😣:「JUPAS選科入大學，首要考慮應該係興趣定係前途？我對某大學學科好有興趣，但因為前途問題不得不放棄。」

😼：「小編知道好多同學都遇到相同嘅問題，小編喺呢篇文章會逐一解答〜」

 

一、JUPAS 選科三步曲👣

相信各位中六同學對於 JUPAS 選科一事非常緊張，因為選科係一個重大嘅決定，亦可以話係人生分水嶺，將會影響你地未來嘅路。小編認為 JUPAS 選科有以下三個重要步驟：

 

第一步：認識自己👤

第一步理所當然就係要認識自己！小時候，每個人都會幻想自己將來嘅職業係咩。有啲人可能立志成為醫生，有啲人可能想做老師，而無論你地細個嘅諗法有無改變，依家呢一刻你地都要重新問下自己：「我將來想成為一個點樣嘅人？我嘅興趣同邊種職業掛勾？我嘅性格適合咩工作？」

除左認識自己嘅性格、興趣同理想之外，能力都係唔可以忽略嘅一項重要指標。相信各位同學係中學讀左六年，對自己嘅能力都有一定了解，例如你喺理科嘅成績較文科好、你有良好嘅辯論能力等等，小編建議同學要揀翻自己能力所及嘅科目，以免入讀嗰科之後，會感到力有不逮。

 

第二步：根據自己現在的學科作出篩選📥

唔少同學都唔知自己嘅興趣係咩，亦唔知咩科適合自己。其實，你地可以根據自己現在嘅學科作出篩選。你地喺中三嘅時候基本上都選過一次科，經過呢三年嘅洗禮，你地對選擇咗嘅學科係興趣不減定係當初嘅興趣已經慢慢磨蝕左？

例如依家呢刻，你修讀緊企業、會計與財務概論，同時保持住對呢一科嘅濃厚興趣，自己喺呢一科嘅表現亦不俗，咁於大學修讀有關經濟嘅科目可以係一個選擇。又例如喺呢三年時間，你發現自己並唔適合讀理科，反而自己都係熱愛文科，咁 JUPAS 選科嗰陣可以遵從翻呢個方向〜💪🏻

第三步：留意各大學院每科的收分要求📈

最後，各位同學要留意各大學院每科嘅收分要求。每年嘅收分要求都會有少許調整，你地可以按照自己心儀科目嘅收分而訂立目標。同時，各科收分可以作為你地 JUPAS選科時，排序科目嘅根據。

二、興趣 VS. 前途？⚖️

JUPAS 選科應該興趣定前途行先？好多同學有呢個疑惑，小編認為並無既定答案，亦視乎個人際遇同接受程度。小編為同學設計左三種情境，而呢三種情境都會有唔同結果，睇下你地接唔接受到某啲殘酷嘅結果，從而反思自己應該係邊啲範疇努力，選擇適合自己嘅路。

 

情境一：同學A以興趣行先，入讀了視覺藝術文學士。然而，這科在香港的畢業出路較狹窄。👩‍🎨

  • 選擇興趣科的條件：
    • 你並唔係三分鐘熱度，呢個興趣已培養多年，係你生活嘅一部分。
    • 你有決心可以將自己嘅興趣發展成為事業，例如有些人熱衷於製作甜品，並從網店慢慢開設實體店，逐步建立自己的品牌。
    • 你願意喺呢一科投放更多心機，有信心能夠突圍而出，做得比其他人好。
  • 結果一：
    • 所謂「行行出狀元」，同學A畢業後憑著努力，投身設計行業，作品受人賞識，前途一片光明。（興趣行先可能助你得到光明前途）
  • 結果二：
    • 喺香港發展設計專長較難得到別人的賞識。同學A畢業後有機會找不到合適的出路，喺職場上渾渾噩噩，懷才不遇，收入微薄。（興趣行先可能只係烏托邦）

情境二：同學B以前途行先，入讀了職業治療學系。雖然這科保證了穩定的收入，但他對這科並沒有很大的興趣。👩🏻‍⚕️

  • 選擇前途科的條件：
    • 即使興趣不大，仍然願意投放時間同心機喺嗰科。
    • 有興趣投身與科目相關的行業。
    • 追求穩定、討厭漂泊和變化。
  • 結果一：
    • 同學B入讀職業治療學系後，逐漸培養出對嗰科嘅興趣，揾到一份使命感。畢業後，佢成為一名職業治療師，不但有穩定嘅收入同生活，對於工作，佢亦都樂在其中。（前途行先可能令你從中建立興趣）
  • 結果二：
    • 同學B入讀職業治療學系後，對呢科完全無興趣，成績一落千丈，愈發氣餒。畢業後，佢雖然成為一名職業治療師，有穩定嘅收入同生活，但佢對重複嘅工作感到厭倦，並唔快樂。（前途行先無法支撐日復一日嘅沉悶）

情境三：同學C結合興趣和前途，入讀了工商管理學士。👩🏻‍💼

  • 結果：同學C畢業後有穩定嘅收入同生活，同時寓興趣於工作中。
  • 小編認為最理想嘅做法就係興趣同前途兩兼得，呢種中庸之道就較為保險。

三、小編的 JUPAS 選科經歷✏️

小編當年選科嘅時候都好似一隻盲頭烏蠅咁，見到咁多科覺得眼花瞭亂。一開始，小編根據自己預計嘅分數擺左工商管理喺A1。但後來又覺得自己並唔適合讀呢科，因為小編唔係一個中意計數嘅人，對商業嘅野亦不感興趣，所以就一直改嚟改去。

當時見到其他同學都好清楚自己嘅目標係咩，小編覺得好羨慕。但小編就一直揾唔到自己嘅興趣，所以最後就衡量到自己係一個追求穩定嘅人同前途問題，選擇左並不是全無興趣嘅護理科。

升左大學後，小編發現前途真係比想像中重要，因為當我地出到社會之後，就要開始為生活煩惱。小編身邊就有唔少人都擔心畢業之後嘅出路、擔心揾唔到工作做。所以，希望同學仔選科時都可以兼得興趣同前途〜😍

 

四、如何找到自己的興趣？🧐

咁你地選科時可以點揾到自己有興趣嘅學科？小編就有以下意見：

 

1. 尋求身邊的人的意見👨‍👩‍👧👩🏻‍🏫👱🏻‍♀️

你地可以問下信任嘅人意見，如父母、老師同師兄師姐等。尤其係師兄師姐，佢地作為過來人，一定可以提供有用嘅意見俾你地，令你地更了解嗰科嘅性質、增加認識。

 

2. 參加有關生涯規劃的活動🎭

另外就係多啲參加有關生涯規劃嘅活動〜相信學校都有提供好多呢類型嘅講座或者工作坊，你地可以積極參與，從而去揾到自己有興趣嘅職業。

3. 做職業定向測試🕵🏻

正如一開始所講，要揾到自己有興趣嘅學科屬於認識自己嘅一環。你地不妨做一些職業定向測試，了解自己嘅性格究竟係屬於支配型、影響型、穩定型定係謹慎型，咁樣有助你地收窄範圍。

最後，小編祝各位同學選科順利，直入A1!💛💛😼

 

*以上文章內容純屬作者個人分享，並不代表本網站之立場。

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類