😵 教科書、參考書、學校 Notes、補習 Notes……DSE 會用到好多唔同嘅資料，呢度一啲嗰度一啲，雜亂無章咁，點算好？

 

有時學完嘢上完堂，如果無咗一個自己整理梳理嘅過程，除咗會影響學習效率之外，亦好容易唔記得曬啲重點，所以整理筆記就非常重要，考試前要溫返都容易啲啦！特別係中文科需要不斷累積佳詞佳句或例子，有時又會需要用到好多答題技巧，咁多個卷別，可以點樣整理呢？

 

NoteSity 小編而家就分享一啲實用嘅中文科筆記整理技巧，希望可以幫到你哋啦！

 

目錄：

1.  筆記整理小 Tips

      a.  用邊種筆記簿？

      b. 幾時開始整理中文筆記？

      c.  善用顏色

2.  卷一筆記整理技巧

      a.  白話文筆記

      b.  文言文、範文筆記

3.  卷二作文筆記整理技巧

 

  1. 筆記整理小 Tips

 

           a. 用邊種筆記簿？

 

市面上嘅筆記簿琳琅滿目，點樣搵到最適合自己嘅簿呢？小編喺高中嘅時候用過各種類型嘅筆記簿，雖然各有千秋，但係最推薦嘅都係活頁簿！

 

  • 優點

    • 靈活度高，方便隨時加減筆記內容、便於分類

    • 適合完美主義者/手殘黨，寫錯嘢可以直接用第二張紙寫

    • 一本簿就可以容納全科筆記

    • 可以因應唔同科目，用唔同款式嘅紙，例如寫字大粒嘅就可以用8mm 橫線；寫字細粒嘅就用 6mm 橫線；需要畫表畫圖就加格仔紙 / 點線紙

    • 如果淨係需要用到其中一部分嘅筆記（特別係考試），可以另外抽起，方便攜帶

  • 缺點

    • 價錢相對高（需要購買簿殼、內頁）

 

          b.  幾時開始整理中文筆記？

 

所有科目嘅筆記都需要及早累積，形成一個知識系統，到咗 study leave 嘅時候就可以更方便同專心操卷同複習啦！從中四開始，已經可以從學校工作紙、學校筆記、教科書、坊間參考書、補習筆記之中抽絲剝繭，提煉最精華嘅部分，整合成一本全能筆記！

 

有系統嘅筆記內容方向可以分爲——

 

  • 考試導向：即係考試前可以淨係拎住嗰本嚟溫嘅；包括課文重點、必背內容、答題技巧等
  • 補充導向：作爲課外嘅補充，以提高表現；包括佳詞佳句、古今中外例子等

 

如果做好時間管理，每個禮拜抽部分時間整理，整理嘅時候又可以加強記憶，積少成多，考試嘅時候都無咁辛苦！

 

          c.  善用顏色

        

寫筆記咁悶，當然要用下唔同顏色啦，點樣可以將熒光筆、彩色筆等發揮佢最大嘅用處？

 

  • ​不超過三種顏色：

有啲同學可能鐘意用好多顏色標記重點，但係咁樣除咗容易令人審美疲勞之外，仲會顯得混亂，容易令人忽略重點。所以小編建議大家可以參考「一版裏面唔超過三種顏色」嘅原則，睇落去會更爲舒適㗎！

 

除咗用比較正經嘅「黑、紅、藍」三隻色之外，同學都可以試下自行配搭鐘意嘅顏色組合。例如小編就好鐘意用「粉藍、粉紅、粉紫」、「淺黃、淺橘」嘅配搭，睇落去會有種治癒感！

 

  • 固定顏色用途：

 

喺整理筆記之前，可以先決定每一隻顏色嘅用途，例如：標題用藍筆、普通內容用黑筆、重點內容用紅筆；唔同嘅標題又可以用唔同顏色嘅熒光筆……咁樣可以令筆記既整齊美觀，溫習嗰陣又可以一目了然。

        

  1. 卷一白話、文言、範文筆記整理技巧

 

           a.  白話文筆記

 

白話文筆記可以集中記錄答題技巧、百搭答案等考試導向嘅內容，例如：

 

  • 各修辭手法作用
  • 各寫作手法作用
  • 文章結構作用
  • 總結分段方法
  • ……

 

          b.  文言文、範文筆記

 

  • 範文筆記主要內容：

    • 主旨、段落大意、全文論點（議論文）

    • 寫作手法（不同論證手法、說理手法、寫景手法……）

    • 修辭手法（對比、比喻、襯托……）

    • 文章結構（前後呼應、點題、層層遞進……）

 

  • 語譯詞解庫

    • 寫上每篇範文嘅語譯，方便一次過溫習

    • 有時做完文言文練習，遇到唔識嘅字詞或錯咗嘅答案，都可以記低，加深印象，提高文言文能力

 

  • 問答庫

有時就算溫範溫到好熟，一遇到啲問題就會唔知點答，或者攞唔到分，所以平時都可以儲定一啲自己覺得較難 / 有挑戰性嘅題目，建立自己嘅問題庫，DSE 考範文嗰陣自然可以減少失分！

 

  1. 卷二作文筆記整理技巧

 

  • 佳詞佳句庫

想提升作文文筆，最有效嘅方法就係模仿，儲完嘅佳詞佳句總會喺作文運用到，但係用佳句嘅時候記得唔好直接抄，而要識得自己化用。

收集佳詞佳句方法：

 

  • 取材庫

好多同學總會爲作文取材發愁，一係就容易唸出啲陳腔濫調嘅故事，所以就要累積一定嘅素材，考試就唔使咁驚啦！

收集取材方法：

  • 每次作完文，都可以寫低自己寫過嘅好題材
  • 名家散文取材（如張曉風、龍應臺等）
  • 考評局示例
  • 同學佳作
  • 平時練作文可以從唔同角度 brainstorm

 

  • 例子庫

平日可多留意可用於卷二議論文的中、外、古、今的人物、事例、語例、新聞、社會現象等，除了可以記錄自己曾經使用過的例子，亦可多看考評局事例、同學範文等，累積百搭的事例。

 

其實點樣整理都係因人而異，最重要嘅係自己溫得舒服。而且有啲同學如果唔需要筆記都可以溫到，都唔一定要寫筆記嫁！以上就係 NoteSity 小編分享嘅一啲 5** 中文筆記整理技巧，希望可以幫到大家應考 DSE 啦！！

 

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類