「中大社會科學究竟係讀啲咩㗎？」、「Social Science 同社工、Sociology 有咩分別？」、「我應該揀大類收生定直入 major？」😵💫
唔少同學見到 CUHK Social Science 呢個課程都搲晒頭，對呢個 programme 有咩讀，點運作等等都一頭霧水🤯 甚至同少人都以為讀 Soc Sci = 將來做社工🫣
今日就等 NoteSity 小編同大家介紹吓 JS4801 Social Science 社會科學究竟有咩特別、點樣入學、將來嘅出路，同埋一啲常見問題啦！
文章目錄
一、CU Social Science 課程介紹
二、JUPAS 入學要求及收生情況
三、社會科學出路
四、關於 CU Social Science 嘅常見問題
五、附：CUHK Social Science 學院網頁連結
一、CU Social Science 課程簡介
1. Social Science broad-based 係咩嚟？😮
JS4801 Social Science 社會科學 — 喺中文大學多數會叫做社會科學（大類收生），英文係 Social Science (broad-based admission)，簡稱社科 / Soc Sci broad-based。
比起話係一個課程，Soc Sci broad-based 會比較適合叫做「收生線」🛣
同學會首先進入社會科學系，然後喺 year 1 尾先至申報自己嘅主修科 (major)💡
圖片來源：中大社會科學大類收生網頁
中大稱呢種收生方法為「雙軌收生模式」。
如果同學對社會科學院嘅其中一科非常感興趣，可以直入嗰個主修課程 🙋🏻 相反，未諗定嘅同學就可以經大類收生入學，先體驗吓唔同嘅科目，然後喺升 year 2 之前再揀定自己嘅主修科目🤓
簡單啲嚟講，讀 Soc Sci broad-based 即係將「揀主修」由排 JUPAS 嗰刻要決定，延遲到去 year 1 試讀完先再揀！
2. Soc Sci broad-based 有咩讀？
正如上面幅圖咁標示，中大嘅社會科學院一共有13個主修科目。
經社會科學（大類收生）入學嘅話，喺 year 1 尾可以揀讀建築學、經濟學、地理與資源管理學、城市研究、政治與行政學、新聞與傳播學、心理學，或者社會學呢八科嘅任何一科！🌈
（下面將會統稱可以經大類收生入學嘅主修科目為「八科」）
***「政治與行政學」有機會喺2023/24學年同「全球𤣿究」&「數據科學與政策研究」合併，詳情需要留意最新安排。
喺入學第一年，同學可以試讀社會科學院嘅任何科目，包括「八科」以外嘅科目。萬一同學試讀完對「八科」以外嘅主修科目好有興趣，都可以跟一般轉主修嘅途徑 trans major。
二、JUPAS 入學要求及收生情況
1. 入學要求 📋
CU Social Science 收分方面，想報讀 Soc Sci broad-based 嘅同學需要喺 DSE 考獲 「3 3 2 達標 3 3」嘅成績。
計分方法係以 best 5 計算。計分會用文憑試擇優分數計算，即係 Level 5 = 5.5 分，5* = 7 分，5** = 8.5 分。英文科嘅比重亦比較高（乘1.3），其餘科目都係乘 1。
2. 收生情況 🗂
2023年 入學嘅收生分數中位數係26.15分（加乘後）。
Soc Sci broad-based 一直都係中大非常搶手嘅課程，近幾年一直都係中大 JUPAS 頭五個最多人報讀嘅科，超額比例亦都一直係最高（2022/23年度嘅超額比例係 19 倍！），競爭都幾激烈！
以往全部成功入讀嘅同學，都將呢個課程放喺Band A，想入社科嘅同學留意啦！
3. 面試 🧑🏻🏫
CUHK Social Science 一般嚟講都冇面試！
官網有提到，課程可能會邀請個別非在校申請人，同埋參與特別計劃嘅申請人參加面試👀 不過小編讀咗幾年，都仲未遇到有同學要面試～
三、社會科學出路
正如上面提到，CUHK Social Science broad-based 只係一條收生線。
Year 1 之後同學都會有各自嘅 major，加上中大社科涵蓋嘅主修都幾多樣化，所以未來嘅出路就好取決於你最後嘅 major！🧑🏻💻👩🏻💼🧑🏻🎓
例如讀建築學、城市研究嘅同學，多數會做返佢哋專業嘅工作，經濟學比較多係投身工商或金融行業，地理與資源學大部分會係教育、工商界等等，唔同科目嘅出路亦都好唔同，同學有興趣可以去各個課程網頁睇睇！（下面會有 Link）
四、關於 CU Social Science 嘅常見問題
1. 有冇規定 year 1 要讀幾多科？🤔
答：冇！通常大家會讀 3-4 科，但係你想讀更多都得！
但係要留意返，每個學期可以讀 18 個 credits，一科多數都係 3 個 credits。扣除 year 1 要讀嘅 courses:
- 大學中文 / 英文（3-4 credits）
- 書院通識（1-2 credits）
- 體育（1 credit）
- IT（1 credit）
淨低嘅 credits 就係由你計劃，大概都有 3-4 個 course 嘅空間俾同學去揀嘢讀～
小編都有認識一啲師兄師姐係揀咗 6 科嘅 course 嚟讀！所以係好自由㗎～👐🏻
2. 之後揀 major 有冇成績嘅要求？我會唔會唔夠高 GPA 入自己想讀嘅科？😣
答：基本上一定入到自己想讀嘅科！
除咗揀建築學嘅 GPA 要過 2.8 + 修讀 ARCH1001並攞到 B 或以上，其他嘅科目都冇門檻！
而且亦都冇 quota，所以係保證同學會入到自己心儀嘅 major 喇😆
（雖然話揀建築學有門檻，但係其實 year 1 嘅 GPA 好難會低過 2.8，萬一真係低過都可以參加面試嚟試吓入～）
3. 我經 broad-based 入八科，會唔會比直入 major 嘅同學進度慢？🤨
答：一般都唔會！
讀中大有一樣嘢叫 Faculty Package，係所有同學（包括 broad-based 同埋直入 major 嘅同學）都要完成嘅畢業要求。
唔少同學都會喺 Year 1 讀咗 Faculty Package 先。
💭 咁 Faculty Package 係咩嚟？
其實係中大為咗同學可以接觸多啲唔同科目嘅知識，同學要修讀 3 個自己 faculty 唔同科目嘅入門 course，當中要包括自己主修嘅課程。
例如主修心理學嘅同學，要讀心理學＋其他任何 2 科 （e.g. 社會學＋城市研究）嘅 Faculty Package。
大類收生入學嘅同學，亦都係喺 year 1 讀呢啲 Faculty Package，只不過係讀完 Faculty Package 先揀自己嘅主修。
所以其實大家嘅進度喺 year 1 唔會有好大分別～
（如果喺 Year 1 冇讀到自己之後 major 嘅 Faculty Package 都唔緊要，喺 year 2 讀返就可以～）
4. 咁直入 major 同經 Social Science broad-based 入有咩分別？🧐
答：最主要嘅分別係要 reg 科（報讀課程）嘅時候。
有啲課程係會預先分配 (pre-assign) 俾主修嘅同學，即係佢哋唔使自己 reg，確保佢哋一定讀到；而社科嘅同學就要自己 reg （＝要自己同其他人爭）。
有小部份嘅 course 都係只會喺某一個學期開放俾非主修嘅同學 reg~
另一個分別可能就係會識唔同人。經社科入學嘅同學可能會比較遲認識自己 major 嘅同學，所以都要花少少時間，同埋主動啲去認識其他同學！不過好處就係你會認識到唔同學系嘅朋友～👯
五、附：CUHK Social Science 學院網頁連結
社會科學院社會科學大類收生網頁：http://sscbroadbased.cuhk.edu.hk/zh/introduction/choosing_broadbased
社會科學院各學系、學院、跨學科課程：http://socsc.cuhk.edu.hk/tc/faculty/departments-and-schools-interdisciplinary-programmes/
希望大家會對中大社科有更多了解，知道除咗直入唔同主修科目，都有經大類收生呢條路，俾自己試過讀過先！祝大家放榜一切順利，入到自己有興趣嘅科目！🉐
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 網上購買 DSE 溫習筆記、補充練習與參考書：熱門產品 | 優惠套裝 | 產品分類
