中英句構大不同
上一篇文章，NoteSity 小編同大家講咗中英文主語有咩唔同。當然啦，中英文除咗詞語層面有分別之外，句子都有唔少分別。呢篇文章，小編會同大家講吓中英文句構嘅異同😉
一、基本句子成分
一般嚟講，中英文嘅句子都有以下三個句子成分：
- 主語（subject）
- 動詞（verb）
- 受詞／賓語（object）
關於呢點，相信同學都唔陌生，簡單用例子講吓啦：
例一（英）：I (subject) finished (verb) my homework (object)📝.
英文嘅subject一般會係名詞（noun）或者代名詞（pronoun），呢句嘅主語就係I呢個代名詞；verb當然就係動詞啦，每句句子都只會有一個主要動詞（main verb），即刻有實際意義同埋可以獨立使用嘅動詞；object同subject一樣，一般都係名詞或者代名詞。
英文嚟講，subject+verb+object（SVO）呢種句構都好常見㗎～
有趣嘅係，唔理中文定英文，句子越複雜，句子成分就會越多。英文SVO結構嘅句子，用中文表達，有時需要加返定語、補語、狀語，先可以表達到相似嘅意思。唔係好明？😫 睇吓例一點樣可以用中文表達啦！
例一（中）：我（主語）做（動詞）完（補語）家課（賓語）。
英文可以用simple past tense呢個時態表達完成咗嘅動作，中文就要用詞彙手段，加返「完」呢個補語。小編喺之前嘅文章都有講過，同學可以撳呢度重溫返😊
二、二分法🎵 vs 三分法🎶
中文同英文嘅句子有個好大嘅分別，就係中文較常用二分法。
二分法，意思係句子分成兩部分：話題（Topic）同說明（Comment）。所以中文句子一般都有兩個子句，一個係話題，一個係說明，好似例二咁：
例二（二分法）：這個建議涉及開支約10億，可讓70萬人受惠💰。
第一句分句帶出話題「這個建議」同埋「涉及開支」，第二句分再補充說明建議嘅作用。呢句句子應該都好易讀，但如果用三分法表達會點呢？🤔
例二（三分法）：這個涉及開支約10億的建議可讓70萬人受惠。
句子用三分法表達，一嚟句子會長咗，二嚟資訊密集咗，難啲消化理解。邊個表達方法好啲，相信都一目了然🤭
同學可能估到🤫 其實三分法係英文常用嘅句構。英文好注重句子嘅語法，句子結構嚴謹，句子一定要有主語動詞賓語，缺一不可，好似例三咁：
例三（三分法）：The direct contribution of tourism to our economy in 2008 was more than 50 per cent higher than in 2000🛬.
用三分法表達，語法當然冇問題，而且讀起上嚟都好自然。用二分法又係點呢？
例三（二分法）：In 2008, tourism had a direct contribution to our economy, and was more than 50 per cent higher than in 2000.
驟眼睇，二分法嘅句子好似問題不大，語法啱，讀起嚟都冇困難。唯一要挑剔嘅就係表達唔夠地道：英文通常多用名詞，少用動詞。呢句句子用咗兩個動詞，分咗兩個分句表達，但其實用一句句子都可以表達到。
三、重心放前👈🏻 vs重心放後👉🏻
中文除咗慣用二分法，亦都傾向將句子嘅重心放後。原因在於華人表達嘅時候，鍾意先鋪墊同渲染，再點出中心思想；另一個講法係華人習慣先交代原因，再講結果。所以中文句子嘅結構重心往往靠後。
覺得有啲抽象？🤯 睇吓例四啦：
例四（中）：這位音樂家演奏嚴謹精到，風采懾人，令人讚歎不已🎻。
呢度句子嘅重心係作者嘅體會，作者先講咗對演奏評價，最後再講一個總評，將重心放後。
英文就調返轉，鍾意將句子重心放前。原因係西方人講嘢比較直接，鍾意先講中心內容，再補充其他訊息，所以英文嘅句子結構重心通常放喺前面。用返頭先嘅例四，用英文表達嘅話，可以咁講：
例四（英）：The musician excited unreserved admiration for his incisive rhythm and for his authority.
句子先講重心，即係作者對音樂家嘅總評，之後再補充點解佢有咁嘅睇法。句子嘅鋪排同中文係啱啱好調轉㗎！
三、小結💛
中英文思維唔同，表達方法有所差異，所以常用嘅句構都會有唔同💁🏻♂️ 同學如果掌握到中英文句構嘅分別，寫文章嘅時候多啲留意，文章就更加自然流暢㗎喇～🤩
四、實戰題💪🏻
睇完上面嘅分析同例子，想知自己明咗幾多？試吓改寫下面嘅句子，令句子更加地道自然啦！
1. 處事一向我行我素的他這回又惹毛了老師😡。
2. 我們必須常常往前看，雖然我們還不知道整個計劃😤。
3. If one does not make great efforts, one can never succeed🏋🏻♂️.
4. AIDS attacks the body's natural defence system against disease and is a life-threatening sickness🤕.
參考答案
1. 他處事一向我行我素，這回又惹毛了老師。
中文慣用二分法，將「處事一向我行我素」呢個前飾放返喺「他」後面，再用逗號分隔，既唔會改變句子意思，句子亦會易讀咗。
2. 我們雖然還不知道整個計劃，但必須常常往前看。
呢句句子係Facebook創辦人朱克伯格喺某次演講用中文講嘅，佢應該用咗英文嘅思維模式，所以將句子嘅重心放前咗。但係中文通常將重心放後，呢句句子嘅重點應該係「往前看」呢句，帶有呼籲作用。
3. One can never succeed without making great efforts.
原句雖然文法冇錯，但唔係用英文慣常嘅三分法表達。同學寫作嘅時候，可能都好常用if…嘅句構，但有時我哋不妨諗多一步，係咪有必要用呢個句構？🤔 如果用一句句子表達，意思會唔會更清楚？
4. AIDS is a life-threatening sickness which attacks the body's natural defence system against disease.
句子重心係AIDS is a life-threatening sickness，which後面嘅只係解釋緊點解佢係life-threatening sickness。
同學對於關係名詞（relative pronoun），例如where、who、which、that，應該都唔陌生，寫作嘅時候都不妨多用，重心放喺關係名詞前面，補充說明放喺關係名詞後面，咁樣句子就夠清楚同自然啦～😬
（呢篇文章部分內容改寫自大學翻譯系教材）
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁啊！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 訂購高質 DSE 筆記、補充練習與參考書：中文科 | 英文科 | 數學科 | 通識科 | 理科 | 商科 | 文科
下次再同大家分享更多有用嘅資訊～ 記得密切留意啊🥳
