終於揀好JUPAS啦～ 但跟住落嚟仲有一個重要決定要做！😣就係 —到底要唔要住Hall！相信唔少同學仔都仲糾結緊～
係做決定之前，大家對自己想讀或將要讀嘅果間大學嘅Hall，認識又足唔足夠呢？
今次小編訪問咗一位喺浸大住緊宿舍嘅朋友，等佢黎同大家分享一啲喺浸大住hall必須知道嘅資訊啦～😆
同場加映，一次過睇埋住Hall究竟有咩好玩！
目錄
一、關於浸大四Hall
二、報Hall方法及收生準則
三、什麼是Unit？
四、「四年一宿」制
五、所謂「距離分數」
同場加映：住Hall究竟有咩好玩
一、關於浸大四Hall
相信有係咁意了解過浸大嘅同學仔都知道，BU係有四間Hall嘅～分別係：
- 楊振寧堂Yang Hall（藍Hall）
- 蔡元培堂Cai Hall（橙Hall）
- 宋慶齡堂Soong Hall（黃Hall）
- 周樹人堂Zhou Hall（紅Hall）
四間Hall位於同一棟大樓，大樓有分南、北兩座，Yang Hall同Cai Hall位於南座，而Soong Hall同Zhou Hall就位於北座。每座都有18層作為學生宿舍，每間hall分別有9層。其中，Yang Hall同Zhou Hall喺單數層；Cai Hall同Soong Hall喺雙數層。而兩座嘅一樓係相通嘅～
二、報Hall方法及收生準則
學生要係BUNIPORT度自行Reg Hall，Reg Hall嘅時候可以按自己嘅preference選擇報邊一間Hall～不過因為每間Hall嘅宿生都係由校方統一抽選，所以同學未必可以入到自己最心儀嘅Hall☹️
另外，同學係Reg Hall嘅時候都要排埋自己嘅房preference（雙人房或三人房），同埋要揀住單性別層定係男女同層（每間Hall都有兩層係男女同層🥴）～
三、什麼是Unit？
BU Hall嘅其中一個特別之處係兩間房嘅宿生共用一個洗手間～（洗手間道門仲可以通往另一間房𠻹！勁神奇！！🤩）
所以，每兩間房就為之一個Unit～
四、「四年一宿」制
喺寸土寸金嘅香港，大學床位自然亦十分珍貴。💰為咗令每個學生都可以體驗到宿舍生活，唔少大學都實行「四年一宿」制，BU亦唔例外。所謂「四年一宿」，即係每個學生至少都可以住到一年Hall。另外，如果某學生喺一個學年入面淨係住左一個Sem，佢下學年亦可以再住一年。
如果已經住過一年Hall，係咪就代表以後冇得再住？咁又未必～😗同學可以嘗試申請Return，即係再住一年。不過，做Returning入hall嘅要求就比Hall Fresh（第一年住Hall）嘅要求要高得多啦～
五、所謂「距離分數」
相信大家都有聽過，同學居住地同學校距離嘅遠近會影響到佢地最後可否成功住Hall。冇錯！Reg Hall嘅時候會出現一個「距離分數」，住得距離學校越近，分數就會越低，相反，住得越遠，分數越高。
：我住好近嘅話咪冇得住Hall囉！？
咁又唔使擔心～正如頭先所講，BU係實行「四年一宿」制嘅，所以「距離分數」並唔係唯一一項影響因素～😌 未住過Hall嘅學生喺Reg Hall時會有額外嘅30分底分～而Returning就冇。😗
同場加映：住Hall究竟有咩好玩
BU嘅Hall活動，或者係住Hall之後可以參與嘅活動可以分為四大類：
第一類、Ocamp組活動👨👩👧👦
第一類就係Ocamp組內嘅活動～
相信大家都知道，喺正式入Hall之前，Freshmen都會先參加Hall內嘅Orientation Camp～係Hall O期間，所有Freshmen會被分配入組，然後以組嘅形式參與Ocamp嘅活動。
你以為Ocamp組喺Ocamp完左之後就會各散東西？咁就大錯特錯啦～！
Ocamp組嘅組爸媽會喺組仔女住Hall嘅一年間搞唔同活動俾佢地，等佢地可以不時聚下、玩下～
所以，喺各大節日，例如中秋節、聖誕節，或者喺Sem頭Sem尾嘅時候，都會有組活動俾大家參加。至於具體有咩活動、舉辦活動嘅頻率同次數多寡，就視乎各位嘅組爸媽啦～🥴
第二類、層內活動👫👬
第二類係層內活動～
完左Ocamp之後，Freshmen就會被分到唔同嘅樓層，而每一層嘅Hall tutor就會為自己嘅層仔女舉辦活動～（p.s. BU嘅Hall tutor係由住過至少兩年Hall嘅學生做返哦～）
最典型嘅層內活動有行山、Singing Contest、同Floor decoration～ 前兩者相信唔使小編多講啦～咁Floor decoration又係乜嘢呢？
Floor decoration（Floor dec）即係每層樓嘅人要根據自己層樓嘅名（BU Hall每層樓都有自己嘅名）同埋每年唔同嘅主題去裝飾所屬樓層嘅lounge同lift lobby～
除咗呢三樣，亦會有踩單車、燒烤、慶生等常見嘅團體活動🎉（慶祝生日有唔少到會推介！）每個月亦都會有一次層飯（即成層樓嘅人一齊食飯）😙
第三類、Hall內活動🏢
第三類又分兩種，一種係以整間hall為單位嘅活動～ 例如有成間hall嘅Singing Contest、dance competition、聖誕party、鳳凰觀日（去鳳凰山睇日出）、鬼屋等等。
冇錯！有鬼屋玩㗎👻！！呢個鬼屋唔係指一班人一齊去出面嘅鬼屋玩，而係Hall莊會喺間Hall入面整一個鬼屋出嚟！！！大家可以放100個心，佢地整嘅鬼屋絕對唔比出面嘅差㗎～😏
另一種Hall內活動，就係聯層活動啦！每一層嘅樓主、副樓主同「聯層大使」周不時都會搞一啲聯層活動俾層內嘅hallmates 玩～ 例如聯層閃避球比賽、過三飯等等～
第四類、聯Hall活動🏬
最後一類就係聯Hall活動啦！！
BU Hall嘅聯Hall活動主要有兩個，一個係Singing Contest🎼，另一個就係「堂際」。啱先講到，Hall內會有一個成間hall嘅Singing Contest～ 每間Hall嘅Singing Contest完結之後，就會進入「決賽」，亦即係聯Hall嘅Singing Contest啦～ 而所謂「堂際」，就可以理解為一個俾四堂宿生一齊參與嘅運動會🏃～ 比寶會以舍堂為單位，類似於以前中學時嘅社際比賽
美中不足嘅係堂際嘅比賽項目較少，基本上只有籃球、排球同足球三項😢 其他嘅運動健將就未必有大展身手嘅機會啦······
以上就係住Hall之後可以玩嘅各種活動～想要充實自己嘅大學生活、識多啲朋友？BU住Hall絕對可以幫你達到呢啲目標！
不過，小編都係果句～決定住Hall之前一定要諗清楚自己係咪真係有能力喺住hall嘅同時兼顧埋學業等其他各方面嘅嘢～同埋自己又係咪真係願意花咁多時間同精力去參與上面呢堆活動呢？住唔住hall真係一個人生大難題，今次就講到呢度啦～（小編當時都煩惱咗好耐！）🤣
睇到呢度，同學仔係咪對BU Hall有更清晰嘅concept呢～？希望今次嘅文章可以幫到你地啦💛
*以上文章內容純屬作者個人分享，並不代表本網站之立場。
🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～
💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！
📚 網上購買 DSE 溫習筆記、補充練習與參考書：熱門產品 | 優惠套裝 | 產品分類
🍜 住 Hall 一班人玩，點少得開 Party？記得預訂 Catering Mama 到會，全港免運費，多款特色 Party / 活動到會套餐自由選擇，專人客服貼心跟進，大學活動、Party 首選！
