大學五件事，「讀書📚、上莊、拍拖👩‍❤️‍👨、做part time💰同住hall🏨」，相信唔少新生喺入學嘅時候都有聽過。如果畀小編加多一件事上去，我應該會揀「去exchange🛫」。去exchange，除咗可以擴闊眼界，亦都可以體驗同香港唔同嘅文化，甚至係發掘新興趣，一舉多得。

報咗去exchange嘅同學，而家心情可能既緊張又興奮；如果你係今年入大學嘅新鮮人，可能會覺得去exchange 係遙不可及嘅事，不過古語有云：「未雨綢繆」，而且機會往往係留畀有準備嘅人，早啲了解exchange嘅事，及早準備，都未嘗唔係一件好事嚟嘅。

去exchange嘅時候，修嘅學科只係計pass/fail（及格/不及格），學習相對比較輕鬆，如果為自己訂立一啲目標，會令exchange去得更有意義！

最後再同大家講講，去exchange時好多同學仔會遇到嘅語言障礙同生活自理難題。語言不通可能令你一開始有啲不知所措，生活上又要自己搞亂七八糟嘅事宜，聽落好似有啲頭痛，但其實呢啲挑戰係點樣幫你成長嘅開始！

NoteSity 小編舊年去過英國交流🇬🇧，都有少少心得希望同大家分享吓，希望幫到大家～

 

文章目錄

一、大學exchange建議目標一：學語言

二、大學exchange建議目標二：跳出舒適圈

三、大學exchange挑戰一：語言不通

四、大學exchange挑戰二：生活自理

 
一、建議目標一：學語言
學習新語言，正正係其中一樣。去到其他國家，好似係受留學生青睞嘅日本🇯🇵同韓國🇰🇷咁，簡單如蕩失路搵路人問路，到堂上用外語匯報，會多咗好多機會講同聽外語。為咗應付日常生活同埋學習需要，自自然然會迫使自己努力啲學好嗰門外語。

除此之外，去外國學語言亦可以話係最理想嘅學習語言模式，因為你會學到某個語言喺真實環境點樣運用，亦唔單止係課堂教授嘅教科書用語。

舉個簡單嘅例子，用英文講你出街食飯，教科書可能會咁樣寫：‘I have dinner at a restaurant.’  呢度文法雖然正確，但比較生硬同唔自然。外國人一般反而會多講 ‘I dine out.’ 意思同上句基本相同，但聽落自然同地道得多。

呢度舉嘅雖然只係英文嘅例子，但套用落其他語言，其實都係一樣嘅道理。如果同學真係想學好一門外語，不妨把握exchange呢個機會，聽多啲👂🏻同講多啲🗣。
 
二、建議目標二：跳出舒適圈
舊年，小編亦都幫過大學面試想去exchange嘅同學，其中一條必問嘅問題係「你會做啲咩確保自己唔會淨係留喺舒適圈（comfort zone）入面？」

當然呢條問題冇標準答案，但如果去exchange，大部分時間都同香港嘅同學一齊相處生活，就會冇咗exchange嘅意義。

所以同學不妨主動識多啲外地嘅朋友。好似小編咁，喺英國嘅時候，參加咗攀石學會，識咗唔少英國嘅年輕人。大家除咗交流攀石嘅心得之外🧗，亦都會講到兩地文化嘅差異。記得嗰時有英國嘅朋友問：「香港人係咪行得好快㗎🏃🏻‍♀️？」我答話：「都係㗎，所以嚟到英國，希望可以體驗吓慢活生活，畀自己休息吓。」而小編同當地人溝通交流嘅時候，亦發掘到唔少新鮮有趣事 —— 例如佢哋嘅 KOL / YouTubers 都會用 AI 工具（例如 Subtitlewhisper）去自動生成影片字幕，而唔係好似我哋咁逐個人手加同較對，小編聽完之後完全係「長知識了🤯」咁嘅樣🤣

當然啦，識新朋友可能都需要唔少勇氣。小編自問都係一個比較內向嘅人，開頭難免會有啲忐忑，擔心外國人未必歡迎自己。但其實只要主動打開話匣子，會發現好多外國人都比你想像中嘅友善，亦都願意同你做朋友🤝，藉此去了解多啲異地文化。

一百個大學生，可能會有一百個去exchange嘅目標或者理由，上面只係簡單講咗其中兩個。如果同學想去exchange，搵到自己想去嘅地方，同埋發掘到自己想喺去exchange嘅時候做啲咩，先係最彌足珍貴嘅。

 

三、挑戰一：語言不通

講到語言方面，出發之前，其實已經可以開始準備。而準備方法，真係好簡單樸實，無非係多聽、多讀、多寫、多講。學語言，無咩捷徑可走。如果唔係，一味求快，根基打得唔穩，就算過咗語言測試，真係同外國人傾偈時，都會發覺自己好多嘢聽唔明，又唔知點回應，搞亂晒。要紮實打好語文底，出發留學前，不妨由以下四方面入手：
 

多讀📚
學語言好講究興趣，閱讀都一樣。初初學一種語言，揀啱自己感興趣嘅文本真係好重要。如果你是小說迷，大可以搵幾本外語小說嚟睇。網上有唔少網誌同影片，會介紹各種外語書，有啲仲好貼心，按書籍類型同難度分門別類介紹，讀者可以根據自己嘅程度同興趣揀啱嘅書，享受一邊學一邊玩嘅樂趣。

如果你係外語新手，不妨試下讀童話故事或者兒童文學。呢啲作品通常用淺白易明嘅文字寫成，就算係小朋友都唔使費力就明白故事劇情。英國作家Roald Dahl嘅作品，同法國飛行員兼作家Antoine de Saint-Exupéry嘅《小王子》，都係好例子。外語初學者嘅語文能力同母語者嘅小朋友差不多，就算唔識一啲生字或者文法，都比較容易明白小說內容。

 

多聽👂🏻  
聽外國人講嘢，最大困難通常唔係內容太深，而是有啲關鍵詞聽唔懂，搞到成段對話都唔知講乜。小編記得大學講師教過一個方法——默書。喺屋企可能有啲難，所以小編稍作更改：上網搵條外語影片，最好有外語字幕，幾分鐘長度就夠。唔睇字幕，先將內容寫低，聽唔懂或者語速太快就倒帶重聽。寫完對照字幕，睇吓邊啲地方聽錯咗或者唔明白，遇到生字就查字典。持續做呢啲默書練習，聽力一定有進步。

而家串流平台咁流行，唔同語言嘅節目多的是，真係學外語嘅好幫手。你有冇一睇外語節目就開中文字幕嘅習慣？開咗中文字幕，眼望字幕，耳仔就唔專心聽角色講嘢。想改呢個習慣，不妨轉用外語字幕，慢慢再試關字幕，單靠耳仔去聽同明白。一開始聽唔懂好正常，但只要習慣唔靠眼，熟咗外語發音，聽懂嘅內容會愈來愈多。

 

多寫📝  
寫作係將學咗嘅生字同文法用出來嘅好機會。用外語寫日記🗓、同朋友喺社交平台傾偈，都係唔錯嘅方法。小編上法文課時，老師好認真話過，作文要 ‘Soyez simple, soyez sincere!’（Be simple, be sincere!）有啲同學為咗表現自己，喺網上搵咗一大堆唔識嘅詞同句式，但寫完好快忘記晒，仲同寫作嘅原意背道而馳。下次寫外語，不如先用自己識嘅句式同生字，真係有重要嘢唔識表達，先查字典📖，咁先有得著。

 

多說🗣  
留學前練口語，其實唔容易。同朋友用外語傾，雖然多咗講嘅機會，但對方都可能係新手，唔一定聽得出你嘅發音或文法錯咗；網上會話課程比面對面少咗觀察對方肢體語言🙌🏻同眼神👀嘅機會，仲可能有網絡唔穩，影響學習效果。

不過想練發音，可以試下「回音法」。呢個係台灣大學外文系副教授史嘉琳老師創嘅方法，簡單講係聽外語母語者讀一句短句或片語，喺腦海回想聽到嘅「回音」，跟住模仿重複講。史老師喺TED Talk講過詳情，有興趣嘅同學可以睇睇。

 

留學生活，無疑係學外語嘅最佳環境，唔單止有無數機會接觸外語，仲係同當地人傾偈、練口語嘅絕佳時機。正如上面所講，留學生活其實喺出發前已經開始。只要喺出發前準備好，exchange期間肯定事半功倍！

 

四、挑戰二：生活自理

喺外國生活，起居飲食都要自己一手包辦，無父母喺旁邊照顧一切。留學生活唔單止係挑戰，仲係一個自我成長嘅機會。留學期間，要學識照顧自己，下廚同自律真係少唔得！

 

下廚 🍳

喺香港，好多同學有父母或者外傭姐姐幫手煮三餐；但去到外國，如果唔想成日喺餐廳食飯，就要喺宿舍自己煮：諗菜式🍱、買食材🍅同廚具🍴、準備材料同煮飯🥣，樣樣都要一手包辦。當然，而家互聯網咁方便，上網一查，各國菜式食譜多到任你揀，小編喺呢度唔多講啦。今次想同大家分享下廚嘅好處，希望俾到你動力去練吓廚藝。

自己煮飯，可以少放調味料🧂，食得更健康。呢個道理大家都知啦。但你有冇諗過，自己下廚其實仲可以慳唔少生活費？雖然生活費因國家同地區而異，但通常買食材嘅開支比喺餐廳食飯平得多。小編喺英國交流嗰陣，每個星期都會同室友去附近嘅Aldi買日用品同食材（Aldi係一間德國平價連鎖超市，喺英國都有分店）。

圖片來源：Aldi官方網站

喺英國，出街食一餐動輒要10英鎊（大約100港元），但同樣嘅價錢，喺超市已經可以買到一星期份量嘅食材，仲包括蔬果🥬、肉類🥩同零食🍫，選擇多到爆，完全唔會因為平就少咗選擇。只要肯花啲心思，就能煮出唔同菜式。

另外，唔同國家嘅超市都會不時有優惠。去超市買嘢前，略為查下資料，揀啱時機入手，真係可以慳唔少。例如日本超市會定時擺出啲塑膠籃，裝滿賞味期限得一兩日嘅蔬菜，好多價錢低過100日圓（約7港元）。呢啲食材拎嚟煮當晚嘅晚餐，啱啱好用得著。

圖片來源：MATCHA – 超市終極省錢大作戰！燃燒主婦魂五大技巧大公開！

除咗慳錢，下廚其實仲係同室友相處、搞好關係嘅好機會，甚至可以識到新朋友。小編記得有一次同室友去宿舍附近嘅攀石中心攀石🧗🏻，識咗一個韓國女生。活動完咗，我哋請咗佢嚟我哋宿舍食晚飯。飯局期間，我哋傾咗兩地嘅文化差異，第一次知原來韓國人多數用Kakao Talk通訊，而唔係香港慣用嘅WhatsApp。呢啲留學嘅小趣事，當時可能覺得唔算啲乜，但過後回想，真係好值得回味～

 

自律 🙇🏻‍️  
留學期間，無父母喺側邊，處於「無皇管」嘅環境，自律就變得好重要。無論係作息時間、飲食習慣定學習，都要靠自己俾心機留意。

身在外地，同學真係自由啲，學校對出勤嘅要求可能唔似香港咁嚴。上唔上課，有幾認真上課，好多時靠自己決定。小編喺英國交流時，見到每堂課同學都準時出現，仲好認真做筆記📝。上課時，成日聽到打字聲此起彼落，真係一幅幾特別嘅畫面。另外，大部分同學會認真預習閱讀材料，上課時積極參與討論。喺外地，學習以學生為主，講求自律同自主。香港學生初到外地，可能要時間適應呢種模式，但如果覺得用香港嘅學習方法就夠好成績，實在有啲過分樂觀。

小編仲留意到，英國大學功課唔多，每學期一科可能得一兩份功課📑，有啲叫formative assessment嘅功課甚至唔計入總成績。同學大可以hea住唔做，但食虧嘅只會係自己，因為每份功課都係檢驗自己有無明白課堂內容嘅機會。只做計分嘅功課，學到嘅嘢真係好有限。

再講，喺外地要適應當地語言、文化同價值觀。就算功課少咗，對外語嘅要求反而高咗。同學要花多啲時間同精神，先至追得上母語者嘅平均水平。小編喺英國交流時，都成日俾老師話句子唔夠自然地道。如果去非英語國家留學，用外語學同做功課，當然更加唔易。正因為咁，嚴以律己，定立學習目標同方法，就變得超級重要！

 

小編喺度祝咁多位想去exchange嘅同學，去到自己想去嘅地方；去完exchange之後，能夠有所突破同成長💪🏻。

 

*以上文章內容純屬作者個人分享，並不代表本網站之立場。

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類