中文有冇主語都得？
上一篇文章，NoteSity 小編同大家分享過中英文時態嘅唔同。呢篇文章，小編想講吓兩者主語有啲咩唔同😊 開始之前，睇吓下面嘅句子先啦：
冬天的星期天，早上起來，已經快十一點了❄️。
唔知同學有冇留意到呢？呢句中文隱沒咗個主語「我」，但讀落一啲問題都冇。英文就唔同喇，主語係語法要求，唔可以省略。所以呢句句子用英文表達，一定要加返主語：
It (主語) is almost 11 when I wake up on winter Sundays.
中英文嘅主語各有唔同，下面係一個簡單嘅概括💁🏻♂️
英文：主語係必要㗎‼️
中文：視乎語境，主語可有可無 |
想知中英文嘅主語各自有啲咩特色？睇落去就知㗎喇～😉
一、英文主語
英文有一種主語叫示現主語（expletive subject），即係有啲字會當主語咁用，但個字本身冇任何意思。下面會講吓there同it呢兩個常見嘅示現主語：
1. There
There嘅用法，相信同學都唔陌生，好似下面嘅例子咁：
例一：
英文：There must be a reason for her absence🪑.
中文：這裏一定有她缺席的原因。
不過呢句嘅中文比較似歐化中文，想表達得自然啲，可以講：她缺席一定有原因。
同埋同學有冇諗過，點解要用there+be嘅句子結構？🤔 其實句子寫成 "She is absent because of a reason."，都可以表達到相似嘅意思。原因在於，用呢個句子結構，唔會強調施事者（doer）係邊個，顯得句子比較客觀～
2. It
It除咗係代名詞（pronoun），亦都可以當主語咁用，下面就係一啲例子：
例二：
英文：It is hot🥵.
呢個it又叫weather it，英文講天氣嘅時候，好常會用it開頭。
中文：天氣很熱。
中文就比較簡單，講天氣嘅時候，可以用「天氣」開首；想講埋時間嘅話，可以加埋「今天」、「現在」等等嘅字眼。
例三：
英文：It is great to see you😉.（中文：很高興見到你）
呢句句子有趣嘅地方在於佢有示現主語同埋真正主語（real subject）：It係示現主語，to see you就係真正主語。
換句話講，其實句子可以寫成：To see you is great.
同學可能會好奇，咁點解句子要用it開頭？🤨 其實有原因嘅，基本動詞詞組（infinitive clause）太長嘅話，句子會好難讀。試想像吓如果句子變成咁：
To see you doing so well after a long flight（基本動詞詞組） is great🛬.（中文：見你搭畢長途機還很精神，真好。）
句子嘅主語會變咗To see you doing so well after a long flight。呢度文法雖然正確，但唔太自然，難啲理解。要記住，寫作嘅目的係令讀者容易明白你講緊咩，如果可以表達得清楚易明啲，又何樂而不為呢？🙈
所以呢句句子可以用返it做主語，好似咁：
It（示現主語）is great to see you doing so well after a long flight（真正主語）.
咁樣句子係咪易讀好多呢？所以寫文章嘅時候，千祈唔好睇少個it字呀😤
二、中文主語
小編之前都講過，用中文寫作，如果主語重複咗係可以省略嘅。呢啲我哋叫無主句。當然啦，無主句有好多種，好似下面嘅例子：
1. 名詞開首
例四：
甲：午餐吃了嗎🍱？
乙：午餐吃過了。
睇吓乙嘅回覆，明明句子真正嘅主語係「乙」，點解唔講出嚟？因為唔重要：甲問乙食咗午餐未，乙話食咗喇，就算唔講個「我」字，我哋都清楚知道乙係話自己食咗午餐，所以唔加主語都夠清楚，加咗主語，反而會有啲突兀。寫對話嘅時候，同學要特別留意呀⚠️
2. 動詞開首
例五：放學回家時發現，竟來了位陌生人🙀。
單睇後半句，我哋唔知主語係咩，但睇埋前半句，就知道係「屋企」嚟咗個陌生人。呢個例子正正反映要理解中文嘅主語，好多時都要靠上下文去判斷。
例六：走近海灘，便看見水面波光粼粼，水中魚兒愜意暢游🐠。
另一種常見嘅無主句係描寫景物嘅句子。描寫景物，往往會用第一人稱敍事，重複主語，只會顯得句子累贅冗長。
唔係好想像到？🤯 睇吓下面嘅句子啦：
例七（補上主語）：我走近海灘，我便看見水面波光粼粼，水中有魚兒暢泳。
呢句句子加返主語，一嚟冇咁好讀，二嚟好似要強調「我」，但其實重點係啲景色，唔係「我」。
三、小結💛
英文嘅主語係語法要求，唔可以唔寫，所以彈性比較小😔；中文嘅主語，看似簡單，寫起上嚟，其實都有好多細節要考慮🧐 下次校閱文章嘅時候，不妨睇吓句子嘅主語有冇實際作用，冇嘅話就可以刪去。呢種練習做得耐，文筆就會有進步㗎～
四、實戰題💪🏻
睇完上面嘅分析同例子，想知自己明咗幾多？做吓下面嘅實戰題，用另一種語言表達句子嘅意思，挑戰吓自己啦！
1. （試吓用中文表達）When you do good, you will feel happy😊.
2. （試吓用英文表達）那地方吃什麼菜的🥗？
3. （試吓用中文表達）香港的夏天，天氣往往很熱☀️.
參考答案😬
1. 做好事會得到快樂。／助人為快樂之本。
呢句英文嘅you其實泛指所有人，中文表達嘅時候，唔需要特登加返主語「你」，如果唔係，寫成「你做好事，你會得到快樂」，就會有排他嘅感覺，顯得淨係得「你」做好事先會快樂。
2. What food do the people (主語) there eat? / What food (主語) is eaten at that place (by the people)?
小編喺呢篇文章都講過，英文嘅主語係必需嘅，所以呢句用英文表達，一定要補上主語。句子可以用主動句（active voice）表達：What food do the people there eat?，又或者用被動句（passive voice）都得：What food is eaten at that place (by the people)?
3. It is usually hot in summer in Hong Kong.
呢句講緊天氣，可以用返weather it表達。如果同學好想強調講緊天氣，用返The weather做主語都可以：The weather is usually hot in summer in Hong Kong.
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁啊！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 訂購高質 DSE 筆記、補充練習與參考書：中文科 | 英文科 | 數學科 | 通識科 | 理科 | 商科 | 文科
下次再同大家分享更多有用嘅資訊～ 記得密切留意啊🥳
