以偏概全、混淆因果
小編曾經幫過中學生補中文，發現佢論說能力唔高，成日會犯啲邏輯錯誤。由此可見，香港中學生成日會犯邏輯問題，寫作時需要多加留意。❗️
一、以偏概全
同學睇上面嗰段嘅時候，有冇留意到小編犯咗啲咩邏輯問題呢？呢度犯嘅，係「以偏概全」嘅謬誤。以偏概全，係指由少數例子推出概括嘅結論。好似上面嗰段咁，小編知道嘅只係一個同學嘅能力，並唔代表其他中學生都係咁。咁樣推論出嘅結論，雖然有機會啱，但更多時會有所偏頗，未必能夠反應真實情況。
咁點解我哋會犯呢種邏輯錯誤呢？面對唔熟悉嘅事物，或者係容易接受嘅結論，我哋就有可能不自覺以偏概全。舉個簡單例子，假設同學對法國人冇乜認識，偶然識咗位法國朋友，發現佢好熱情開朗🤩，你可能會有咁嘅諗法：「原來法國人嘅性格都係咁熱情開朗㗎」。「法國人好熱情開朗」呢句陳述有可能啱，亦有可能只係個別例子。對住唔熟悉嘅事物，我哋可能會畀第一印象影響咗，以偏概全。下次寫作前，不妨先諗諗：呢個係咪個別例子？其他人或事係咪都係咁㗎？最簡單嘅方法，當然係搜集多啲資料同埋數據📊，支持自己嘅論點。成個論證過程亦都會有說服力好多。
值得一提嘅係，中文都有「以全代普」嘅現象。驟眼睇，可能會以為佢同「以偏概全」係相似嘅概念，但其實兩者截然不同。以全代普，係指用望落似係全稱嘅語句（語句帶有「全部」、「每一個」、「任意」嘅意思）去代替普遍語句（語句反應一般而言嘅情況），目的其實只係方便寫作，並唔係邏輯謬誤。睇吓下面兩句例句：
- 「香港人愛去日本旅行🏮。」
- 「日本商品包裝精美✨。」
驟眼睇，大家可能會誤以為呢兩句犯咗以偏概全嘅毛病，但其實佢哋真正嘅意思係：
- 「大多數香港人愛去日本旅行。」
- 「一般而言，日本商品包裝都很精美。」
雖然首兩句例句嘅意思未必及下面兩句清楚，但表達就比較簡潔。所以同學切記，唔好為咗令文章更客觀得體，過度增加字句釐清自己想表達嘅概念，唔係就會變咗畫蛇添足，令文章讀落好長好譖㗎喇！
二、混淆因果
另一個同學常犯嘅錯誤，叫混淆因果。簡單嚟講，係將事情嘅原因同結果調轉咗，有時甚至係將兩樣冇因果關係嘅事物刻意加上邏輯關係。好似下面嘅例句咁：
「讓座能改善我們的人際關係。我們不僅可讓座予長輩，更可讓座給傷殘人士和孕婦，從而提高我們的同理心。」
到底係因為我哋讓座，所以我哋會有同理心；定係因為我哋有同理心，所以會讓座？細心思考，應該就會知道，正確嘅應該係後者：一個人受家庭教育或者社會教化薰陶，會慢慢培養出同理心，繼而選擇讓座。所以例句咁寫，其實就係將原因同結果混淆咗。
混淆因果，有時可能係受到時間順序影響，會以為先發生嘅事，一定會影響之後嘅事情。又睇吓下面呢句：
「詩欣吃了感冒藥💊，後來頭更痛了。一定是感冒藥令病情惡化的！」
按時間嚟睇，「頭更痛了」的確係發生喺「吃了感冒藥」之後，但唔一定係食感冒藥導致嘅。同學寫議論文嘅時候，一定要留意，一件事發生，可能有唔同嘅因素影響。好似例句咁，詩欣頭越嚟越痛，可能係因為佢冇充足嘅休息，或者係房入面溫度太高，當然都有可能係食咗感冒藥，但就唔能夠一口咬定「頭更痛了」必然係「吃了感冒藥」導致嘅。
正如上一段所講，一件事發生，可能有唔同嘅因素影響，有啲因素比起其他其實次要得多。如果論證嘅時候，用咗呢啲微不足道嘅因素嚟論證，會削弱論點嘅說服力。
「你整天打電動🎮，怪不得會加劇全球暖化🌎！」
「打電動」用嘅電腦、手機或者遊戲機，的確會嘥電。而香港發電主要嘅燃料都係煤炭。燒煤嘅時候會產生大量二氧化碳呢種溫室氣體，加劇溫室效應，引致全球暖化。但電腦、手機、遊戲機嘅耗電量及唔上冷氣機、暖爐，家居用電量又遠遠及唔上商業用電。所以打機會加劇全球暖化，其實唔係好站得住腳嘅論點。
寫議論文嘅時候，如果要論證一件事會引致另一件事發生，就要諗吓佢嘅影響力係咪好大。呢句咁，講話「人類工業活動日盛，排放大量溫室氣體，加劇全球暖化。」就會有說服力得多。
三、滑坡謬誤
滑坡謬誤，簡單嚟講，就係一連串嘅因果推論入面，每一環論證都誇大咗，令到結論變得唔合理。下面嘅示例想論證年輕人唔應該食水煙，不如大家試吓搵吓呢段論證有咩問題？🔍
「青少年如果吸食水煙，便會對吸煙躍躍欲試。香煙含有許多有害化學物質，有損健康。因此，年輕人不應吸食水煙🙅🏻♀️🙅🏻♂️。」
上面嘅例子，雖然想論證年輕人唔應該食水煙，但論點每一環嘅說服力都好薄弱。「食水煙」同「食煙」係類似嘅事物，但兩者之間唔一定有必然嘅邏輯關係。亦即係話，食水煙嘅人，唔一定會食煙。
咁呢個例子要點改好呢？如果想論證食水煙嘅禍害，其實直接分析食水煙點樣損害健康就得㗎喇！一齊睇吓下面嘅改寫示例：
「水煙的煙霧含有類似燃燒煙草的致癌物質，例如甲醛、苯、重金屬。美國有研究指出，吸食水煙吸入的焦油是香煙的25倍，吸入的尼古丁是香煙的2.5倍，可見水煙既會令人上癮，亦會損害健康。年輕人應少吸食為妙。」
改寫過嘅例子，邏輯關係清楚好多：因為吸食水煙會令人上癮，而且有損健康，所以年輕人唔應該食。調返轉講，如果論證係建基喺某啲前設，例如食水煙嘅人一定會食煙，論點嘅說服力就會大減。
睇完上面嘅改寫示例，係時候要挑戰吓自己！😤 下面嘅句子，同學又知唔知應該點改寫呢？諗吓下面嘅句子有咩邏輯問題，再試吓改寫句子，應用返你啱啱學過嘅嘢啦～（呢篇文章最底會有參考答案！✨）
實戰題💪🏻：「讀一所好中學，才能考上好大學，找份好工作，生活無憂🤩。」
四、循環論證
循環論證，即係用嚟證明論點本身嘅論據，佢嘅真確都需要論證。睇完都唔係好明？😵 一齊睇吓下面嘅例子啦！
同學甲：我是全班最聰明的。
同學乙：為什麼你是最聰明的？
同學甲：因為我腦袋很靈光。
同學甲嘅答案好似解釋緊點解佢係全班最聰明嘅同學，但其實佢只係解釋緊咩叫「聰明」，而唔係「點解佢係最聰明嘅」。如果同學甲要解釋嘅話，佢其實可以咁講：「我考試成績總是最好的，老師問問題，我也是第一個舉手回答，答得快又準😤。」
不如再睇吓呢個技巧點樣應用喺文憑試度啦💁🏻♂️
2016年第三題：傳統往往是創新的包袱。
假設其中一段論點咁樣寫：「傳統拖累創新，造成社會進步的負擔。」
呢一段，其實只係用唔同嘅字，去重複一次「傳統往往是創新的包袱」，冇解釋到傳統拖累創新嘅原因。考試寫文章，有時可能突然「情思枯竭」，諗唔到點鋪排論點，於是嘗試用唔同嘅文字，複述多次分論點。呢個時候，同學可以諗吓有咩角度切入，可以幫自己闡述個論點。呢度嘅例子，我哋可以從社會角度入手，講吓傳統觀念點樣拖累飲食業嘅創新：「傳統思想，會使人們墨守成規，被傳統觀念束縛，安於現狀，不敢創新求變。試想像，若麪包店過於執着傳統月餅的外貌、材料、味道，又怎能推陳出新，發明大受好評的冰皮月餅和奶黃月餅🥮？」
其實寫議論文嘅時候，論證要做得好，就要諗吓點樣拓展論點，延伸說明。千祈唔好以為換句話講多次個分論點，再加個例子，就叫做完整同嚴密嘅論證呀！😔
五、借助權威
見到呢個標題，有同學可能會問：權威人物係我哋嘅榜樣楷模，佢哋地位高，受人敬重，講嘅說話都比較可信，點解唔可以借助權威去作文？🤔 呢部分，小編都用返文憑試嘅題目同大家分析啦😉
2016年第二題：我在朋友之中找到快樂。（註：題目本身係「我在____之中找到快樂」，「朋友」係小編後加嘅。）
又假設其中一段論點咁樣寫：「論語有云：『有朋自遠方來，不亦樂乎？』孔子認為，有朋友從遠方探望自己，十分快樂。孔子這樣說，說明人人也能從朋友中找到快樂，我也不例外😜。」
單單因為孔子咁樣講，就斷言每個人都可以從朋友之中搵到快樂，正正就犯咗借助權威嘅謬誤喇！每個結論都有背後嘅原因。如果寫文章嘅時候，單單話某位名人講過，所以得出某個結論，論證就會唔夠嚴密。要改寫例子嘅論證，可以先講咗自己點解覺得可以從朋友之中搵到快樂，再引用名人嘅說話，咁樣就可以有「畫龍點睛🐉」嘅效果。例子改寫：「朋友能互相切礎學習，彼此勉勵進步。有朋友一起分享箇中快樂，傾訴心事，是很幸福快樂的。『有朋自遠方來，不亦樂乎？』，孔子也說，有志同道合的朋友探望自己，聚舊聊天，是樂事一樁。」
小結
上文分享咗五個同學常犯嘅邏輯謬誤，其實只要寫作嘅時候，多啲留意，就唔可以避免呢啲問題。希望呢篇文章可以提醒返同學，寫作嘅時候多啲留意，多啲練習，就可以避免呢啲問題邏輯謬誤㗎喇！💛
最後，小編畀返實戰題嘅改寫參考答案大家：✨
「讀一所好中學，教師資源、校園環境、學校配套較佳，同學方能在良好環境學習，提高考上知名大學的機會。知名大學聲譽高，畢業生出路平均較多，較易找份薪酬高的工作。」
- 貼士一💛：講清楚啲句子之間嘅邏輯關係，論證先有層層推進嘅感覺。
（讀一所好中學=教師資源、校園環境、學校配套較佳同學方能在良好環境學習提高考上知名大學的機會）
- 貼士二💛：避免用太主觀嘅字眼，用多啲客觀嘅字詞
（❌好大學 ⭕️知名大學；❌好工作 ⭕️薪酬高的工作）
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 網上購買 DSE 溫習筆記、補充練習與參考書：熱門產品 | 優惠套裝 | 產品分類
