一年一度嘅 DSE 終於完結，NoteSity 小編喺度恭喜各位考生「脫離苦海」，終於可以鬆一鬆啦！考完 DSE 之後有成兩個月先放榜，放榜之後又有近兩個月先開學，咁長嘅「假期」可以有咩做？又可以點樣準備大學生活？有咩可以充實自己？

 

忙咗咁耐，DSE 一完就好似突然得閒到唔適應咁，呢段時間除咗好好放鬆之外，難得有時間可以比自己自由分配，當然都有好多途徑可以充實自己嘅生活啦！

 

於是小編整理咗唔同類型 DSE 完咗可以做嘅嘢，希望可以提供一啲 Idea 比同學，好好運用呢段珍貴嘅時間！

 

目錄：

一、學業類

  1. 提升英文能力

  2. 了解課程內容架構

  3. 閱讀學科相關書籍

二、技能類

  1. 學語言

  2. 學攝影、修圖、剪片

  3. 考各種證書

三、收入類

  1. 兼職

  2. 學習理財及投資

  3. 整理筆記及教參書

四、娛樂類及其他

  1. 畢業旅行

  2. 運動

  3. 做義工

 

一、學業類

 

正所謂「學習使我快樂」，就算 DSE 完咗，都阻擋唔到莘莘學子喜愛學習嘅心……講笑姐，其實係想話比大家知，雖然已經考完 DSE，但只要 JUPAS 未放榜，一切都未塵埃落定。所以趁呢段時間，除咗可以好好思考前路、了解大專院校唔同學科以做出正確嘅選擇外，仲可以好好增值自己，令自己準備好大學學業同生活。

 

  1. 提升英文能力

 

大學好多學科都需要睇好多英文閱讀材料，甚至上堂會用英文上，Tutorial（導修）會用英文討論等等。所以無論 DSE 英文考成點都好，都應該繼續提升自己嘅英文能力，因為學好英文真係終身受用，喺香港地，無論係學業、工作定社交上，都需要用到好多英文，所以一定要趁得閒打好基礎。

 

咁可以點樣趁呢段時間提升英文能力呢？以下係 NoteSity 小編簡單分享嘅一啲方法：

 

  • 聽——聽多啲 Podcast；睇 Youtube 片、煲劇、睇電影嘗試唔開字幕（如果太深可以揀歐美卡通片睇）

  • 說——跟讀練習（揀一個歐美影視角色 / 一個真實嘅歐美人作爲模仿對象，睇劇集、演講、訪問等等片段嘅時候儘量模仿佢嘅說話內容、口音、語氣、速度）

  • 讀——多睇英文文章、新聞、雜誌、小說等等；有時可以寫底唔識嘅 vocab

  • 寫——用英文寫日記（無論寫成點或者寫幾多都好，只要有寫都可以訓練到用英文思維唸嘢）

 

  1. 了解課程內容架構

 

大家應該都知道，喺 DSE 成績放榜之後，仲有一次根據自己成績修改 JUPAS 嘅機會。所謂「知己知彼，百戰百勝」，喺最後一次機會之前，要清楚了解學系、學科究竟係讀啲咩，先可以判斷係咪真係適合自己；另外，考完 DSE 大約都會心裏有數，如果覺得自己考得唔係幾好，都可以喺呢段時間做好兩手準備，了解其他以前未了解過嘅院校資訊，爲其他出路作打算。

 

大部分學科課程內容、架構等資訊，都可以上院校官網搵到，如果你仲未嘗試了解自己心儀學科嘅重要資訊的話，就快啲把握放榜前呢段時間唸清楚啦！小編有同學真係試過因爲無睇清楚學系課程而揀錯學科，結果後悔不已！

 

NoteSity 小編喺【中六升學指南】網頁裏面分享咗唔同熱門學系同升學嘅資訊，有興趣都可以參考下！

 

  1. 閱讀學科相關書籍

 

大學所學嘅內容確實比中學所學嘅更深、更廣，所以如果擔心入到大學會唔適應，或者仲未知道該學科適唔適合自己，可以去搵一啲相關嘅書嚟睇，打好基礎知識，當做一個入門試驗。例如喺院校官網嘅學科課程大綱裏面，多數會有課程名稱或簡介，可以上網 search 下相關內容，有時候網上甚至會有一啲推薦書單。

 

大學嘅課程大多都需要讀著名學者、作家等嘅理論。例如如果你想讀中文，就可以搵下關於音韻學、古代文學、現代文學、當代文學、香港文學等嘅理論書籍，接觸唔同類型作者嘅作品；如果你想讀心理學，更要搵下唔同心理學大師嘅著作，或者一啲入門嘅心理學學術書籍。

 

二、技能類

 

好多人都話入大學係為將來進入「社會大學」好好作準備，而將來無論係就業定係繼續升學，往往都需要一個好嘅履歷、證書，如果有唔同嘅技能更會加分，所以呢段時間都可以開始唸下有咩技能可以充實自己：

 

  1. 學語言

 

好多人上到大學都會選擇副修一門語言，或者當做 free elective，除咗為興趣、為去旅行、爲充實自己，學多門語言都可以提高自己嘅競爭力。而暑假裏面，既然有比較多時間，除咗出去報比較貴嘅語言課程之外，都可以嘗試自學，書店、圖書館都有好多相關教科書，完全可以自己買書或借書，而網上更係有好多學習資源同教學影片。就好似學英文一樣，學習一門語言都需要花好多心機，上面提過嘅提升英文能力嘅方法，當然同樣適用於其他語言！

 

  1. 學攝影、修圖、剪片

 

小編認爲，喺呢個數碼時代，無論係爲咗大學上莊、實習，或者未來返工、做 freelancer、創業等等，攝影、修圖、剪片等都係一啲重要技能，學多無壞。甚至乎小編大學讀嘅一啲必修 course，都會有需要整海報、剪片嘅 group project。所以趁住暑假，大家可以學攝影，或者試下探索唔同嘅修圖、剪片軟件，例如：Photoshop、Adobe Illustration、Indesign、Final Cut Pro、Premiere 等等，大部分軟件都有試用期，探索裏面唔同功能都已經夠用。

 

  1. 考各種證書

 

要證明自己嘅能力，總係需要一紙證書，所以趁住有時間，大家都可以去考下一啲對將來履歷有用，或者有利搵工嘅證書。例如夠咗18歲就可以去學車考牌；考 IELTS 或 TOEFL 證書到時可以申請 exchange；普通話水平測試證書、樂器證書、各種興趣相關證書有助搵兼職；考急救證書以備不時之需等。

 

三、收入類

 

大部分人中學畢業之後，就開始經濟獨立，已經唔再需要父母比零用錢，甚至會自己負擔大學學費、選擇搬出去住等等，所以就需要學識賺錢、理財，增加收入。NoteSity 小編就總結咗以下三種 DSE 應屆畢業生嘅收入途徑：

 

  1. 兼職

 

DSE 完咗之後，好多人都會選擇搵 Part-time 或暑期工，唔單止可以搵到自己「第一桶金」，更加可以積累經驗、認識唔同嘅人、嘗試體驗社會工作。搵工途徑有好多，例如上勞工處網頁、各種搵工網頁（要留意網頁及公司嘅可信性）、直接到店鋪應徵等等。比較常見嘅工作有以下呢幾種：

 

  • 餐飲、零售店——侍應、售貨員、服務員

優點：有更表，時間較爲固定；可以接觸到唔同人

缺點：大部分時薪都會較補習低；有時工時會較長

 

  • 補習社——功輔班、專科班導師

優點：唔使成日企，較為舒服；對功課、教小學生等工作比較簡單；通常因應情況只需要返幾個小時或半日

缺點：要面對同處理唔同類型嘅學生，要有一定耐心同應變能力

* 需要注意補習社係咪教育局註冊機構，同埋係咪合符教育局條例嘅要求！

（小編試過喺一間「提供非正規課程的註冊或臨時註冊私立學校」嘅樓上補習社做功輔班導師，咁啱遇上教育局人員巡查，先知道原來呢種類型嘅補習社有課室容納學生人數嘅限制，超過咗就係違規，而就算係兼職教員都會受到牽連！所以應聘之前或之後真係要問清楚！）

 

  • 私人補習

優點：方式、時間都比較有彈性；時薪因應學歷、成績、學生程度而決定，但相對其他兼職人工較高

缺點：未出 DSE 成績會比較難搵到；需要識得同學生、家長溝通

 

  • 各種展覽、書展——推廣員、工作人員

優點：短期工作；無需要特別技能；除咗書展以外一般工作量都唔大

缺點：書展需要成日企；要面對同處理唔同人嘅詢問

 

  1. 學習理財及投資

 

中學畢業就要開始經濟獨立，所以要開始開設返銀行戶口，學習一啲理財知識，例如活期存款、定期存款、零存整付、利息、信用卡等等相關常識，再決定自己嘅理財方式。

 

另外，亦可以開始接觸一啲投資或股票知識，但唔好急於實踐，「投資有風險」，要了解清楚、考慮清楚先好試，儲蓄都唔好全部用嚟投資！而家都有唔少模擬股票買賣嘅平台，啱啱畢業未有資本，都可以趁呢段時間先累積經驗同知識。

 

  1. 整理筆記及教參書

 

考完 DSE，屋企肯定堆咗唔少書、練習同筆記，但唔好急住扔先，佢哋仍然好有用！放榜之後，如果知道自己已經穩陣唔使重考，就可以將各科二手教科書放售，除咗二手平台之外，旺角、觀塘、葵芳等地方都有唔少專門收購舊書嘅地方，再唔係都可以捐贈比慈善機構！

 

至於做過寫過嘅練習同埋筆記，其實都對於私補好有用。例如可以將啲學校工作紙、模擬試卷等題目 scan 上電腦再塗走答案；將自己寫嘅筆記、學校筆記、補習社筆記都 keep 返等等，系統整理返自己有嘅學習資源，到時候補習自然會用得上。如果自己成績唔錯，甚至可以整理返啲實用嘅筆記出嚟賣。

 

四、娛樂類及其他

 

  1. 畢業旅行

 

以前一考完 DSE，各位準畢業生總會一窩蜂涌去唔同地方旅行，體驗同一班朋友一齊旅行或獨自出走嘅滋味。可惜而家受疫情所限，大家邊度都無得去，就只好用唔同方式替代啦，例如喺香港尋幽探祕行下山、野餐、去酒店 Staycation、去下唔同工作坊、約朋友一齊玩下等等。

 

  1. 運動

 

終於脫離高中忙碌嘅生活，就無藉口唔做運動啦！暑假呢段空餘嘅時間，最好就係培養返運動嘅習慣，無論係室內定室外運動例如做 gym、跑步、打籃球、游水、打羽毛球等，都任君選擇，甚至可以嘗試一啲非傳統嘅運動項目，例如瑜伽、打拳、射箭、溜冰、滾軸溜冰等等，揀一啲自己有興趣嘅活動，順便減下肥嘛！

 

  1. 做義工

 

上面好多提及過嘅活動，除咗爲興趣都好似好功利，但係作爲社會嘅一份子，大家喺暑假都可以做一啲更有意義嘅事——做義工。好多社福機構都會招募義工，例如惜食堂、東華三院、保良局、紅十字會，甚至各區嘅社區中心等等，義工活動亦有好多種，例如賣旗、探訪長者、做動物義工、環保清潔運動、送暖活動等，甚至可以加入一啲機構做活動籌委會等等，幫到人同時又可以拓寬社交圈子。

 

以上就係 NoteSity 小編對於暑假有咩可以做嘅分享，希望可以比各位一啲參考，喺 DSE 之後迷茫或無所事事嘅生活之外搵到一啲新嘅目標！

 

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類