歐化中文，可避則避？
開始呢篇文章之前，不如一齊睇吓下面嘅例句先：😃
「家朗是一個小五學生。今天常識課，他進行關於全球化的匯報，表現出色，被老師稱讚。」
唔知同學有冇留意到呢句句子有咩問題呢？其實呢句裏面有唔少都係歐化中文。咩叫歐化中文？歐化中文又叫做西化中文，係指語法、文筆、風格或用詞，受英文或其他印歐語系文法影響，寫咗做不合傳統中文語法嘅句子😣。跟住落嚟，小編會為同學一一拆解文首嘅句子犯咗邊啲歐化中文嘅毛病。
一、濫用數量詞
其實喺中文語法入面，好多時都可以省略數量詞。好似例句開頭嘅「家朗是一個小五學生」，其實寫成「家朗是小五學生」就可以。點解會有咁嘅問題？可能係受到英文影響，不自覺咁加咗數量詞。英文嘅話，‘Edgar is a Primary Five student.’ 一定要加上 'a' 呢個冠詞（article）先符合英文文法。同學寫作嘅時候，用咗英文嘅邏輯思考，寫出嚟嘅中文就有可能比較歐化，文句夾雜一啲不必要嘅冗詞。
再講吖，中文嘅數量可以靠上下文或者常識推斷，好似呢句咁：
「家朗去看醫生。醫生說家朗得了感冒，回家須準時吃藥、多喝水、多休息。」
雖然句子冇表明，但憑下文推斷，我哋知道家朗睇嘅係一位醫生️，所以就唔需要喺句子入面特登寫明「家朗去看一位醫生」，咁樣句子讀落亦更加簡潔。
二、弱化動詞
有時候，有啲詞語明明係動詞，但同學可能當咗名詞咁用，再幫名詞化嘅動詞配上動詞。好似例句嘅第三句分句咁，「他進行關於全球化的匯報」，「匯報」本身係動詞，但呢度就變咗名詞咁用，令到句子複雜咗。既然「匯報」本身可以做動詞，咁將句子寫成「他就全球化議題匯報」，讀者都會明白句子嘅意思。
一般而言，英文傾向多用名詞，中文就多用動詞。好似例句咁，如果係英文，可能會講 ‘Edgar made a presentation about globalisation.’ 'Presentation' 會當係名詞咁用；但中文就可以講「家朗就全球化議題匯報」。
再舉多句例子：「他成績的退步令他下學期必須努力追回成績💪🏻。」呢句入面嘅「退步」本身可以用作動詞，其實就冇需要將佢變成「……的」嘅名詞結構，直接寫成「他成績退步，下學期必須努力追回成績。」就可以。下次寫作嘅時候，尤其係去到校閱嘅階段，不妨留意自己用嘅詞語係咪動詞。如果係動詞，而你又當咗名詞咁用，就可以諗吓點樣用返動詞結構表達。
三、濫用被動句
另一點中英文好唔同嘅地方，就係中文少用被動句，多用主動句。而且，被動句常用嘅「被」字，喺中文其實帶有負面意思。例句最尾一句分句「被老師稱讚」，明明「稱讚」係正面嘅行為，但用咗「被」字，意思會變得比較負面，讀起嚟略嫌奇怪。其實中文有好多其他字表達被動語態，例如比較正面嘅「獲」、「蒙」，中性嘅「給」、「受」，負面嘅「遭」。如果真係要用被動句，就要諗多一步，睇吓句子本身嘅語氣係正面定負面，再選取合適嘅詞語。好似例句咁，就可以改寫做「獲老師稱讚」。
值得一提嘅係，英文有時用被動句，係有意隱去主語。例如下面句子咁：
‘Firemen walk out from the building after the fire is put out.’
即使句子冇提及到，我哋都好清楚火係由消防員撲滅嘅。中文慣常用主動句表達，寫成「消防員撲滅火種後，離開大廈。」有啲時候，亦可以用主動句，表達被動嘅語氣，例如「火撲滅後，消防員離開大廈。」呢度望落雖然好似主動句，但其實火係畀消防員撲滅，只係表達比較靈活。當然同學亦都可以用被動句，寫做「火給消防員撲滅後，消防員離開大廈。」雖然話就話中文比較常用主動句，但唔代表其餘兩種寫法比較遜色，同學只要揀自己鍾意嘅寫法就可以。
四、代詞
例一：英國最危險城市民調結果出爐，威爾斯地區首府卡迪夫高居榜首。民調結果指出，居民稱當地暴力犯罪猖獗，高達38%的受訪者說，他們晚上在街頭行走感到危險。但高達31%的民眾說，他們連在白天都擔心自身安危。
呢一段取自網絡嘅文章，入面嘅代詞「他們」其實係可以省略嘅。今時今日，中文嘅第三人稱代詞有好多種，他指男性👦🏻，她指女性👧🏻，牠指動物🐱，它指死物🤖，祂指神明👼🏻。但中文一開始淨係得「他」一個代詞，既可指眾數，亦可指男性或女性，女性「她」都係五四運動期間先發明嘅。咁點解中文會用多咗代詞？用多咗代詞，又有咩問題？🤔
中文會用多咗代詞，好可能係受英文影響。英文好常會用代詞，有時係為咗避免重複主語，有時係語法上需要。好似例一咁，用英文表達「高達38%的受訪者說，他們晚上在街頭行走感到危險」，可以話 'As high as 38% of the respondents said they sense danger on night-time streets.'，入面嘅 'they' 係唔可以省略嘅。相反，中文好少用人稱代詞，更多時候會重複名詞，或者直接省略稱謂。睇吓例二：
例二：母親說，過幾天給姊姊買新圖書。姊姊不依，她硬要今天看，鬧著鬧著竟哭了起來😭。
細心睇，呢度嘅代詞當然係指「姊姊」，但有啲時候，代詞同指代嘅事物相隔太遠，讀者未必可以睇第一次就知個代詞講緊乜，有時甚至會誤會咗代詞指代嘅事物添！就好似下面例三咁：
例三：海恩耳朵變紅了。她似乎發現自己臉色變了，趕緊轉頭過去，假裝望着窗外景色。倩玉並不覺得沒錢買新手機有什麼好丟臉的，不管怎樣，一個月前，她自己同樣也是當了一輩子的窮光蛋💸。
呢度兩個「她」指緊唔同嘅人物，第一個她指「海恩」，第二個就係「倩玉」。睇嘅時候唔為意，可能就會理解錯咗，將第二個「她」當咗係海恩都唔出奇。原因正正係中文代詞嘅照應關係冇英文咁清楚，所以比起用代詞，直接重複主語，或者直接省略代詞，都會清楚易明得多。
五、連詞
英文慣常用連詞連接句子，中文就會透過詞序表達句意，詞語、句子之間，都唔一定要用連詞。唔知同學有冇聽過開門七件事呢？開門七件事，就係柴、米、油、鹽、醬、醋、茶。但同學應該唔會聽過有人會講：「柴、米、油、鹽、醬、醋，以及茶」。用標點符號，有時已經可以清楚表達並列關係，加咗連詞，反而會顯得有啲不倫不類😣 所以同學千祈唔好受咗英文影響，以為連詞喺中文都係必需㗎。😤
再講吖，英文每個連詞可能只有一個作用，但中文唔同，一個連詞嘅用途都好多元化。驟眼睇，「和、而、跟、與、及、同」呢幾個連詞好似都係 'and' 嘅意思，但佢哋嘅意思、用法其實都有微妙嘅分別。呢一部分，小編想大家講吓「而」同埋「及」呢兩個常用嘅連詞。
1. 而
「而」除咗英文 'and' 嘅意思，其實仲可以表示轉折嘅關係，好似例四咁：
例四：他做事小心，慢而可靠。
呢度嘅「而」係「但是」嘅意思，意思係話佢做嘢雖然慢，但係可靠。
除咗轉折，「而」有時有更進一步嘅意思。好似中學讀文言文一定聽過嘅「學而時習之，不亦樂乎」，「而」字有語義承接嘅作用，「時常複習」比起「學習」嘅層次高啲，語氣都強啲。所以成句可以咁理解：「讀書，再加上經常複習，唔係好開心咩？」🤗
2. 及
同學平時寫作閱讀可能冇留意到，但「及」字其實係唔可以用喺動詞結構入面。即係咩意思？睇吓例五啦：
例五：專心上課及認真複習，是取得好成績的關鍵✍🏻。
呢度「上課」同「複習」都係動詞，所以呢句唔可以用「及」字，用「和」字反而比較好。下次寫文章嘅時候，記得唔好用錯喇！🙅🏻♀️🙅🏻♂️
六、介詞
英文語境通常都離唔開介詞。介詞嘅用途相當多元，例如不及物動詞（intransitive verb）加上介詞，就可以變成及物動詞（transitive verb）。好似下面例六同例七咁：
例六：'The baby is crying (不及物動詞).'
例七：'The child is crying (不及物動詞) out for (介詞) help (受詞).'
但係中文唔同英文，介詞好多時都唔係必要嘅句子成份，又睇吓例八：
例八：關於他的申請，你看過了沒有？
唔加「關於」，成句變咗「他的申請，你看過了沒有？」，其實都無傷大雅，甚至可以話句子更加簡潔同通順。✨
另一個同學成日濫用嘅介詞係「由於」。英文好注重句子之間嘅邏輯關係，會用介詞交代子句的因果關係（例九）：
例九：'Since his family is poor, he has to withdraw from school🏫.'
呢句冇咗介詞 'since'，雖然文法上冇錯，但就唔太地道，子句嘅連接亦冇咁緊密。同一句直譯做中文，可能會變咗例十咁：
例十：由於他家境貧窮，他只好休學。
不過，中文好多時已經內化咗子句之間嘅因果關係，唔需要用介詞表達出嚟。更加地道嘅表達應該係好似例十一咁：
例十一：他家境貧窮，只好休學。
唔用介詞，既無損文意，文字都乾淨啲。讀者睇嘅時候，亦唔難理解到前半句係「原因」，後半句係「結果」。
七、良性歐化
上文討論咗好多，都係歐化中文嘅問題。咁係咪代表歐化中文百害而無一利呢？咁又唔係，文學大師余光中教授喺〈剪掉散文的辮子〉呢篇文章講到，「現代散文當然以現代人的口語為節奏的基礎。但是，只要不是洋學者生澀的翻譯腔，它可以斟酌採用一些歐化的句法，使句法活潑些，新穎些……。」所以話，只要用得其所，歐化中文其實都可以令中文表達更靈活多變。
睇返例句入面嘅「全球化」一詞，其實都係譯自英文嘅 'globalisation'，而且中文確實又冇其他地道嘅表達方法。又好似「綠化」呢個詞語咁，其實有「栽種植物嚟改善環境」嘅意思，短短兩個字，承載嘅信息量已經好多。雖然呢啲詞語無疑係歐化嘅表達，但喺討論相關議題嘅時候，又不失為簡潔嘅表達方法。
當然啦，好多歐化中文其實都冇必要。文首嘅例句，即使唔用歐化中文，用返中文固有嘅表達方法，一樣可以表達到同樣意思：
「家朗是小五學生。今天常識課，他就全球化議題匯報，表現出色，獲老師稱讚。」
改寫之後，呢句句子係咪更加易讀簡潔，又唔會扭曲咗原本嘅意思呢？既然中文有慣常嘅用法，又何樂而不用呢？😉
八、小結
英文為咗要符合文法，好多時都要用適當嘅代詞、連詞或者介詞。但中文就冇語法嘅限制。同學會犯歐化嘅毛病，好多時都係因為畫蛇添足🐍 加咗冇必要嘅句子成份。寫文章嘅時候，要避免歐化中文，不妨諗吓句子入面嘅代詞、連詞或者介詞有冇得省略。省略不必要嘅成份，文章自然通順、簡潔得多～😉
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 網上購買 DSE 溫習筆記、補充練習與參考書：熱門產品 | 優惠套裝 | 產品分類
