🤧「瞓到下晝先起身、食個 Brunch、癱喺張牀睇手機煲劇打機，到咗夜晚就去食個晚飯，然後繼續癱喺張牀睇手機煲劇打機，直到凌晨先瞓覺…… hea下hea下又一日……」呢個係咪放暑假嘅你？

 

醒啦！！升中四中五中六嘅同學仔，暑假對於準備 DSE 嚟講絕對係一個關鍵嘅階段，如果能夠好好善用暑假，開學之後唔單止會無咁大壓力，更加可以令自己嘅成績提升，急起直追！但係，暑假流流長，又應該有咩可以做、暑假又要點樣溫書呢？🤔

 

NoteSity 小編之前分享咗中四至中六平日返學嘅溫習時間表，但係暑假又會有啲唔同，所以又繼續分享高中暑假溫書計劃，睇下高中暑假究竟有咩可以溫，實際上又可以點樣計劃啦！😆

 

目錄：

I. 暑假溫書第一步：保持狀態

  1. 規律作息

  2. 適當運動

II. 暑假溫書第二步：總結過去

  1. Review 過去學習內容

  2. 整理筆記

III. 暑假溫書第三步：準備未來

  1. 預習

  2. 操 DSE Past Paper

IV. 暑假溫書第四步：制定計劃

  1. 暑假目標及具體措施

  2. 安排時間表 / To-do List

 

I. 暑假溫書第一步：保持狀態 🏃

 

都話準備 DSE 嘅過程就好似馬拉松咁，如果學習狀態唔好嘅時候，曬再多嘅精力時間其實都係徒勞。如果喺暑假嘅時候習慣咗「遲睡遲起」，咁去到開學嘅時候會好辛苦，會成日好攰，而且專注唔到，咁學習嘅效率自然就會降低啦！所以，就算係暑假，都要保持作息嘅規律，同埋最好有適當嘅運動！

 

  1. 規律作息 💤

 

唔知大家係咪已經習慣咗夜瞓，第二日瞓到晏晝先醒？然後成日都覺得好攰，提唔起精神專心溫書，而明明知道咁樣唔健康，但係想早瞓嘅時候眼光光反而瞓唔着？

 

咁樣嘅作息已經變得凌亂！由於人嘅生理時鐘會受到「褪黑激素」嘅影響，而佢又同日光有關，所以人應該要隨住日升日落休息，先會符合返自然嘅生理狀態。想變得規律，提高返專注力、心情、學習效率，不妨試下咁樣做：

 

  • 喺固定嘅時間（如11點）瞓上牀，喺固定時間（如7點）起身，瞓足八個鐘

  • 瞓覺之前打開窗簾，等第二日朝早陽光可以照入嚟

  • 喺入睡之前半個鐘熄房燈，唔好睇電子產品（藍光都係光！）

  • 將鬧鐘 / 手機放遠啲，例如放喺廳、櫃裏面、飯臺……

  • 較鬧鐘淨係較一個「必須起牀」嘅時間，一響就起身，每日嚴格執行

 

  1. 適當運動 🤺

 

適當嘅運動有助保持身體素質，精神、耐力、專注力，甚至心情都會有所提升。而做幾多運動其實都係因人而異，最重要嘅係搵到最適合自己嘅運動規律同強度，例如：

 

  • 坐喺度學習咗一段時間之後起身拉下筋、行下、郁下 AND

  • 一個星期做兩至三日有氧運動（e.g.跑步），每次 30 分鐘至 1 小時 OR

  • 每朝起身後做 15-30 分鐘拉伸 / 瑜伽 / 燃脂運動…… OR

  • 週末同朋友或屋企人去行山 / 踩單車……

 

特約分享：暑假同屋企人去外地旅遊？可以考慮用 Car Rental Select 輕鬆查看各旅遊城市車輛供應，獲取最佳超值價格！

 

II. 暑假溫書第二步：總結過去 🧐

 

無論係中四、中五定中六嘅同學，總結返自己過去嘅表現，睇下自己嘅強弱項喺邊、有邊度需要改善都係好重要嘅一步！總結完先可以知道下一步自己可以做咩，可以點樣針對性作出改善，從而更有效率地提升自己成績。所以襯暑假有比較多嘅時間，就可以檢視返過去一年學過嘅嘢，做個總結，然後整理下一啲自己嘅筆記啦！

 

  1. Review 過去學習內容 🔍

 

過去一年，究竟自己學過啲咩？對於學過嘅嘢又有幾熟？有幾多嘢又扔返比老師？喺正式開始溫書之前，不妨做以下嘅步驟，之後先好好地 plan 你嘅暑假溫書計劃：

 

升中五、中六同學

  • 揭返每一科嘅教科書、筆記、測驗、試卷等，略略睇下上個學年自己學過啲咩 Topic 同內容

  • 發現有啲內容已經無咩印象，或者知道自己仲未完全識曬，就用 memo 紙痴上去先

  • 揭完一次一個科目嘅內容，就做個總結，寫低你貼過 memo 嘅大綱（如：中文範文 – 廉頗藺相如列傳、勸學…），咁就好清楚知道自己有咩地方唔熟，之後就可以針對地改善

  • 每一科都 Review 完之後，會得出一大堆自己唔熟 / 唔識嘅項目，呢個時候唔好焦慮住，人無完人，唔係個個都係過目不忘嘅天才，有咁多嘢唔熟係正常嘅，但重要嘅係你點樣看待佢——

  • 所以你要做嘅係，將佢哋分類，排輕重、緩急、優次，咁暑假嘅時候就可以優先計劃補溫返啲特別唔熟 / 對分數影響比較大 / 改善完可以好快提高到分數嘅東西

 

升中四同學

  • 初中嘅數學科、Electives（PHY、CHEM、BIO、ECON、BAFA、GEOG、中史、世史…）教過嘅內容通常都係 DSE 會考到嘅內容，所以對於升中四嘅同學，呢啲科目都可以按照上述嘅方法嚟 review 過往學過嘅內容，鞏固好基礎

 

  1. 整理筆記 📚

 

總結完上面一堆嘢，下一步就係搵出邊啲需要整理筆記。

決定整理咩筆記之前，先問下自己呢啲問題：

 

  • 你有幾多時間？

  • 寫筆記可以點幫到你？

    • 清 concept？

    • 一邊背書一邊寫可以當溫書？

    • 整理自己常錯部分？

    • 整理自己唔明嘅地方？

    • 比較一啲容易混淆嘅重點？

  • 有咩筆記需要寫？

    • 整理科目重點內容

    • 考試技巧

    • 錯題簿

    • 其他

  • 用咩媒介工具寫筆記？

    • 手寫筆記 / 電子筆記？

  • 寫完筆記自己之後會唔會溫返？

  • 自己份筆記對以後考試有無用？或者成爲考試前嘅雞精筆記？

 

P.S. 想知其他關於筆記溫習方法，可以睇返小編其他關於整理筆記嘅文章：

【高中溫書方法全攻略】有咩溫？點樣溫？用咩溫？

【DSE中文】溫習筆記整理技巧

【DSE歷史及中史】溫習筆記整理技巧

 

III. 暑假溫書第三步：準備未來 🔮

 

  1. 預習 📖

 

高中嘅 Syllabus 已經固定，所以其實下學年會教咩內容同學都會知道，而暑假除咗總結返過去嘅內容，更重要嘅係預習嚟緊會教嘅、DSE 會考嘅內容！

 

  • 首先好快咁揭一次每一科嘅教科書，睇下佢裏面嘅 Topic 係關於啲咩

  • 然後嘗試理解每一個 Topic 裏面嘅內容

  • 唔明嘅可以貼住 memo先，咁開學上堂之後老師講到嗰度就可以格外留意，或者到時直接問老師、同學、或補習老師都可以

  • 對於感興趣嘅 Topic 更加可以上網搵資料、解釋，加深印象

 

  1. 操 DSE Past Paper 🔔

 

既然我哋最後嘅目標都係 DSE，咁就當然要令自己熟習 DSE 嘅模式先啦！而做 DSE Past Paper 當然係最好嘅方式，去到臨考 DSE 之前，至少都要做曬 2012 年開始到宜家嘅歷屆 Past Paper，如果做曬㗎話再繼續做 CE/AL 嘅 Past Paper。

 

  • 升中四同學：嘗試搵一兩份 Past Paper 嚟睇下，甚至可以試下做（特別係中英文科）熟悉一下考試模式同裏面嘅題型、答題要求、時間限制等等

  • 升中五同學：中四已經學咗一啲內容，可以就住已學內容 By Topic 咁做 Past Paper

  • 升中六同學：中五嘅時候學校可能已經同同學操過卷，如果未做曬咁多年嘅 Past Paper 的話就做埋佢，另外亦都要總結返自己做卷嘅時候有咩難題，同埋建立返錯題簿，然後再針對性操練！

 

IV. 暑假溫書第四步：制定計劃 📌

 

訂立適合目標，就好似將蘿蔔吊喺隻驢前面一樣，推動自己前進，而自己要做咩、點樣進步都一清二楚。制定暑假計劃嘅時候，可以參考下面嘅三部曲：

 

P.S. 想知道中四、中五、中六有咩需要溫？可以睇返 NoteSity 小編之前嘅分享：【高中溫書方法全攻略】有咩溫？點樣溫？用咩溫？

 

  1. 暑假目標及具體措施 💭

 

小編喺第二步嗰度提到要總結過去，其實就係爲咗根據自己嘅強項弱項、熟習程度等去訂立暑假嘅目標， 例如：

 

e.g. 個人弱項

  • 中文卷一：範文唔熟、文言文較差

  • 中文卷二：取材及結構問題

  • 英文卷一：唔識答長題目

  • 英文卷二：作文用嘅 vocab 太簡單

  • 數學卷一：Mensuration（求積法）題目較弱

  • 數學卷二：MC 速度慢

 

⇩ ⇩ ⇩ ⇩

 

e.g. 暑假目標

  • 提升中文卷一範文分數

  • 提升睇文言文嘅能力

  • 研究點樣答英文卷一長題目

  • 提升英文作文能力

  • 加快數學 MC 題速度

 

⇩ ⇩ ⇩ ⇩

 

e.g. 具體措施

  • 中文卷一：寫筆記溫範文、做文言文練習 mark 返常見詞義

  • 中文卷二：睇其他人嘅佳作、搵題目 brainstorm 取材

  • 英文卷一：研究 marking shceme、溫補習社技巧筆記、操卷

  • 英文卷二：睇其他人嘅佳作、背同義詞、常用 phrases / idoms

  • 數學卷一：By Topic 操卷，先做歷年 Mensuration（求積法）題目

  • 數學卷二：操 MC

 

  1. 安排時間表 / To-do List ✅

 

  • 每日有固定嘅學習時間 / 時數，適當調整，唔需要太chur

  • 記得將做暑期作業、休息時間、出街等時間都 Plan入去，時間表時間亦可以鬆動啲，提高靈活性，避免臨時變動破壞自己學習動力

  • 星期日 Plan 定下個星期嘅時間表

  • 可配合大腦嘅活躍時間（效果因人而異，不妨自己試驗自己一日最高效時期！）：

    • 6:00am – 8:00am：大腦最佳記憶期

    • 8:00am – 9:00am：大腦記憶力、思考能力活躍期，可以安排難度較大嘅任務

    • 3:00pm – 4:00pm：呢個時期長期記憶效果較好，可以安排需要長期記憶嘅任務

    • 5:00pm – 6:00pm：體力、耐力高峯期，可以安排比較消耗腦力、比較複雜嘅任務

    • 8:00pm – 9:00pm：記憶力活躍期

 

❗ 記得制定計劃嘅時候千祈唔好好高騖遠，制定自己負荷唔到嘅計劃！唔係㗎話會適得其反，反而陷入一種完成唔到任務嘅焦慮不安。每個人嘅能力、起點、目標都唔一樣，所以最重要都係要制定返適合自己、配合返自己嘅生活規律、學習規律嘅計劃表。

 

暑假溫書時間表範例：

 

 

「種一棵樹最好的時間是10 年前， 其次是現在！」以前嘅成績係用嚟吸取經驗嘅，而唔係用嚟否定自己嘅，小編相信每一位同學仔都有好大潛力！💪

 

未來，係由宜家嘅每一個行動所創造，所以首先要做嘅就係腳踏實地一步一腳印咁完成計劃。所以從宜家開始坐言起行，同 NoteSity 小編一齊訂立你嘅訂立暑假溫書大計，喺暑假急起直追、超越自己，準備好自己應戰 DSE！🔥🔥🔥

 

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類