DSE中文閱讀卷入面,有一部分係考同學對12篇指定範文嘅認識。好多同學可能對於點溫習範文無從入手。雖然範文部分只係佔卷一嘅30%,但只有呢部分係可以預知到出題嘅範圍,絕對係拎分嘅好機會。以下 NoteSity 小編將會分享溫習範文嘅方法,希望可以幫到你地!💛🤩

 

1. 先將範文分門別類

每一篇範文嘅文體都不盡相同,如果先將十二篇範文歸納好,就可以幫你提升溫習效率。💡而主要嚟講,呢十二篇範文可以分做四類:

  • 人物描寫
  • 詩詞
  • 遊記議論

知道左範文嘅文體類別之後,可以令你更加了解咁多篇範文嘅重點,有明確方向去溫習。例如:

  • 遊記有《岳陽樓記》同《始得西山宴遊記》➡️ 重點溫作者所寫景色同抒發左咩情感。
  • 比較一下同類型範文嘅異同:《師説》同《勸學》呢兩篇都係有關學習,咁韓愈同荀子喺學習方式、態度兩方面分別有咩睇法❓💭

同學分好類之後,就可以聯想下啲文章嘅關聯性,咁就理解得透徹啲,答題目嗰陣更加得心應手。👍🏻

 

2. 要背啲咩?🧐

小編建議同學要背唒咁多篇範文,因為考試嘅時候會叫你摘錄原文,而有啲問題嘅答案亦比較直接,只係將原文翻譯做白話文,例如問作者喺西山見到嘅景色有咩特別之處。

如果有背到書,呢啲分數就可以十拿九穩。🤩

當然小編都明白要背唒咁多篇範文係有一定嘅難度,尤其全部都係文言文。

 

不過… 12篇範文咁多,可以點記?

💛對照住原文同譯文
呢步可以幫你理解翻篇範文嘅內容大意,亦都可以幫你認得特殊嘅文言虛詞。當你知道篇文章嘅脈絡,就好自然會記得啲文言句子嘅次序。好多同學仔可能會囫圇吞棗咁背,但如果唔理解嗰故事,咁樣只係記緊一大堆毫無意義嘅外星文👽。

💛背默
相信日校老師都會同你地默一次範文。其實背默呢個最原始嘅方法好有效,唔單止可以測試你背得熟唔熟,仲可以睇下你識唔識寫啲字。小編覺得同學可以循序漸進去默,分幾段為一部份咁默一次先,最後先再一次過成篇文章咁默。

💛聲音記憶🔔
轉換背文嘅方式——讀範文:

有研究話聽覺記憶,比就咁一直望住篇文章嘅視覺記憶,更能夠留下深刻印象,溫習效果亦比較好,就好似我地平時聽完一首流行歌,都會不自覺地識得唱。

文言文讀起上嚟都瑯瑯上口,《論仁、論孝、論君子》同埋詩詞三首啲句子都有押韻,可以當做口訣咁背。

💛複習法
齋背一次係唔夠架,始終有咁多篇,好容易會撈到亂唒。所以小編建議:

  • 建立長期嘅記憶:經常複習。
  • 間隔時間要先密後疏:由隔日背一次慢慢轉變到隔三星期

❌❌ 臨到考試之前先再溫翻 ➡️ 到時嘅印象已經變得好模糊,等於重新背一次。

💛精選法
假如同學你地真係背唔到一啲好長嘅文章,咁都可以揀重點嚟背。好似《廉頗藺相如列傳》呢篇咁長嘅文,其實個重點都係刻畫廉頗同藺相如嘅人物形象,所以你地可以背有關人物描寫嘅句子,例如:

  • 「相如持其璧睨柱,欲以擊柱。」(行動描寫)
  • 相如曰:「五步之內,相如請得以頸血濺大王矣!」(語言描寫)

 

3. 12篇範文考試常見題型 

除左背範文之外,仲要溫啲咩?小編喺呢度想同你地分析一下範文會出嘅題型,等你地可以好好準備一下。

💛字詞句子語譯

  • 仔細温習每一個單字嘅意思,因為一個虛詞係會兼顧唔同意思。🌟(好似個「固」字,可以解做本來、堅決、姑且)
  • 視乎前文後理去判斷字義
  • 特別留意一啲比較艱深嘅關鍵字詞(如《出師表》嘅「陟罰臧否」)
  • 答題目嘅時候都要留意翻個詞性(動詞/名詞)

💛內容大意
呢部分問得比較直接,如果你地有背到書,已經可以輕鬆應對。所以記得文章嘅脈絡係好重要架。好似《廉頗藺相如列傳》有 3個小故事,每一個你地都要記得個起承轉合,因為呢一課通常都係問內容情節。

💛寫作、修辭手法
四類範文嘅考核重點:

  • 記人:人物描寫手法
  • 詩詞:體裁+抒情手法+語言節奏
  • 遊記:記敘手法+觀察點描寫(步移法//時間推移…)+動靜態描寫+抒情手法
  • 議論:中心論點+分論點+論證手法+論據。

💛高階問法

  • 跨篇比較:佔分最高,考文章同文章之間嘅關係。例如問杜甫喺登樓入面觸景傷情,咁係咪屬於遷客騷人嘅一種呢。
  • 個人意見、對文章嘅睇法

要應對呢兩種題目,你地可以留意埋寫作背景,知道作者喺咩情況下寫呢篇文,咁樣就可以豐富翻個答案。🤓

另外,你地都可以做多啲坊間嘅練習,好似《透視文言文 (精讀) 》呢本😍,已經幫你整理好每一篇範文嘅考試重點,入面仲有文章比較題做〜依家上NoteSity 平台就可以訂購啦。👍🏻✨✨

 

4. 即場發揮

中文閱讀卷嘅時間只有一個半鐘,絕對係分秒必爭。🕑如果你地已經準備好以上所講嘅野,即係背熟每一篇範文同埋熟讀課文問答,咁你地已經可以應對大部分嘅題目架啦!

考試時候:

  • 大概花15-20分鐘喺範文部分,其餘時間都要預留俾後面嘅課外篇章。
  • 遇上啲好刁鑽嘅問題,千奇唔好過分糾結,可以跳左嗰題,做完成份卷先翻嚟做。
  • 細心審題,唔好答非所問。好似2019年嘅其中一題問為什麼西山嘅景色令作者可以從「恆惴慄」嘅心情中釋放出嚟,嗰重點字眼係「為什麼」,亦即係你地寫嘅答案要強調因果關係(景色➡️心境),但好多考生只係單單去描述作者嘅個人心境係點,咁就離左題無分啦。😣

 

雖然 DSE 要溫十二篇範文一定會加重左你地嘅負擔,但換個角度睇,呢個絕對係執分嘅好機會!最緊要兩個字——勤力。希望你地鐘意小編今次嘅分享啦😀,加油💪🏻💥🔥🔥

 

🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~ 

 

💭 咩係 NoteSity?NoteSity 是全港最大DSE資源訂購平台,為你搜羅不同導師及出版社的高質 DSE 筆記、補充練習與參考書,一個平台匯聚你需要的 DSE 資源,幫助你考好 HKDSE。

📚 訂購高質 DSE 筆記、補充練習與參考書:中文科 | 英文科 | 數學科 | 通識科 | 理科 | 商科 | 文科

 

下次再同大家分享更多有用嘅資訊~ 記得密切留意啊🥳