you seen it yet? 中文用名詞「昨天」表達過去嘅動作,英文可以用yesterday同simple past tense表達。「你看過了嗎?」呢句,問緊人哋有冇做過某樣嘢,英文慣常用present perfect tense表達。 值得一提嘅係,英文通常用三分法嚟組織句子,所以“Have you seen the film released yesterday?”其實讀落更加地道自然。呢一點,小編之後會再撰文同大家講㗎😊 3. 僱主期望,增加薪金不會影響公司財務狀況。 英文雖然一開始用simple past tense,但中文表達嗰時,唔一定要加時間副詞「過去」,讀者可以透過上下文(例如前面有講到年份係幾時),知道時間係咩。

【2019 DSE 中文卷二題目分析】 這一句話,我會記上一輩子。

2021-12-02
2019 DSE 中文卷二第一題: 試以:「這一句話,我會記上一輩子。」為首句,續寫這篇文章。 這條題目發揮空間相當大,同學若能緊扣「這一句話」展開內容,焦點明確,事件豐富細膩,便能取得不錯的分數。考評局教師會議簡報中亦提及,表現較差的考生,問題在於未能緊扣「這一句話」寫作,文章過於蕪雜,枝節太多,導致文章失焦,事件敍述過於簡略粗疏😫 這篇文章要寫得好,實際應該怎麼做?有什麼需要注意的地方?NoteSity 小編會在下文逐一分析解答~😉 一、關鍵概念🌟🌟 1. 這一句話 本題要求考生以一句令人刻骨銘心的話為線索,抒述對人生的體會。題目重點有二,「這一句話」和「記上一輩子」。   先說「這一句話」,即一句說話,單句或複句也可。若同學寫作能力不俗,可嘗試以「複句」入題,文章前半處理前句,後半則處理後句,文章讀來會更有層次。「這一句話」宜簡潔有力、發人深省,或觸動人心。由於寫作時間有限,若「這一句話」太長,同學很可能無法在限時內解釋清楚「這一句話」為何對自己影響深遠,結果「畫虎🐯不成反類犬🐶」。   「這一句話」既可取自日常生活,亦可取自名言雋語。日常生活的「這一句話」,可以是父母的叮囑👨🏻🧑🏻、老師的訓勉🧑🏻‍🏫、朋友的鼓勵👯,又或是自己的座右銘🤩。取材自生活,敍述的事件較易抒發己見,感情也較易寫得真摯;選用名言雋語,則可引用較特別的「這一句話」。立意新穎,自然鶴立雞群,閱卷員也會眼前一亮。舉個例子,同學可引用電影《見習冇限耆》(The Intern)主角所說的一句話「經驗永不過時」,寫自己小時候缺乏經驗,學習常常碰壁,長大後累積經驗,工作得心應手,畢生受用。   圖片來源:《見習冇限耆》:太貪心以致浪費了好題材   看畢上文說明,還是覺得有些空泛?😖 小編整理了下表,單句複句各舉幾例,同學不妨參考,說不定能從中找到靈感🤩 單句(簡單來說,就是句子只有一句分句,一個句號) 複句(即句子有兩句或以上分句) 天才是一分的靈感加上九十九分的汗水。(愛迪生) 見賢思齊焉,見不賢而內自省也。(《論語》) 默認自己無能無疑給失敗製造機會。(拿破崙) 天生我材必有用,千金散盡還復來。(李白) 欲速則不達。(《論語》) 只有放下,才能重新開始。   2. 記上一輩子 再說「記上一輩子」。「一輩子」指的是很長的時間⏳一句話能讓自己記上一輩子,可能觸及自己處境,啟發思考,又或說話者和自己關係密切,那一句話令自己相當感觸,甚或改變了自己的行事為人,影響深遠。上品和下品文章的分野,在於同學能否清楚說明「這一句話」如何「記上一輩子」。寫得好,便能昇華文章主題;寫得遜色,只能取得中下品分數😔   二、寫作技巧🖊🖊 1. 開門見山⛰ 有同學構思文章時,希望別樹一幟,在文章開首不提「這一句話」是什麼,製造懸念,留待文章中後段才說「這一句話」是什麼。但一般閱卷員沒有太多時間閱讀同學的文章,讀完首段仍不知同學的「這一句話」是什麼,恐怕會留下壞印象。在文章開首,便應開門見山,先說「這一句話」,再敍事抒情,閱卷員也較易掌握文章脈絡。   2.「這一句話」不怕重複🤫 「這一句話」是文章的中心,不怕重複。同學寫人生不同階段的經歷,可重提「這一句話」,說明自己在某階段對這一句話的解讀,豐富文章層次。有考生寫「這一句話」是「允行,媽媽等你」,在人生不同階段,包括小孩學步、叛逆不順和工作面試,重提「這一句話」,抒發自己對母親的情感。重複「這一句話」,以此串連人生的幾個片段,較易說服閱卷員「這一句話」自己會記上一輩子。   3. 善用比喻🅰️➡️🅱️ 同學可善用比喻,把「這一句話」和其他事物作比喻,文章讀來更生動有趣之餘,亦有助同學抒發情感。舉個例子,若同學寫「樹欲靜🌲而風不息🌬」,可以這樣發揮:「樹欲靜而風不息」,這句話彷如一把鑰匙,打開我早已發鏽的心門。祖父雖已離開人世,但身邊還有許多人關心我。這次,我不會再錯過。同學緊記,善用修辭,有助在「表達」方面爭取多些分數。   三、考生常見問題🙅🏻‍♀️🙅🏻‍♂️ 上兩部分,小編分析了本題的關鍵概念和寫作技巧。接下來,則會討論考生常犯的錯誤,並以同學的文章為例,談談如何改寫文章。 1. 審題不周🔎 「記上一輩子」應是影響深遠、刻骨銘心的,但有同學理解成「很有意義的一句話」。「記上一輩子的話」固然有意義,但同時也會一生銘記於心。有同學寫作時,敍事未有鋪陳,只在文末才說「這句話,我會記上一輩子」,難以說服閱卷員,內容分數自然會被扣減。   2. 取材不當🖍 要說明一句話自己會記上一輩子,最好的方法是以那句話串連人生不同階段,例如牙牙學語👶🏻、初上學校🏫、首踏職場🏢,抒發自己對「這一句話」的不同解讀。反之,部分同學只敍述一件事,感受未見有深刻描寫,難以說明「這一句話」如何影響自己,記上一輩子。   3. 扣題不緊🔗 要突出「這一句話」影響深遠,同學可在記事後抒發感受。若想內容分數更高,應在敍事時把個人情感滲入其中,逐步渲染。可惜不少考生記述事件的始末後,只寫自己的感悟,未有回應「記上一輩子」一點😱   要避免上述問題,便要取材恰當,立意明確,下文小編列舉幾例,希望幫到同學~🙈 這一句話 取材 立意 欲速則不達。 記述小時候做事性急,常常闖禍;長大後學懂忍耐,工作慢慢得心應手。 忍耐是一種美德,學懂耐着性子才能達成目標。 天生我材必有用,千金散盡還復來。 寫自己本來自卑,卻因一場比賽的勝利,開始欣賞接納自己。 人無完美,但絕非一無是處。學懂欣賞自己,是一生的功課。   四、改寫示例📝📝 註:以下示例,均取自或改寫自考評局卷二示例或卷二額外示例。 示例一 這一句話:全力以赴不一定成功,但至少對得住自己的良心。 文章首段:人生充滿着挫敗,事情的發展未必盡如己意。即使拼盡全力向前進發,付出了百二分的努力,可能也會一無所獲,一切的預想通通沒有了。漸漸地,我們害怕全力以赴,但真正害怕的,是付出得不到相應的回報,於是給了自己懈怠的藉口。然而,一心的一句說話給我上了重要的一課。 ☹️ 閱卷員未必有太多時間閱讀一篇文章,同學寫作時應開宗明義,首段便點明題旨。否則,閱卷員讀畢首段仍不知「這一句話」是什麼,對同學印象自然不好,打分也可能較手緊。 ☹️ 文字較平白,稍欠修辭技巧。 改寫:人生充滿挫敗,事情的發展未必盡如己意。即使拼盡全力向前進發,付出了百二分努力,可能也會一無所獲,一切的預想通通化為灰燼。我們漸漸害怕全力以赴,害怕付出得不到相應的回報,於是給了自己一件保護衣、一個保留餘力的理由、一個懈怠的藉口。「全力以赴不一定成功,但至少對得住自己的良心。」然而,一心這句話給我上了寶貴的一課。 😊️ 文首便清楚交代「這一句話」是什麼,免得閱卷員不明所以,需要自行猜想。 😊 適當運用比喻,刻劃的事物形象更鮮明,文章讀來更生動有趣。 😊️ 使用排比,加強文章氣勢,文章讀來有一氣呵成之感。   示例二 這一句話:做人要時常懷有感恩之心,路才行得遠。 文章尾部選段:回家後,爸爸看到我失落的表情便向我問個究竟,和他交代了事情經過後,他便對我說:「孩子,一個人的成功並不是自己一個人促成,而是很多人背後的付出而成就的,所以感恩之心是非常重要的啊!」聽到爸爸的一番話,我終於明白感恩並不是一樣不中用的東西,而是對他人的一份尊重,一份感激。 ☹️︎ 寫到文章尾部,仍未回應「記上一輩子」的題目要求。 ☹️︎ 文句偶有沙石:一個人的成功並不是自己一個人促成(促成後必須加上「的」字);爸爸看到我失落的表情便向我問個究竟,和他交代了事情經過後,他便對我說(主謂語關係頗混亂)。 改寫:回家後,爸爸看到我失落的表情,便向我問個究竟,得知事情經過後,他說:「孩子,成功並非自己促成,而是需要很多人背後付出的,所以要常存感恩之心啊!」聽到爸爸一番話,我終於明白感恩並不是不中用的東西,而是對他人的一份尊重,一份感激。無論在人生哪個階段,總會遇上不同困難。別人願意出手相助,絕非必然。爸爸這句話,我會銘記於心,常存感恩之心。 😊️ 回應題目,說明為何「這一句話」刻骨銘心,讓「我」記上一輩子。 😊️ 文字通順自然,主謂語關係清晰。   示例三 這一句話:不用害怕,我會在背後默默支持你! 文章選段:長大後的我不知不覺因為父親那一套「一換一」的小條件家裏擁有很多的「小玩意」,原來,我學懂了很多知識和技能在我的腦海中,都是父親指導和教導的。假若不是父親這種「奇怪想法」,我想我又需要浪費時間學呢!父親說過:「有一些東西,學過腦海會有一個印象,求生技能又好,學多一樣技能也罷,反正父親一定不會害你的!」 ☹️︎ 本段與「這一句話」關係不清楚。這段只敍述父親鼓勵「我」多學不同技能,未有突顯「我」的恐懼。 ☹️︎ 句子語義稍欠清晰:都是父親指導和教導的(「指導」和「教導」意思相近,擇一便可);有一些東西,學過腦海會有一個印象,求生技能又好,學多一樣技能也罷(「求生技能又好」和「學多一樣技能也罷」關係不明確,同學應該想說,有些東西,學過以後腦海會有印象,當是求生技能也好,當是多一技旁身也好)。 改寫:因為父親那套「一換一」的概念,家裏不知不覺多了許多「小玩意」。原來,很多我學懂的技能,都是父親教導的。那時候,我很怕習泳,總覺得自己在水裏會遇溺,或是不小心喝了池水會肚子痛,別扭得很。父親說:「游泳跟許多技能一樣,學會以後腦海會有印象,不會白學的。學會游泳,既學會多門求生技能,又多一技旁身,不是很好的嗎?不用害怕,我會在背後默默支持你!」若不是父親鼓勵我,我到現在可能仍是隻旱鴨子! 😊 敍事強調自己害怕習泳,又寫父親如何鼓勵「我」,從而扣緊「這一句話」。 😊️ 文字簡潔,避免不必要重複。   五、小結😬 同學看完這篇文章,會否更深入了解本題要求、考評局的要求和準則呢?🙈 雖然寫作題目每年也不同,似乎無跡可循,但只要做到扣緊題旨,描寫細膩,感情深刻真摯,要取得上品分數絕非難事😤 同學若想參考本題的完整範文,亦可訂購《DSE 中文寫作範文集》,範文集除收錄寫作範例,以亦附文章分析,有助同學提升寫作技巧👊🏻

【寫作常犯錯誤——病句(四)】

2021-12-02
配搭不當 上兩篇文章,NoteSity 小編同大家分析咗句子成分殘缺同成分多餘嘅病句。除咗呢兩種病句,大家寫文章嗰陣,有冇試過寫出嚟嘅句子怪怪地,但又講唔出怪喺邊?🤯 呢啲情況,可能就係配搭不當。呢篇文章,小編會講吓點樣改正或者避免呢種病句~😉   一、動賓配搭不當 受到英文影響,我哋可能會覺得一個動詞可以配搭幾個賓語。但中文有時每個賓語都要配搭唔同嘅動詞,就好似例一咁: 例一:舞台上,樂手盡情拉著小提琴🎻和鋼琴🎹。 「拉著」配「小提琴」當然冇問題啦!不過「拉著鋼琴」呢個配搭就明顯有啲奇怪喇。「鋼琴」一般都係配「彈奏」呢個動詞,所以句子可以改做:舞台上,樂手盡情拉著小提琴和彈奏鋼琴。 如果同學都係想淨係用一個動詞,就要諗吓有咩動詞可以配晒兩個賓語。呢句嚟講,可以用「演奏」呢個動詞:舞台上,樂手盡情演奏小提琴和鋼琴🎼。   二、修飾語與中心語配搭不當 中文入面,好多修飾語都只係用嚟修飾特定嘅中心語。配搭不當,雖然讀者理解到意思,但讀落難免會有突兀嘅感覺😫 睇吓下面嘅例子,同學應該就會明白呢種突兀嘅感覺。 例二:幸好老師延遲課業的遞交限期,我們才能更充裕地完成家課📝。 「充裕」一般只係修飾名詞,當做狀語咁用,其實就唔太恰當。如果同學上網搵,應該會見到網上的確有人會用「充裕地」,但係網上有人用,都唔代表呢個用法啱,更加唔代表佢係好嘅中文😤 呢個句子,用「充裕」修飾名詞嘅表達方法會比較好:幸好老師延遲課業的遞交限期,我們才有更充裕的時間完成家課。 圖片來源:Google 引擎搜索 (註:呢啲都係反面教材嚟,同學千祈唔好學呀!🙅🏻‍♂️🙅🏻‍♀️)   例三:猶記得那年考文憑試,我懷著一顆忐忑不安的心情進入試場應考😖。 「一顆」呢個量詞好少會用嚟配搭「心情」。一係就講「一顆……心」,一係就講「一種……心情」。所以句子可以改做:猶記得那年考文憑試,我懷著一顆忐忑不安的心進入試場應考。 同埋小編之前都講過,中文唔需要下下都用量詞。如果同學驚自己用錯量詞嘅話,其實好多時唔用量詞都完全冇問題!尤其呢句唔係講緊心情嘅數量,而係描述緊當刻嘅心情,刪去量詞,改做「懷著忐忑不安的心情」或者「懷著忐忑不安的心」都冇問題!😤   三、位置不當 中文好重視語序,即係句子入面唔同成分嘅位置同次序。如果句子成分嘅位置或者語序唔啱,就係病句。就咁睇定義唔明?睇吓下面嘅例子啦~💁‍♂️ 例四:這首歌是今年這位歌手發表的作品🎤。 「今年」呢個狀語應該係修飾「發表」呢個動作,所以移到「這位歌手」後面比較自然。「今年」亦都可以放喺句子最前面,不過呢兩個改法嘅側重點都會有少少唔同🤏🏻 點樣改就要視乎同學想表達啲咩喇: 「今年」放喺「這位歌手」後面:這首歌是這位歌手今年發表的作品。(重點:呢首歌係咩嚟?🤔) 「今年」放喺句子最前面:今年,這位歌手發表了這首歌。(重點:今年呢位歌手做咗啲咩?🤔)   例五:這具小長毛象屍體是一萬年前新出土的天然標本。 「天然標本」前面有兩層定語,分別係「一萬年前」同「新出土」。「一萬年前」應該修飾緊「天然標本」,但而家句子咁寫法,可能會令讀者理解做「文物係喺一萬年前出土嘅」。所以句子應該改做:這具小長毛象屍體是新出土的一萬年前的天然標本。 不過,同學可能留意到,呢句入面用咗兩個「的」字,其實唔太自然,想句子自然啲,可以再改動一下句子結構,變做:這具小長毛象屍體新出土,是一萬年前的天然標本。   四、實戰題💪🏻 睇完上面嘅分析同例子,唔知同學有冇明多咗配搭不當嘅病句呢?做吓做埋下面嘅實戰題,就知自己明咗幾多㗎喇! 1. 全球物種數量不斷下滑,保育工作勢在必行🙌🏻。 改寫:全球物種不斷減少,保育工作勢在必行。 (「下滑」形容業績同成績較多,改做「減少」比較自然;「數量」係多餘嘅,刪去都唔影響句子意思) 2. 他性格隨便友善,開學初便交了不少新朋友🤜🏻🤛🏻。 改寫:他性格隨和友善,開學初便交了不少新朋友。 (「隨便」意思負面,呢度講緊「他」嘅優點,應該用「隨和」比較正面) 3. 好朋友應該互相分擔快樂🤗和憂愁😔。 改寫:好朋友應該互相分享快樂,分擔憂愁。 (「分擔」通常講緊一啲負面嘅事物或者責任,好似係「兄妹主動分擔家務,爸媽十分安慰。」所以「快樂」應該配「分享」,「憂愁」先可以配「分擔」) 4. 你看過八十周年的多啦A夢的3D電影嗎🍿? 改寫:你看過多啦A夢八十周年的3D電影嗎? (「八十周年」呢個定語係修飾緊「3D電影」呢個中心語,所以要緊接中心語「3D電影」前面) 5. 這個深深有趣的想法印在我腦海裏🧠。 改寫:這個有趣的想法深深印在我腦海裏。 (「深深」係狀語,應該修飾「印」呢個動詞) 6. 這個農村糧食的生產,長期不能自給。 改寫:這個農村生產的糧食,長期不能自給🍠。 (原句調轉咗「定語」同「中心語」嘅位置,「長期不能自給」嘅應該係「糧食」,唔係「生產」)

【寫作常犯錯誤——病句(三)】

2021-12-02
句子成分多餘 上一篇文章,NoteSity 小編講解咗句子成分殘缺嘅問題。不過,中文「可愛🤫」嘅地方,在於句子有時漏咗嘢係錯,多咗嘢都係錯😫 呢篇文章,小編會講吓句子成分多餘嘅病句有邊幾種,同埋要點樣修改~😉   一、語義重複😔 有時候,句子裏面嘅兩個詞語意思相同,如果兩個詞語都寫晒出嚟,句子會變得好冗長😔 呢啲時候,其實二擇其一就得。睇吓下面例子,應該會易啲理解~💁‍♂️   1. 定語多餘 例一:我會拒絕一切任何誘惑,考試前專心溫習👊🏻。 呢句入面,「一切」同「任何」嘅意思一樣,揀一個寫就可以。如果真係想強調「我」嘅決心,可以喺「拒絕」前面加上狀語,好似咁:我絕對會拒絕任何誘惑,考試前專心溫習。既可以強調語氣,又可以避免用字太重複🤩   2. 狀語多餘 例二:我的好友成功當選學生會主席,我真替他高興👏🏻。 好多中文詞語都有多過一層意思,唔需要額外加狀語補充。好似例二咁,「當選」係指競選入面得到足夠票數中選,所以必然帶有成功嘅意味;「失敗」嘅話,就叫「落選」。所以呢句嘅「成功」其實可以唔寫都得。   3. 補語多餘 例三:大學生寫論文,有時不得不略為刪減一些字數,才能滿足課業要求📝。 同例二差唔多,呢句嘅「略為」已經帶有「稍為、一些」嘅意思,如果再講「一些」,意思就會重複咗。小編嘅建議係,一係講「不得不略為刪減字數」,一係講「不得不刪減一些字數」,咁樣句子就會簡潔啲。   二、語法層面 上面提到句子成分多餘可能帶嚟意思重複嘅問題,令句子變得累贅。不過,喺語法角度嚟講,有啲句子成分都係多餘嘅,有啲係完全唔加得添!點解會咁?🤔 我哋又睇吓下面嘅例子啦!   1. 主語多餘 例四:我們考試前努力溫習,我們亦虛心求問,考試結果仍不理想😩。 小編之前講過,如果兩句分句主語唔同,兩句都要寫清楚主語;但如果成句句子主語一樣,只係需要第一分句講清楚就得。換句話講,第二分句「我們亦虛心求問」嘅「我們」,其實係可以刪去嘅。   2. 謂語多餘 例五:我聽到這麼優美的琴聲,感到十分感動😭。 中文句構多變,有時句子唔用動詞都冇問題。好似例五咁,感動係情感嘅一種,即使唔講「感到」,我哋都知道作者抒發緊自己嘅感受。所以刪去「感到」呢個動詞,都唔會令句子變得唔清楚。   3. 賓語多餘 例六:兩地通航飛機後,貿易往來愈趨頻繁🛩。 中文有分「及物動詞」同「不及物動詞」。「及物動詞」,即係動詞後面要加賓語,好似「保持(動詞)安靜(賓語)」咁;「不及物動詞」就調返轉,動詞後面唔可以加賓語,例如係甦醒👁、生氣😡、死亡💀、完結🔚、用餐🍱。例六嘅「通航」都係不及物動詞,後面唔可以加賓語。所以呢句應該將「飛機」放喺動詞前面,變返做主語,好似咁:兩地飛機通航後,貿易往來愈趨頻繁。同學如果想知多啲中文動詞嘅用法,可以睇吓〈動詞的使用〉呢篇文章。   三、語言空洞😶 某啲分句雖然同句子其他成分意思上冇重複,但句子本身冇裝載任何信息,即使刪去都唔影響文章脈落。等我哋睇吓例七,具體啲講吓呢個問題啦! 例七:從食物鏈角度來看,可以清楚知道,植物吸收陽光,進行光合作用,產生成養份供自己汲收🌳。 呢句嘅「可以清楚知道」唔可以提供更加多新信息,刪咗對文句表達亦都冇任何影響。有時候,同學為咗滿足字數要求,可能會喺文章裏面加插呢啲冇意義嘅句子,但係咁樣做會令句子變得冗長累贅😵 要達到字數要求,惟有多啲練習,或者睇吓呢篇文章,提升構思同寫作嘅速度喇💪🏻   四、小結😬 呢篇文章,分析咗唔少句子成分多餘嘅問題。不過同學要記住,成分多餘唔同成分殘缺,冇絕對嘅啱或錯,只有好同壞嘅分別。如果大家希望自己寫嘅中文更加簡潔,寫作嘅時候,就要記得唔好犯呢啲病句嘅毛病喇(下面仲有實戰題,同學唔好走住呀🏃🏻‍♀️💨)。   五、實戰題😤 (以下題目句子都係改寫自大學教材~) 下面劃線粗體嘅部分,到底需要保留,定係可以刪除呢?🤔 1. 象形字經過長時間簡化,只保留物體的輪廓或特徵,而非整件實物的形狀,以簡單的筆畫去表現〔A〕物體最顯著的特徵。但是,到了隷書和楷書,這種〔B〕以概括手法勾勒出事物性狀的文字都變成了用點、畫、撇、捺組成的「非象形字」。 〔A〕:保留。呢度嘅「表現」係及物動詞,後面一定要加賓語,所以劃線部分需要保留。 〔B〕:刪除。劃線部分同前面嘅「只保留物體的輪廓或特徵,而非整件實物的形狀」語義重複咗,可以刪除。 2. 香港人工作效率高,工業產品能夠因應市場需要迅速更新,〔A〕與時並進,終能躋身國際市場🏭。 〔A〕:刪除。第二分句已經講過「因應市場需要迅速更新」,其實就係「與時並進」嘅意思。「換湯🍲唔換藥💊」,只會令句子變得冗長,唔係好事嚟㗎~🙅🏻‍♂️ 3. 去年夏季,安徽省和江蘇省〔A〕兩省大部分地區遭受嚴重洪澇災害🌊。 〔A〕:保留。「兩省」望落好似多餘,但刪除嘅話,句子會有歧義,「安徽和江蘇省的大部分地區」可以理解做:(1)「整個安徽省」同埋「江蘇省的大部分地區」;或者(2)「安徽省的大部分地區」同「江蘇省的大部分地區」,所以劃線部分需要保留。

【寫作常犯錯誤——病句(二)】

2021-12-02
句子成分殘缺 上一篇文章,NoteSity 小編分析咗句子嘅六個成分。呢篇文章,小編會以句子成分為基礎,同大家分析句子成分殘缺嘅病句~💁🏻‍♂️   同學可能會奇怪,中文嘅語法明明冇其他語言咁嚴謹,點解都會有病句出現?😖 其中一個原因,係句子缺少咗某啲成分,令句子有歧義,或者語義不清,所以呢啲病句係有必要改正㗎!😤   一、主語殘缺 主語殘缺其中一個情況,係兩句分句嘅主語唔同,但我哋只係用咗一個主語,令句子產生歧義,就好似下面嘅例一咁: 例一:我很喜歡這家咖啡店的甜品,能使人心情愉快🍦。 呢度成句淨係用咗「我」呢個主語,照常理推斷話,第二分句嘅意思會係「我能使人心情愉快」。不過,細心同學應該察覺到,第二分句嘅主語應該係「這家咖啡店的甜品」,如果唔加呢個主語,句子嘅意思就會唔太清楚😢 當然啦,一句句子淨係用一個主語就會更加清楚易明。所以例一其實都可以改做:「我很喜歡這家咖啡店的甜品,(我)吃完總能提起精神。」🤩   主語殘缺另一個情況係,句子用咗介詞,但係冇加到主語,句子都係唔完整嘅。又睇吓例二吖。 例二:在他的座位上放了旅行的照片🌅。 呢度用咗個「在」字,句子意思就會變咗「某個人」喺佢個位度放咗張相。但係呢句應該係想表達「佢」喺自己個位放咗張相,所以句子可以改做:「他在座位上放了旅行的照片。」將個主語「他」放返喺介詞「在」前面就冇問題喇!🤩 又或者同學唔想用介詞嘅話,就咁寫做「他座位放了旅行的照片。」都可以,但係要留意呢句嘅重點有啲唔同,呢個寫法係陳述緊個位放咗張相嘅事實,而唔係強調「放相」呢個動作。   睇完兩句例句,小編都有兩條問題畀同學試吓。大家又知唔知點改呢?(文章最底會有參考答案㗎!✨) 實戰題一💪🏻:對這班同學來說,關係很親密👫。 實戰題二💪🏻:由於她的努力,最後贏了比賽🏆。   不過呢,中文好得意,句子有時唔需要主語。我哋叫呢啲做「無主句」。同一段落或者文章,如果主語一樣,後文嘅主語係可以唔重複嘅,就好似例三咁: 例三:昨天,姊姊深夜仍未歸家。也沒有留言給我,大概是去朋友家玩吧。 因為成段嘅主語都係「姊姊」,所以第二句唔再重複主語都清楚,句子亦會簡潔啲。   再講吖,如果全個段落都係講緊同一個對象,甚至唔用主語都得。點做到?睇吓文學大師龍應台示範啦!💛 「那麼認真地看,專注而嚴肅,而且看了起碼半個小時,好像圖書館員在檢查目錄,好像大學教授在挑選讀物。」—— 取自Facebook專頁。 唔知大家估唔估到呢段嘅主語係咩嚟呢?🙈   二、謂語殘缺 除咗漏寫主語,同學有時都會犯謂語殘缺嘅毛病,喺句子入面漏咗個動詞。動詞都會漏?唔係掛?😰 係呀,睇埋下面嘅例子,同學就會明㗎喇~ 例四:對於這些不禮貌的行為,我不能不疑問,這是學生該有的模樣嗎🤯? 「疑問」本身係名詞,但呢句當咗動詞咁用,所以句子爭咗個「動詞」。最簡單嘅改法,當然係加返個動詞畀佢,例如係寫「提出疑問」。不過,更加好嘅做法當然係搵返個動詞代替啦!例如「質疑」同「懷疑」就係呢句可以用嘅動詞喇~   另一種嘅謂語殘缺,係句子漏咗賓語。點會咁嘅?好多時候,我哋以為句子已經完咗,但其實語法上係唔完整嘅。喺呢種情況,我哋就好容易漏寫賓語喇。大家又睇睇例五吖: 例五:老師若能設身處地為學生著想,便能明白學生🧑🏻‍🏫。 同學睇嘅時候,覺唔覺第二分句好似欲言又止,唔知佢想講「明白學生嘅乜嘢」?原因正正係漏咗個賓語。呢度嘅改法都有好幾種,既可以加返個名詞喺後面,變做「明白學生的難處」,又或者用其他動詞,變做「體諒學生」都得。中文每個動詞都唔同,有啲習慣加賓語,有啲就習慣唔使加。咁幾時要加​​賓語,幾時唔使加?呢一點只能意會,不能言傳,就要靠同學平時多啲睇文章,慢慢摸索喇!😌   睇到呢度,又係時候挑戰吓自己,做吓實戰題,睇吓你明唔明小編所講喇~😆 實戰題三💪🏻:我們興高采烈地佈置🎊。 實戰題四💪🏻:在未發展的國家,人民吃不飽、穿不暖的生活😢。(呢題都有至少兩種改法👻)   有時落筆寫作,未必留意到句子成分有殘缺,所以寫作嘅時候,不妨留返啲時間畀自己校對,搵吓文章有冇邊啲句子寫漏咗個主語、動詞,或者賓語。咁樣做,話唔定可以畀到好印象個閱卷員,喺表達方面攞多啲分數㗎!😍   實戰題參考答案💁🏻‍♂️ 一、這班同學關係很親密。 (句子本身咁寫會冇咗個主語,其實只要刪去「對……來說」,將「這班同學」變返句子主語就可以喇😉) 二、(由於)她很努力,(最後)贏了比賽。 (將「的」字改做副詞「很」,主語就會係「她」,而唔係「她的努力」,咁就可以銜接到第二分句。另外,由於中文嘅邏輯關係好多時已經內化咗,唔寫出嚟都得㗎😬) 三、我們興高采烈地佈置新居。 (「佈置」好少獨立存在,加返賓語「新居」,句子就會清楚完整啲🤩) 四、在未發展的國家,人民吃不飽、穿不暖。/ 在未發展的國家,人民過著吃不飽、穿不暖的生活。 (「吃」、「穿」本身已經係動詞,刪去「的生活」,句子就已經夠完整同清楚;如果想保留返「的生活」,咁就要加返個動詞「過」同埋助詞「著」喇😤)  

【寫作常犯錯誤——邏輯謬誤(二)】

2021-12-02
滑坡謬誤、循環論證、借助權威 上一篇文章,NoteSity 小編同大家分析咗「以偏概全」同「混淆因果」呢兩種常見嘅邏輯謬誤。你以為邏輯謬誤只得呢兩種?點止咁少!🤭 小編今日就同大家分享多三種常犯嘅邏輯謬誤啦~⛔️   一、滑坡謬誤 滑坡謬誤,簡單嚟講,就係一連串嘅因果推論入面,每一環論證都誇大咗,令到結論變得唔合理。下面嘅示例想論證年輕人唔應該食水煙,不如大家試吓搵吓呢段論證有咩問題?🔍 「青少年如果吸食水煙,便會對吸煙躍躍欲試。香煙含有許多有害化學物質,有損健康。因此,年輕人不應吸食水煙🙅🏻‍♀️🙅🏻‍♂️。」 上面嘅例子,雖然想論證年輕人唔應該食水煙,但論點每一環嘅說服力都好薄弱。「食水煙」同「食煙」係類似嘅事物,但兩者之間唔一定有必然嘅邏輯關係。亦即係話,食水煙嘅人,唔一定會食煙。   咁呢個例子要點改好呢?如果想論證食水煙嘅禍害,其實直接分析食水煙點樣損害健康就得㗎喇!一齊睇吓下面嘅改寫示例: 「水煙的煙霧含有類似燃燒煙草的致癌物質,例如甲醛、苯、重金屬。美國有研究指出,吸食水煙吸入的焦油是香煙的25倍,吸入的尼古丁是香煙的2.5倍,可見水煙既會令人上癮,亦會損害健康。年輕人應少吸食為妙。」 改寫過嘅例子,邏輯關係清楚好多:因為吸食水煙會令人上癮,而且有損健康,所以年輕人唔應該食。調返轉講,如果論證係建基喺某啲前設,例如食水煙嘅人一定會食煙,論點嘅說服力就會大減。 睇完上面嘅改寫示例,係時候要挑戰吓自己!😤 下面嘅句子,同學又知唔知應該點改寫呢?諗吓下面嘅句子有咩邏輯問題,再試吓改寫句子,應用返你啱啱學過嘅嘢啦~(呢篇文章最底會有參考答案!✨) 實戰題💪🏻:「讀一所好中學,才能考上好大學,找份好工作,生活無憂🤩。」   二、循環論證 循環論證,即係用嚟證明論點本身嘅論據,佢嘅真確都需要論證。睇完都唔係好明?😵 一齊睇吓下面嘅例子啦! 同學甲:我是全班最聰明的。 同學乙:為什麼你是最聰明的? 同學甲:因為我腦袋很靈光。 同學甲嘅答案好似解釋緊點解佢係全班最聰明嘅同學,但其實佢只係解釋緊咩叫「聰明」,而唔係「點解佢係最聰明嘅」。如果同學甲要解釋嘅話,佢其實可以咁講:「我考試成績總是最好的,老師問問題,我也是第一個舉手回答,答得快又準😤。」   不如再睇吓呢個技巧點樣應用喺文憑試度啦💁🏻‍♂️ 2016年第三題:傳統往往是創新的包袱。 假設其中一段論點咁樣寫:「傳統拖累創新,造成社會進步的負擔。」 呢一段,其實只係用唔同嘅字,去重複一次「傳統往往是創新的包袱」,冇解釋到傳統拖累創新嘅原因。考試寫文章,有時可能突然「情思枯竭」,諗唔到點鋪排論點,於是嘗試用唔同嘅文字,複述多次分論點。呢個時候,同學可以諗吓有咩角度切入,可以幫自己闡述個論點。呢度嘅例子,我哋可以從社會角度入手,講吓傳統觀念點樣拖累飲食業嘅創新:「傳統思想,會使人們墨守成規,被傳統觀念束縛,安於現狀,不敢創新求變。試想像,若麪包店過於執着傳統月餅的外貌、材料、味道,又怎能推陳出新,發明大受好評的冰皮月餅和奶黃月餅🥮?」   其實寫議論文嘅時候,論證要做得好,就要諗吓點樣拓展論點,延伸說明。千祈唔好以為換句話講多次個分論點,再加個例子,就叫做完整同嚴密嘅論證呀!😔   三、借助權威 見到呢個標題,有同學可能會問:權威人物係我哋嘅榜樣楷模,佢哋地位高,受人敬重,講嘅說話都比較可信,​點解唔可以借助權威去作文?​🤔 呢部分,小編都用返文憑試嘅題目同大家分析啦😉 2016年第二題:我在朋友之中找到快樂。(註:題目本身係「我在____之中找到快樂」,「朋友」係小編後加嘅。) 又假設其中一段論點咁樣寫:「論語有云:『有朋自遠方來,不亦樂乎?』孔子認為,有朋友從遠方探望自己,十分快樂。孔子這樣說,說明人人也能從朋友中找到快樂,我也不例外😜。」 單單因為孔子咁樣講,就斷言每個人都可以從朋友之中搵到快樂,正正就犯咗借助權威嘅謬誤喇!每個結論都有背後嘅原因。如果寫文章嘅時候,單單話某位名人講過,所以得出某個結論,論證就會唔夠嚴密。要改寫例子嘅論證,可以先講咗自己點解覺得可以從朋友之中搵到快樂,再引用名人嘅說話,咁樣就可以有「畫龍點睛🐉」嘅效果。例子改寫:「朋友能互相切礎學習,彼此勉勵進步。有朋友一起分享箇中快樂,傾訴心事,是很幸福快樂的。『有朋自遠方來,不亦樂乎?』,孔子也說,有志同道合的朋友探望自己,聚舊聊天,是樂事一樁。」   四、小結 今次分享嘅三個常犯邏輯謬誤,同學平時可能都有聽過。但寫文章寫耐咗,可能就會唔記得咗,唔小心犯咗呢啲謬誤。希望呢篇文章可以提醒返同學,寫作嘅時候多啲留意,多啲練習,就可以避免呢啲問題邏輯謬誤㗎喇!💛   最後,小編畀返實戰題嘅改寫參考答案大家:✨ 「讀一所好中學,教師資源、校園環境、學校配套較佳,同學方能在良好環境學習,提高考上知名大學的機會。知名大學聲譽高,畢業生出路平均較多,較易找份薪酬高的工作。」 貼士一💛:講清楚啲句子之間嘅邏輯關係,論證先有層層推進嘅感覺。 (讀一所好中學=教師資源、校園環境、學校配套較佳同學方能在良好環境學習提高考上知名大學的機會) 貼士二💛:避免用太主觀嘅字眼,用多啲客觀嘅字詞 (❌好大學 ⭕️知名大學;❌好工作 ⭕️薪酬高的工作)

【寫作常犯錯誤——歐化中文(二)】

2021-12-02
歐化中文,化簡為繁 上一篇文章,NoteSity 小編同大家分析咗歐化中文嘅三個問題。其實,惡性歐化仲有好多種!🤯 小編今日會由詞類入手,同大家拆解代詞、連詞、介詞常犯嘅歐化毛病。😉   一、代詞 例一:英國最危險城市民調結果出爐,威爾斯地區首府卡迪夫高居榜首。民調結果指出,居民稱當地暴力犯罪猖獗,高達38%的受訪者說,他們晚上在街頭行走感到危險。但高達31%的民眾說,他們連在白天都擔心自身安危。 呢一段取自網絡嘅文章,入面嘅代詞「他們」其實係可以省略嘅。今時今日,中文嘅第三人稱代詞有好多種,他指男性👦🏻,她指女性👧🏻,牠指動物🐱,它指死物🤖,祂指神明👼🏻。但中文一開始淨係得「他」一個代詞,既可指眾數,亦可指男性或女性,女性「她」都係五四運動期間先發明嘅。咁點解中文會用多咗代詞?用多咗代詞,又有咩問題?🤔  中文會用多咗代詞,好可能係受英文影響。英文好常會用代詞,有時係為咗避免重複主語,有時係語法上需要。好似例一咁,用英文表達「高達38%的受訪者說,他們晚上在街頭行走感到危險」,可以話 'As high as 38% of the respondents said they sense danger on night-time streets.',入面嘅 'they' 係唔可以省略嘅。相反,中文好少用人稱代詞,更多時候會重複名詞,或者直接省略稱謂。睇吓例二: 例二:母親說,過幾天給姊姊買新圖書。姊姊不依,她硬要今天看,鬧著鬧著竟哭了起來😭。 細心睇,呢度嘅代詞當然係指「姊姊」,但有啲時候,代詞同指代嘅事物相隔太遠,讀者未必可以睇第一次就知個代詞講緊乜,有時甚至會誤會咗代詞指代嘅事物添!就好似下面例三咁: 例三:海恩耳朵變紅了。她似乎發現自己臉色變了,趕緊轉頭過去,假裝望着窗外景色。倩玉並不覺得沒錢買新手機有什麼好丟臉的,不管怎樣,一個月前,她自己同樣也是當了一輩子的窮光蛋💸。 呢度兩個「她」指緊唔同嘅人物,第一個她指「海恩」,第二個就係「倩玉」。睇嘅時候唔為意,可能就會理解錯咗,將第二個「她」當咗係海恩都唔出奇。原因正正係中文代詞嘅照應關係冇英文咁清楚,所以比起用代詞,直接重複主語,或者直接省略代詞,都會清楚易明得多。   二、連詞 英文慣常用連詞連接句子,中文就會透過詞序表達句意,詞語、句子之間,都唔一定要用連詞。唔知同學有冇聽過開門七件事呢?開門七件事,就係柴、米、油、鹽、醬、醋、茶。但同學應該唔會聽過有人會講:「柴、米、油、鹽、醬、醋,以及茶」。用標點符號,有時已經可以清楚表達並列關係,加咗連詞,反而會顯得有啲不倫不類😣 所以同學千祈唔好受咗英文影響,以為連詞喺中文都係必需㗎。😤   再講吖,英文每個連詞可能只有一個作用,但中文唔同,一個連詞嘅用途都好多元化。驟眼睇,「和、而、跟、與、及、同」呢幾個連詞好似都係 'and' 嘅意思,但佢哋嘅意思、用法其實都有微妙嘅分別。呢一部分,小編想大家講吓「而」同埋「及」呢兩個常用嘅連詞。   1. 而 「而」除咗英文 'and' 嘅意思,其實仲可以表示轉折嘅關係,好似例四咁: 例四:他做事小心,慢而可靠。 呢度嘅「而」係「但是」嘅意思,意思係話佢做嘢雖然慢,但係可靠。   除咗轉折,「而」有時有更進一步嘅意思。好似中學讀文言文一定聽過嘅「學而時習之,不亦樂乎」,「而」字有語義承接嘅作用,「時常複習」比起「學習」嘅層次高啲,語氣都強啲。所以成句可以咁理解:「讀書,再加上經常複習,唔係好開心咩?」🤗   2. 及 同學平時寫作閱讀可能冇留意到,但「及」字其實係唔可以用喺動詞結構入面。即係咩意思?睇吓例五啦: 例五:專心上課及認真複習,是取得好成績的關鍵✍🏻。 呢度「上課」同「複習」都係動詞,所以呢句唔可以用「及」字,用「和」字反而比較好。下次寫文章嘅時候,記得唔好用錯喇!🙅🏻‍♀️🙅🏻‍♂️   三、介詞 英文語境通常都離唔開介詞。介詞嘅用途相當多元,例如不及物動詞(intransitive verb)加上介詞,就可以變成及物動詞(transitive verb)。好似下面例六同例七咁: 例六:'The baby is crying (不及物動詞).' 例七:'The child is crying (不及物動詞) out for (介詞) help (受詞).'   但係中文唔同英文,介詞好多時都唔係必要嘅句子成份,又睇吓例八: 例八:關於他的申請,你看過了沒有? 唔加「關於」,成句變咗「他的申請,你看過了沒有?」,其實都無傷大雅,甚至可以話句子更加簡潔同通順。✨   另一個同學成日濫用嘅介詞係「由於」。英文好注重句子之間嘅邏輯關係,會用介詞交代子句的因果關係(例九): 例九:'Since his family is poor, he has to withdraw from school🏫.' 呢句冇咗介詞 'since',雖然文法上冇錯,但就唔太地道,子句嘅連接亦冇咁緊密。同一句直譯做中文,可能會變咗例十咁: 例十:由於他家境貧窮,他只好休學。 不過,中文好多時已經內化咗子句之間嘅因果關係,唔需要用介詞表達出嚟。更加地道嘅表達應該係好似例十一咁: 例十一:他家境貧窮,只好休學。 唔用介詞,既無損文意,文字都乾淨啲。讀者睇嘅時候,亦唔難理解到前半句係「原因」,後半句係「結果」。   四、小結 英文為咗要符合文法,好多時都要用適當嘅代詞、連詞或者介詞。但中文就冇語法嘅限制。同學會犯歐化嘅毛病,好多時都係因為畫蛇添足🐍 加咗冇必要嘅句子成份。寫文章嘅時候,要避免歐化中文,不妨諗吓句子入面嘅代詞、連詞或者介詞有冇得省略。省略不必要嘅成份,文章自然通順、簡潔得多~😉

【聽歌學到英文?】一文剖析聽歌學英文之利與弊

2021-09-07
上次就講咗點樣透過睇劇去學好英文啦,呢個方式唔少人都推介過嘅~如果同小編一樣唔太鍾意煲劇嘅同學仔(太冇耐性🥲),其實有個比較小眾嘅方式🤫就係🥁…聽歌喇🎶! 今時今日,聽歌唔再需要攞住部Walkman(舊時隨身攜帶嘅CD/cassette機…係年代感啊🥲)周街走,大家一打開手機嘅音樂串流app📱隨時隨地都可以聽歌,上千萬首歌任君選擇,又唔使全神貫注(可以一路聽歌一路做其他嘢),好似幾抵諗咁喎😲 咁究竟聽英文歌學英文係唔係一個有效嘅方法呢🧐?就等小編同大家分析下啦🤓!   👍🏼好處一:容易入腦 相信大家都有試過要集中嘅時候,腦海突然諗起一首歌就揮之不去(考試真係)😵‍💫普遍流行歌都好容易入腦🧠,尤其係歌曲嘅副歌部分更加係會令人上癮!學語言係一個持續嘅過程,所以學習嘅方式必須令到自己能夠恆常咁去鞏固自己嘅能力💪🏼一首歌通常都係三分幾鐘,聽多幾次都開始識哼,再聽熟啲就開始識跟住歌詞唱🎤比起背書更加容易入腦,比起睇劇又更加方便快捷!所以實行起嚟較容易,自自然然更願意去用呢個方式去學習英文啦!   👍🏼好處二:多靚詞靚句 雖然歌都有好多種,亦都有唔同嘅作詞風格,但因為歌詞都算詩詞嘅一種,所以都有好多歌曲嘅修辭手法、抽象嘅意境同埋敘述故事嘅方式好值得學習㗎🤩!劇集嘅用詞相對地口語化同生活化,好少會好文縐縐咁敘述情節或者刻畫人物,而且多數以畫面而非文字表達。睇歌詞嘅話,好多作詞人除咗用對話形式寫詞之外,都有好多唔同嘅描寫手法。 小編覺得Ed Sheeran嘅《The A Team》就係一首幾值得學習嘅例子喇👨🏻‍🦰呢首歌描寫緊一個流浪街頭嘅女仔,而主歌 (verse) 嘅部份就以簡潔嘅詞句去刻畫呢個女仔嘅狀況。當中嘅 “breathing in snowflakes, burnt lungs, sour taste” 更加以雪花去暗喻毒品,個女仔個肺好似畀火燒一樣,留下酸酸嘅味道。 除咗Ed Sheeran,以歌詞寫故仔嘅表表者仲有Taylor Swift,小編最鍾意佢嘅《Clean》,以雨水洗去污漬比喻放開前度情人留底嘅傷疤🌧🌹   👎🏼壞處一:唔跟標準文 之前小編都提及過一啲外國人會唔跟標準文法嘅例子,有啲地道啲、口語化啲嘅英文有時會因為方便而忽略咗標準文法嘅~歌詞就唔係formal writing啦,所以呢個情況喺歌詞裡面都常見嘅。 另一個原因就係因為每句歌詞嘅syllables都要配合返旋律,有時為咗湊夠粒音或者係夾硬塞到嗰句落去,只要唔太影響內容意思,填詞人都會寧願聽落去更加好聽而放棄啱grammar😔所以如果要聽英文歌學英文嘅話,喺grammar方面就要畀多啲心機去查證喇🥸   👎🏼壞處二:唱腔影響讀音 有啲歌手字字鏗鏘,有啲歌手睇住歌詞都聽唔明佢唱乜…同一個字,country、hip hop同重金屬歌手嘅讀音又有唔同🤨歌手嘅讀音好容易畀唱腔同口音影響㗎😥譬如要拉長唱個 “me” 字,個口張大啲就會容易啲發到聲,但就會變咗唱成 “may”😣咁 樣有機會影響到歌詞理解之餘,遇到一啲唔識點發音嘅字都有機會跟住讀錯😅不過呢啲情況又唔係太嚴重嘅,只要搵到一啲適合自己聽而字正腔圓嘅歌手,讀音失誤呢個問題都唔大!😁 聽歌學英文睇嚟都係比較軟性同輕鬆嘅一個方法,同時又可以學下填詞人嘅功力,不過如果係想學到好標準就未必係最好嘅方法喇。不過,冇一個方式係十全十美嘅,嘗試下多元嘅學習方法,以長補短,就能夠更全面咁學到英文啦!🥰💛 *以上文章內容純屬作者個人分享,並不代表本網站之立場。   🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁呀!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~    💭 咩係 NoteSity?係全港最大網上教育書店,為你搜羅不同作者及出版社嘅 DSE 溫習筆記、補充練習與參考書,一個平台匯聚你需要的嘅 DSE 資源,幫助你考好 HKDSE。   📚 網上購買 DSE 溫習筆記、補充練習與參考書:熱門產品 | 優惠套裝 | 產品分類

【DSE 英文卷二】Short Stories — 卷二必死題?

2021-09-07
話說小編中四五嘅英文卷二 (DSE English Paper 2 Writing) 成績一直都好似股市咁上上落落📈📉最好同最差可以相差成40分咁多🤕(小編中學份卷一百分滿分🤣)!嗰陣唔係幾捉到自己嘅長處喺邊度,見邊題諗到point嘅就寫邊題… 然後到中五最後一次考試,嗰陣諗:「既然最後一次,不如就豁出去,試下寫short stories啦!」嗰陣嘅小編未寫過short stories,諗住搏一搏…點知史無前例地高分喎🤯!自此小編卷二就一直寫short stories喇🔥 相信大家都會聽過人講,千祈唔好寫short stories,必死無疑💀而大部份中學連教都唔會教,因為風險高得嚟之餘,創意呢家嘢唔係話學就會識😥 而小編最常聽過嘅理由,就係「好易離題」同埋「冇靚詞靚句」🤔但所有題目都有機會出現呢啲問題吖,究竟咩類型嘅人先適合寫short stories呢?🧐 「咪就係有創意、讀eng lit、同埋英文好嘅人囉!🙄」🖐🏼閘住反彈冇回頭!嗱嗱嗱,作故仔有創意就梗㗎喇,但係就算讀eng lit、英文好,寫故仔都未必最適合㗎!等小編同大家分析下啦!🤪 💛仔細型🔬 要諗到故事大綱嘅起承轉合就必然㗎啦,但細節位🤏🏼就未必個個諗得咁清楚喇!一件事點解會發生,中間有咩小插曲,角色有啲咩特點或者背後有咩故事去驅使佢做某啲行為…就算你諗到嘅劇情幾大路都好,加插咗細節嘅話都會令成個故事內容更加豐富,而且仲有機會因為呢啲細節而啟發到新嘅劇情發展添🎬!不過要注意嘅係,要衡量下呢啲細節對於推進故事有幾大幫助,如果唔係只會畀人覺得你TMI (too much information)㗎咋!😥 💛觀察型👀 Short stories一定離唔開描寫㗎喇。大部份同學仔嘅擔憂都會係用詞唔夠靚、唔夠特別。其實小編用字都唔靚,所以採取以量取勝嘅策略!同一個moment,比其他人描寫得更多嘢,就會更加有畫面。 例如一個人跑步,除咗腳步👣、喘氣😮‍💨,會唔會察覺到其他嘢呢?迎面而嚟嘅風🌬?或者係額頭上嘅汗珠💦? 不過,戴返實個頭盔先🪖如果描寫嘅方向過於單一(即係「個天好藍,啲樹好綠」🥶)其實寫幾多都冇用嘅😢(p.s. 小編當年入考場之前上網搵咗幾句形容夕陽嘅句子作參考,因為描寫風景一定最百搭😜) 💛口水型🗣️ 呢個亦就係小編嘅必殺技喇😎由於小編寫嘅英文比較口語化同informal,又唔去背下生字(懶🦥),所以寫formal嘅文章就比較蝕底喇🥲 小編又唔係真係描寫得好叻,所以通常寫故仔嘅時候會加插多啲人物之間嘅對話、自言自語同埋內心戲。有時唔識點樣將啲轉折位表達出嚟,其實角色簡單講一句嘢就可以交代到劇情~語氣同談吐仲都可以勾畫到角色嘅性格同背景添! 其實short stories並唔係必死題,最緊要係適合自己寫作嘅風格同埋習慣~趁早揾下自己寫作有咩長短處,睇下唔同嘅文體或主題對你有冇利,話唔定會好似小編當年咁起死回生呢!✌🏼   *以上文章內容純屬作者個人分享,並不代表本網站之立場。   🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁呀!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~    💭 咩係 NoteSity?係全港最大網上教育書店,為你搜羅不同作者及出版社嘅 DSE 溫習筆記、補充練習與參考書,一個平台匯聚你需要的嘅 DSE 資源,幫助你考好 HKDSE。   📚 網上購買 DSE 溫習筆記、補充練習與參考書:熱門產品 | 優惠套裝 | 產品分類

【睇劇學英文】簡單四步煲劇教你學英文,寓學習於娛樂~

2021-09-07
幾時都話,學咩語言都好,都係要浸返嚟嘅🏊🏼睇得多👀聽得多👂🏼,自然會容易啲上手,就好似小編媽咪睇得多韓劇都識講句「撒浪嘿唷」咁🤦🏻‍♀️成日聽啲人講,睇美劇可以學英文,但又有幾多人睇完真係學有所成呢?🤨今 日就等小編嚟講解下點樣有效咁煲劇學英文🎬,寓學習於娛樂啦!🥳   1️⃣揀一套適合自己嘅劇集 小編平時好鍾意睇CSI🧫欲骨查🦴呢類懸疑查案嘅劇,不過呢類劇集成日會有好多專業嘅用詞,所以有時連開住中文字幕都唔係幾明佢哋做緊啲乜😵‍💫所以揀啱劇集嘅類型、題材同難度真係好重要!比較推薦嘅類型係處境喜劇,搞笑得嚟之餘又貼地,可以學下日常啲嘅英文。最重要嘅係一集處境喜劇通常好短,唔太需要追劇情🤓 如果英文比較弱嘅同學仔,可以搵下Disney Channel嘅真人喜劇(小編嘅童年🥺),除咗容易明之餘,題材都相對地廣(Wizards of Waverly Place講魔法🪄、Hannah Montana講做明星👩🏼‍🎤、The Suite Life On Deck講住郵輪🚢)! 如果係英文比較好嘅同學仔,小編首推嘅劇集係The Good Place☁️雖然故事講述死後世界,比較魔幻,但係大部分情節都係以角色嘅日常生活為主,而且仲會探討哲學議題添!🤔其次嘅就係Brooklyn Nine-Nine🚓不過呢一套劇嘅笑話好多時都同美國流行文化有關,所以未必會get到所有笑點🥲   2️⃣開中文字幕睇一次 學英文唔係一步登天嘅,所以第二步就係開中文字幕睇一次,瞭解咗一集嘅劇情先!不過中文字幕只係輔佐你理解明白劇情嘅工具,記得唔好將注意力放晒喺字幕度!要多啲留意畫面同埋聲音,真係唔明嘅話先至回帶再睇多次,否則就會好似睇中文書咁而唔係睇外語劇㗎喇😥   3️⃣開英文字幕再睇一次 好多人以為睇完一次英文劇集就可以學到英文,但忽略咗最重要嘅一環:重溫!轉睇英文字幕,按照第一次睇嘅時候理解嘅劇情去理解每句英文對白嘅意思🧐有需要嘅話可以再搵返中文字幕睇下嗰句嘅意思。要特別留意嘅係,中文字幕好多時候都係意譯,未必完全跟晒字面意思,所以有時可能會同英文字幕有啲出入~所以有唔明白嘅時候就要記低佢,然後落下個步驟!👇🏼   4️⃣查字典 遇到有唔識或者唔太肯定嘅生字嗰陣,就記得要查下佢嘅意思同用法📚寫低落本筆記簿到就更加容易記錄自己嘅進度同埋方便重温✍🏼仲有,劇集嘅台詞通常比較口語化同地道,如果遇上唔識嘅俚語、句子結構或者文法都可以搵Google大神解答你㗎🙏🏼   ⭐️Bonus 難度升級!如果有時間將劇集睇第三次嘅話,不妨試下閂咗個字幕,訓練自己嘅聆聽能力🎧!唔開字幕都唔使驚睇唔明,因為已經睇第三次🤣🤣如果真係太得閒想睇第四次(吓你玩嘢呀小編😒),仲可以跟住啲英文字幕一齊讀,訓練自己口語能力~ 不過知道大家平日又要做功課又有SBA又要溫書,多數都好忙嘅🥺所以如果都想練到口語嘅話,可以抄低一啲自己覺得唔錯嘅對白,平時可以練下點講,咁就唔使每集都睇咁多次啦😵‍💫 其實睇劇學英文都要花幾多時間去實行,唔會睇完就即刻進步,要慢慢累積先會有成果~下次阿媽入房鬧你睇劇唔溫書嘅時候,起碼你都可以講自己做緊正經嘢🤫🤣   *以上文章內容純屬作者個人分享,並不代表本網站之立場。   🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁呀!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~    💭 咩係 NoteSity?係全港最大網上教育書店,為你搜羅不同作者及出版社嘅 DSE 溫習筆記、補充練習與參考書,一個平台匯聚你需要的嘅 DSE 資源,幫助你考好 HKDSE。   📚 網上購買 DSE 溫習筆記、補充練習與參考書:熱門產品 | 優惠套裝 | 產品分類