🤔「HKU BA 讀咩？」、「港大文學院係咪淨係讀文學？」、「HKU BA 乞食？」

相信好多人見到 JS6054 Bachelor of Arts (BA) 文學士 呢個名都會發出以上嘅疑問，覺得文學院就係讀文學、Faculty of Arts 就係讀 Arts，但係實際上 HKU BA 當然唔止有文學同藝術！

佢最吸引嘅地方，就係有唔同嘅科目可以自由選擇，所以佢其實特別適合鐘意文學、文化、歷史、語言、藝術、哲學、音樂等等嘅同學修讀。

當然，佢吸引嘅地方亦唔止呢樣，就等 NoteSity 小編帶你深入認識 HKU BA 啦！

 

文章目錄

一、BA 課程簡介
二、HKU BA 課程特色
三、JUPAS 收生分數及準則 (包括：admission score, interview 面試安排等等)
四、BA 出路
五、關於讀 BA 常見問題
六、附：HKU BA 學院網頁連結

 

一、BA 課程簡介

港大文學士係一個4年制嘅課程，同其他大專院校唔同，佢唔係以學系方式招生，係以學院方式招生，俾學生喺入讀後再慢慢發掘自己嘅興趣，確立發展方向，規劃自己嘅人生藍圖。

新生可以喺第一學年自由選修感興趣嘅課程，透過接觸唔同學科嚟探索自己嘅興趣。首個學年結束嘅時候，學生須選擇至少一個文學院嘅主修科目，喺第二年至第四年繼續修讀。

文學院下有四大學院，包括中文學院、英文學院、人文學院同現代語言及文化學院，另外又設有佛學研究中心。文學院嘅學系涵蓋範圍大，提供多個學科俾學生選修。

文學院一共有30幾個學科，包括23個主修學系同30個副修學系。其中，中文系、中史系、翻譯系、英文系、歷史系最為熱門。

除此之外，人文學院嘅哲學系、語言學系、比較文學系、性別研究系等俾中意觀察、分析同理性批判嘅學生一展所長。而對外國語言同文化充滿好奇嘅學生就可以選讀現代語言及文化學院嘅課程，從鄰近亞洲地區嘅日語、韓語、泰語，熱門嘅歐洲語言如西班牙語、德語、法語、意大利語，到冷門嘅外語如阿拉伯語、葡萄牙語、瑞典語等，港大文學院都應有盡有，確保學生有多元化嘅學習體驗。學習一種新語言有助同學拓寬視野，俾佢哋喺日趨全球化嘅環境下更有競爭力。

 

二、HKU BA 課程特色

1. HKU BA 課程選擇多樣 🎨

a) 學科種類多元化 🎭

HKU BA 適合鐘意文史哲、語言、藝術、音樂等範疇嘅同學修讀，因爲佢裏面嘅課程種類足夠多樣化，主要包括四個學院裏面 22 科主修同 30 科副修課程：

 

b) 學科跨範疇元素 🎬

HKU BA 有唔少科目都比較多元化，而且內設嘅課程都有跨範疇嘅元素，例如：

  • 比較文學會涉及性別研究、文學、電影等；
  • 環球創意產業會涉及影視媒體、文化理論、市場管理等；
  • 中國語言及文學、中國歷史文化都有部分課程都同性別、電影、城市等有關；
  • 而各地文化研究都涉及歷史、文化、社會等元素；
  • 性別研究更加係學院新開設嘅學科，涉及中外文化理論、名人、歷史……

由於 HKU BA 係大類收生，所以 Year 1 嗰陣可以先嘗試唔同課程，Year 2 開始先選擇 Major / Minor。當初小編未好肯定自己嘅興趣，唔想令自己後悔，就係因爲見到有咁多科目可以嘗試，而且都比較新鮮，所以先喺 CU 中文系同 HKU BA 之間選擇咗 HKU BA。

有興趣了解各科目內容詳情，可以通過文章最後附上嘅網頁連結，去唔同學院網站研究下！

 

2. HKU BA 選科自由 ✅

「雖然話有好多學科任君選擇，但係唔夠 Credit 讀都無用啦！」唔使擔心，HKU BA 嘅課程結構彈性都好大，Major / Minor 嘅要求唔高，好多人都會選擇讀幾個 Major / Minor 。 

 

a) 課程結構 🛠

香港大學文學史課程 Bachelor of Arts 爲期四年，每年有三個學期：Semester 1、Semester 2 同 Summer Semester。（Summer Sem 非強制修讀，多數同學都會用嚟補 Credit）

每個 course 等於 6 個 credits，四年共需要修讀 240 個 credits（即共 40 個 course），每個 Semester 需要修讀 24-36 credits（即共 4-6 個 course）。

除咗 Major / Minor 嘅 course 之外，HKU BA 學生必須修讀一下共 54 credits嘅課程：

  • Year 1 必須讀 1 個 Core University English Course；
  • Year 2 必須讀 1 個 English in Discipline Course；
  • Year 3 必須讀 1 個 Practical Chinese Course；
  • 頭三年內必須讀 6 個唔同範疇嘅 Common Core Course。

文學院大部份 Major 都係要求修滿 72 credits，Minor 就 36 credits，所以好多人都會選擇修讀「2 Major」/「1 Major + 1 Minor」/「1 Major + 2 Minor」，不過當然，淨係選擇讀一個 Major 然後其他 course 全部都係 free electives 都得啦！

（咩係 Free electives？即係計 credit 但係唔計落 Major / Minor 裏面，自由選擇修讀嘅其他學院課程，通常同學會爲興趣同拉 grade 而揀 Free electives。）

 

b) 選修甚至主修跨 Faculty 課程 🧩

可以修讀其他學系或學院課程，並非 HKU BA 獨有，不過由於 HKU BA 嘅課程比較鬆動，所以比起其他 Faculty 會更多機會讀 Free electives。而同大部份學系或其他大學唔同，只要滿足到該 Faculty 學科要求嘅 credits，HKU BA 甚至可以比你 Major / Minor 其他 Faculty 嘅學科添！

好似小編身邊嘅同學，有人 Major BA 嘅英文同 Minor Journalism（新聞及傳播）；亦有人 Major BA 嘅中文同 Minor Social Science / Business 嗰邊嘅學科。

所以如果 DSE 嗰陣唔夠高分入其他 Faculty，都可以考慮入讀 HKU BA 然後修讀跨 Faculty 嘅課程圓夢！

 

三、JUPAS 收生分數及準則

HKU BA 每年收生超過三百名，入學唔需要面試，只以學生嘅公開試成績為收生依據。
自2019年起，港大採用新嘅計分方式，學生如果喺文憑試考獲5、5*、5**，佢嘅入學分數換算就會由5、6、7改為5.5、7、8.5，更有利於個別科目優異嘅學生入讀。

HKU BA 收生只計最佳五科嘅成績，2020年最高上四分位收生分數係26， 而最低嘅係24。

其實，HKU BA 無疑係 HKU 咁多個學院其中最容易入嘅一個，競爭唔會太激烈。但要留意嘅係，2020 年被取錄嘅 JUPAS 申請者裏面，有100% 都係將佢擺喺組別 A，所以如果想入 HKU BA，記得將佢擺入組別 A。

另外，如果你覺得自己考得普通，或者仲未知自己對咩科有興趣，都可以考慮申請文學院~ 
啱啱提到，文學院學生可以選擇 Major / Minor 其他學系嘅科目，所以如果入唔到心儀學系，HKU BA 亦可以成爲你嘅「水泡科」。但要留意嘅係，必須要有一個 Major / Minor 係屬於文學院內嘅科目，所以建議你多多少少都要對文科有啲興趣先好揀。

另外要注意嘅係，某啲科目有特別嘅修讀要求，例如翻譯課程要求要有 DSE 中文、英文 5 或以上嘅成績；School of English 嘅課程要求要有 DSE 英文最低 5 嘅成績。

 

(🔎 其他年份嘅收生分數可以到 Google 搜尋：HKU BA Admission Score 20xx)

 

四、BA 出路

文學院畢業生嘅出路都幾多，由公營機構如政府行政，到其他行業如教育、法律、管理、金融、商業、新聞、文化藝術等都有文學士嘅足跡。

由於文學院主修學科多，所以較難單一概括就業前景，但對港大文學院生嚟講，4年大學生活中學到嘅知識同體驗一定會成為佢哋投身社會嘅一大助力。

 

五、關於讀 BA 常見問題

1. HKU BA  乞食？ 

揀得文科，當然預咗未來嘅出路無讀醫科、法律、商科等咁直接或者賺錢賺得多，但係小編唔會覺得 HKU BA 係「乞食」。

首先，就業選擇反而不受局限。有啲學系完全係職業主導，將來嘅出路都非常專業、劃一，係一條大直路，對於有清晰方向嘅人而言當然非常好。但係同時，專業性質強都表示你一旦選擇咗就無得返轉頭，萬一後悔付出嘅代價會更大，所以讀文學院反而可以比你自己探索未來嘅方向，而且將來可以從事嘅職業更加多元化。文學院嘅畢業生出路都幾多元化，例如有做公關、傳媒、出版廣告、政府工、老師等，甚至會創業，而有讀其他國家文化研究或語言嘅人會投身外資企業。

其次，大學有就業方向嘅支援。除咗香港大學本身有 Career Planning 支援、針對畢業生或實習生嘅搵工網外，文學院本身都有提供一啲 Intern，某啲課程仲會直接要求實習，所以選擇其實都唔少。

其實乞唔乞食其實都係視乎自己嘅個人能力，同埋喺大學幾年裏面有無把握機會累積經驗（例如做 Intern、Exchange、上莊等等）、充實自己，所以小編個人認爲，除非目標非常大，唔係架話都唔需要太擔心。

 

2. 文學士係唔係喺職場上比較冇競爭力？

4年嘅文學院課程可以培養學生喺唔同領域嘅能力，如加強語文能力、掌握一門新嘅語言、拓展人脈、加強表達同溝通能力等，呢啲都為學生之後投身職場建立咗基礎。咁多年嚟，港大文學院畢業生喺各行各業都人才輩出，睇得出個人成就在於自己嘅努力同抉擇。
只要你把握機會，勇於嘗試，用4年時間好好裝備自己，就一定可以喺職場上發光發熱。

 

3. 第一年就要揀定 Major / Minor？

Year 2 開始先要 declare Major / Minor，所以 Year 1 嘅時候可以嘗試唔同科目嘅課程，但係要留意某啲課程會要求你 Year 1 有讀 Intro course 先可以 declare 到，所以一開始都係要有大致嘅方向，唔好太花心！XD 

 

4. 讀 BA 英文要好好？

文學院裏面除咗中文學院嘅課程係用中文讀之外，其餘全部都係用英文讀，而且 reading 都會比較多，多數科目期末都係寫 essay 多過考試。所以如果唔係讀中文的話，都要留意自己嘅英文能力足唔足以應付。就算係讀中文，都要留意有必修嘅 Common Core Course、University English Course 等，但係其實認真啲就會應付到。小編身邊嘅同學都係 DSE 英文有 4 或以上，如果有 Level 4 程度會比較應付到。

 

5. 文學院學系嘅功課會唔會好多？

文學院學生只須最少修讀96學分就可以主修一門學科，而修讀36學分又可以再副修另一門學科，所以大多學生都應付到學業。
而文學院對學生選修學科冇任何限制，所以好多文學院生都選擇雙主修。
除咗文學院外，學生仲可以選擇其他學院如商學院、社會科學學院、科學學院等提供嘅學系作為第二主修，咁樣仲可以具備到唔同領域嘅知識。

 

六、附：HKU BA 學院網頁連結

香港大學文學院（Faculty of Arts）：https://arts.hku.hk/
中文學院（School of Chinese）：http://web.chinese.hku.hk/main/
英文學院（School of English）：https://english.hku.hk/
人文學院（School of Humanities）：https://arts.hku.hk/page/detail/514
現代語言及文化學院（School of Modern Languages and Cultures）：https://smlc.hku.hk/

 

📚 以上就係 NoteSity 小編嘅分享啦，希望你地睇完呢篇文章會對 HKU BA 有更深入嘅了解，從而可以更慎重咁選擇想讀嘅科目啦！祝大家最後可以直入 A1！🔥

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類