迷惘的同學A 🤔:就嚟 JUPAS 選科啦,我真係唔知揀咩好…… 

迷惘的同學B 🙀:就咁睇 Social Sciences 社會科學呢一科個名,我都唔知系讀乜…… 

小編 😗:唔緊要,小編就係讀 HKU Social Sciences 嘅!今日小編就同大家講下社會科學系 (Social Sciences) 嘅入學要求及注意事項、讀啲咩,同埋分享下呢一科既出路,畢咗業之後到底可以做咩? 

 

一、入學要求 👨🏼‍💻

香港大學社會科學系嘅 JUPAS Code 係 JS6717 Bachelor of Social Sciences (社會科學學士)。同學想入讀呢一科嘅話,必須係 DSE 達到「3 3 2 達標 3 3」嘅分數,即係同學最少要讀兩個選修科呀!根據香港大學最新嘅數據,2023年入讀呢一科嘅中位數係 best 5 26分,如果同學預計自己高過呢個分數,就有好大機會成功入讀喇。呢一科係冇面試嘅要求嘅,所以同學就唔使等面試通知。 

 

二、有咩可以讀? 📩

其實呢一科係大類收生,即係同學如果對呢一科任何選修科有興趣嘅話,可以喺入學嘅第一年修讀唔同嘅選修科,例如心理學、社會學等等,睇下自己對於邊一個選修有較大嘅興趣,喺第二年就可以選擇唔同嘅選修科。除咗同學嘅第一主修科一定要喺社會科學系入面之外,其餘嘅選修可以係其他學科。例如小編有朋友第一選修科係政治學,第二選修科系西班牙文,學校都可以接受,因為香港大學的選科系統比較自由,所以同學可以自己組合有興趣的學科。 

 

可以選擇的第一主修科 (也可以作第二主修科/副修科): 

  • 中國研究 
  • 地理學 
  • 政治及公共行政 
  • 心理學  
  • 社會政策及社會發展 
  • 社會學 

 

可以選擇的第二主修科/副修科: 

  • 認知科學 
  • 輔導學 
  • 犯罪學 
  • 媒體及文化研究 
  • 神經科學 
  • 城市管治 
  • 人力資源管理 
  • 新聞及媒體研究 

 

三、畢業要求 🧑🏼‍🎓

大家要讀至少 240 個 credits 先可以成功畢業。由於港大大部份科目都只係 6 credits,所以 240 credits 大約是40科,即是同學一年大約要讀10科。不過,大學嘅時間表多數都好彈性,同學可以自由編排每年、每個 semester 讀幾多科。同學喺選擇選修科的時候,可以去港大社會科學學系嘅網站,睇下佢哋嘅課程結構,記得睇清楚完成選修科嘅要求呀!

 

如果同學想選修另一個學系嘅科目,就要去嗰個學系嘅網站,睇下佢哋嘅課程結構喇!不過,如果同學唔係好清楚要選修咩科嘅話,其實喺入讀嘅時候,學系會派一份資料畀你哋,入邊有齊曬同學要選修科目嘅資料,大家記得細心閱讀~ 假設小編想主修心理學同日文,小編就要同時滿足兩個選修科嘅畢業要求。 

 

除咗讀書之外,社會科學學系有一樣就讀學生都會覺得比較複雜嘅嘢,就係 Social innovation (12 credits) + Global Citizenship(12 credits)! –– 社會科學學系嘅學生必須同時滿足呢兩個畢業要求,先可以成功畢業架! Social innovation(社會創新)需要同學去做實習,同學可以選擇喺學期之內或者暑假嘅時候喺香港完成實習,又或者喺暑假嘅時候到外地做實習都可以。 而 Global Citizenship(世界公民意識)就有唔同嘅選擇,例如同學可以選擇去交流,或者做研究實習之類,詳情可以參考社會科學學系嘅網站,每一年都可能有唔同嘅計劃,可以畀同學參加去滿足呢個畢業要求,例如小編要去外國實習嗰年,就因為疫情而取消咗,所以小編只可以留喺香港以網上學習嘅形式,到外國嘅大學做交流,以滿足呢個畢業要求。呢個畢業要求可能比較複雜,小編建議大家預早安排,以面對不同嘅情況出現而影響計劃呀!

 

 

圖片來源:香港大學社會科學系網站 

 

四、除咗讀書之外,仲有咩可以做? 🚴🏼

同學如果對大學五件事有興趣嘅話,都可以參考呢一篇文章:【大學五件事】大學生活的理想與現實。如果針對社會科學學系嘅學生嘅話,我哋多數喺暑假都會出去做實習,例如去非牟利機構度做實習,帶領小朋友參加活動,又或者出去幫助一啲有需要嘅人,探索自己未來就業嘅興趣。

 

五、升學就業 👋🏻

可能好多人都會覺得社會科學系一科「冇乜出路」或者係「乞食」嘅學科,但小編覺得只要大家喺大學四年之中,好好探索自己嘅興趣及專長,就可以為自己好好規劃未來,以下小編會分享身邊嘅畢業生會做啲咩。😜

 

升學: 

  • 有關社會科學的學系:社會工作學碩士 (MSW)、輔導學碩士、臨床心理學碩士等等。 
  • 有關教育:學位教師教育文憑課程 (PGDE) 等等。 
  • 其他科目:法律、電腦等等。 

 

就業:  

  • 政府公務員 
  • 議員助理 
  • 社福機構 
  • 保險業等等 

 

所以其實好多同學都喺大學四年之中,探索到自己嘅興趣同埋專長,未必一定從事有關社會科學嘅工作或者專業架!😆 

 

六、入讀之前嘅暑假可以準備d咩? 😼

相信大家一定對未來四年嘅大學生活感到十分興奮,如果大家想為入讀好好準備嘅話,大家可以仔細查看學系嘅課程資料以及課程結構,探索一下自己對於咩課程有興趣。而且社會科學學系好多課程都要寫論文,大家可以打好英文基礎,唔係嘅話入到嚟可能會有啲辛苦,小編身邊好多朋友都指話文係港大真係好緊要!

 

今次嘅分享就到呢度喇〜 希望可以幫到各位同學更加了解 Social Sciences 呢一科!💛

 

🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁呀!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~ 

💭 咩係 NoteSity?NoteSity 是全港最大的學生資訊及優惠平台,為大家搜羅全港優惠及學習資訊。由讀書考試、升學、飲食娛樂至電子產品,滿足學生的日常生活所有需要!

📚 網上購買 DSE 溫習筆記、補充練習與參考書:熱門產品 | 優惠套裝 | 產品分類