大學五件事,「讀書、上莊、拍拖、做part time同住hall」,相信唔少新生喺入學嘅時候都有聽過。如果可以加多一件事上去,應該好多同學會揀「去exchange」。大學exchange除咗可以擴闊眼界,亦都可以體驗同香港唔同嘅文化,甚至係發掘新興趣,一舉多得。👍

可惜嘅係,疫情底下,暫時無辦法去到外地交流。不過隨著疫苗研發,疫情逐漸緩和,應該好快有望去到外國exchange。報咗大學exchange嘅同學,而家心情可能既緊張又興奮;如果你係Freshman,可能會覺得去exchange係遙不可及嘅事,不過古語有云:「未雨綢繆」,而且機會往往係留畀有準備嘅人,早啲了解exchange嘅事,及早準備,都未嘗唔係一件好事嚟嘅。🧐

去exchange嘅時候,修嘅學科只係計pass/fail(及格/不及格),學習相對比較輕鬆,如果為自己訂立一啲目標,會令exchange去得更有意義。NoteSity 小編邀請咗一位曾經到英國exchange嘅同學分享兩個大學exchange時可以訂立嘅大目標同佢嘅交流心得,同學可以參考下再定下自己exchange想達到的目標!~✈

 

文章目錄

一、大學exchange建議目標一:學語言
二、大學exchange建議目標二:跳出舒適圈

 

一、大學exchange建議目標一:學語言

學習新語言,正正係其中一個你可以訂立嘅目標。去到其他國家,好似係受留學生青睞嘅日本同韓國咁,簡單如蕩失路搵路人問路,到堂上用外語匯報,會多咗好多機會講同聽外語。為咗應付日常生活同埋學習需要,自自然然會迫使自己努力啲學好嗰門外語。💪

除此之外,去外國學語言亦可以話係最理想嘅學習語言模式,因為你會學到某個語言喺真實環境點樣運用,亦唔單止係課堂教授嘅教科書用語。

舉個簡單嘅例子,用日文自我介紹,教科書可能會咁樣寫:「どうも初めまして、私は黄です。(譯:初次見面,我姓黃)」呢度文法雖然正確,但比較生硬同唔自然。日本人一般反而會多講 「初めまして、黄です。」意思同上句基本相同,但聽落自然同地道得多。呢度舉嘅雖然只係日文嘅例子,但套用落其他語言,其實都係一樣嘅道理。如果同學真係想學好一門外語,不妨把握exchange呢個機會,聽多啲👂同講多啲👄。

 

二、大學exchange建議目標二:跳出舒適圈

在過往申請exchange嘅面試入面,其中一條必問嘅問題係「你會做啲咩確保自己唔會淨係留喺舒適圈(comfort zone)入面?」當然呢條問題冇標準答案,但如果去大學exchange,大部分時間都同香港嘅同學一齊相處生活,就會冇咗exchange嘅意義。😕

所以,同學不妨主動識多啲外地嘅朋友。例如參加當地大學嘅興趣學會,結識當地嘅年輕人。大家除咗交流興趣相關嘅話題之外,亦都可以傾下兩地文化嘅差異。

 

筆者記得當時有英國嘅朋友問👩‍🦰:「香港人係咪行得好快㗎?🏃‍♂️」

筆者👧:「都係㗎,所以嚟到英國,希望可以體驗吓慢活生活,畀自己休息吓。」

當然識新朋友可能需要唔少勇氣,筆者自問都係一個比較內向嘅人,開頭難免會有啲忐忑,擔心外國人未必歡迎自己。但其實只要主動打開話題,就會發現好多外國人都比你想像中嘅友善,亦都願意同你做朋友,藉此去了解多啲異地文化。☺

 

一百個大學生,可能會有一百個去exchange嘅目標或者理由,上面只係簡單講咗其中兩個。如果同學想大學exchange,搵到自己想去嘅地方,同埋發掘到自己想喺去exchange嘅時候做啲咩,先係最彌足珍貴嘅。小編喺度祝咁多位想去exchange嘅同學,去到自己想去嘅地方;去完exchange之後,能夠有所突破同成長。🥳

*以上文章內容純屬作者個人分享,並不代表本網站之立場。

🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁呀!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~ 

💭 咩係 NoteSity?係全港最大網上教育書店,為你搜羅不同作者及出版社嘅 DSE 溫習筆記、補充練習與參考書,一個平台匯聚你需要的嘅 DSE 資源,幫助你考好 HKDSE。

📚 網上購買 DSE 溫習筆記、補充練習與參考書:熱門產品 | 優惠套裝 | 產品分類