要備考 DSE，除咗參考書、補充練習之外，坊間都有唔少大小型補習社嘅 DSE 筆記、5** DSE 筆記等等可以選擇。但係呢啲坊間嘅 DSE 筆記嘅質素參次不齊，甚至有時買咗返嚟會好似用唔着，內容似乎有啲雞肋……但係如果買到好嘅 DSE 筆記，的確可以「慳錢慳力慳時間」，唔單止溫書嘅時候事半功倍，有時仲可以提高考試分數。

 

咁究竟揀 DSE 筆記嘅時候有咩要注意？自己又適合買邊啲 DSE 筆記？點樣先爲之好嘅 DSE 筆記？NoteSity 小編收到呢啲問題，而家就嚟分享下點樣挑選適合自己嘅 DSE 筆記啦！

 

目錄：

一、審視自己的需要

  1. 購買原因

  2. 目標：打好基礎 / Aim 5+？

  3. 中四 / 中五 / 中六分別適合買邊啲 DSE 筆記？

二、尋找 DSE 筆記

  1. 購買途徑

  2. 注意信譽及版權問題

  3. 注意筆記評價

三、審視 DSE 筆記內容

  1. 審視 DSE 筆記內容途徑

  2. 內容一針見血

  3. 內容抽絲剝繭

  4. 排版、釘裝舒適

 

一、審視自己的需要

 

DSE 嘅備考時間可謂分秒必爭，而且有啲筆記對其他人有用，但係未必對自己有用，所以想要喺有效時間之內提高分數，自然要對症下藥，買筆記之前當然需要先審視自己啦！買之前，先問下自己幾個問題：

 

  • 點解要買 DSE 筆記？

  • 想達到咩目標？邊種 DSE 筆記先符合自己嘅目標？

  • 買完 DSE 筆記返嚟會唔會溫？有無時間溫？

 

  1. 購買原因

 

買 DSE 筆記之前，第一步先要清楚自己買嘅原因，先會知道自己需唔需要 DSE 筆記，千祈唔好人買你又買！小編整理咗一啲同學通常買坊間 DSE 筆記嘅原因：

 

  • 想學返啲老師唔會講嘅答題技巧

  • 想學更多例子、佳詞佳句、範文等等，可以運用喺考試裏面

  • 學校老師教得慢、有缺漏或者質素欠佳

  • 補習社上堂比較貴，所以買筆記返嚟自學

  • 老師教完之後都唔係好明，需要清 concept

  • 學校教科書同派發嘅筆記太多太混亂，自己唔識點整理

 

  1. 目標：打好基礎 / Aim 5+？

 

知道咗自己點解要買 DSE 筆記之後，就要因應自己嘅能力同程度，睇下自己想打好基礎定係追求 5 或以上嘅成績，然後先挑選唔同嘅筆記。

 

想打好基礎嘅同學，最好就先買一啲整合考試知識重點、清 concept、整理 Past Paper 一啲題目事例同答題技巧嘅筆記。例如中文卷一嘅十二篇範文筆記、英文卷二 Writing Skills Notes、通識科題型及答題技巧筆記、數理科按主題整理嘅精讀筆記等等。

 

至於追求 DSE 5 或以上成績嘅同學，除咗上面一啲整理答題技巧、歷屆試題重點等嘅考試導向 DSE 筆記之外，仲可能更多增潤類嘅筆記。例如中文卷一文言文筆記、中文卷二卷四例子集 / 作文範文、英文 Vocab / Sample Essay 筆記、通識科例子集等等

 

當然，有啲比較好嘅 DSE 筆記，可能會有齊上述嘅所有內容，咁就唔使糾結啦！

 

（偷偷地講句，上述提及唔同類型嘅 DSE 筆記，唔少係 NoteSity 網站 都有賣㗎！）

 

  1. 中四 / 中五 / 中六分別適合買邊啲 DSE 筆記？

 

中四中五嘅同學時間比較充裕，係最應該打好基礎嘅時候，但係由於學校未教曬 DSE 考試嘅內容，所以除咗最基本整合考試知識重點、清 concept嘅筆記之外，反而可以再花多啲時間喺中英文科嘅增潤類筆記，襯仲有時間提高自己語文水平。例如啱啱提到嘅中文卷一文言文筆記、中文卷二卷四例子集 / 作文範文、英文 Vocab / Sample Essay 筆記等等。中六嘅時候會無咩時間比人提高語文水平，所以中四中五打好中英文科基礎，對於未來考 DSE 真係好重要！

 

而中六同學時間有限，而且需要溫嘅範圍比較多，仲要花好多時間喺操 Past Paper上面，所以主要可以買一啲精讀、考前急救、懶人包等形式嘅筆記，例如包括所有考試重點、答題技巧嘅筆記、整理咗 Past Paper 伏位、Marking Scheme 重點等嘅筆記尤其有用。

 

二、尋找 DSE 筆記

 

  1. 購買途徑

 

  •  NoteSity 、HKDSEGAYAU 等有售賣 DSE 筆記嘅網站

  • Instagram 上唔少嘅 DSE 分享帳號或前 DSE考生製作嘅筆記

  • 二手平台（如 Carousell）

 

  1. 注意信譽及版權問題

 

喺 IG 上買筆記嘅時候，需要留意帳號嘅可信度，例如分享嘅內容係咪真實用心、運營時間有幾耐、作者學歷係咪如聲稱嘅一樣（可能會聲稱自己係 5**）、有幾多 followers等等。另外，由於 DSE 筆記經常係好容易被翻印轉售嘅產品，有時都可以睇下係咪原作者授權售賣，保護返作者嘅版權。

 

  1. 注意筆記評價

 

買之前當然要睇下其他人對於筆記嘅評價，但唔好一味睇好評，畢竟如果係差評的話店家都唔會擺出嚟，有啲網站好似 NoteSity 咁更加有顧客評分，都可以做參考。

睇評價嘅時候，都需要睇返留評嘅學生屬於中幾、本身能力或程度如何、目標分數、需求等等，因爲啱佢地嘅未比會啱自己，所以都需要考慮返佢地同自己嘅情況是否相若。另外，人地嘅評價好多時候都會涉及筆記嘅內容、排版問題、實用度等，咁就可以審視份筆記係咪啱自己啦！

 

三、審視 DSE 筆記內容

 

  1. 審視 DSE 筆記內容途徑

 

  • 筆記樣本（Sample）：唔少有賣 DSE 筆記嘅網站或者 IG Account 都會有提供部分筆記樣本比人預覽，可以大概睇到筆記內容嘅質素、排版、特點等等。如果賣家未有提供樣本，或者想了解多少少筆記嘅內容，同學都不妨私訊問下！如果係買二手筆記，都可以問下賣家幫手影幾頁睇下，而且都需要留意裏面會唔會有比較多熒光筆或原子筆痕，因應情況決定買唔買。

  • 上網搜集不同評價或圖片：除咗睇賣家提供嘅一啲筆記評價之外，都可以試下上網搵有無人喺其他地方（如討論區網站）評價過份筆記，有時可能都會有相可以睇，特別係比較出名嘅補習社筆記。

  • 問人借：可以問下身邊嘅同學朋友、師兄師姐、親戚等有無買過或聽過嗰份筆記，如果佢地有的話亦不妨問人借嚟望下！

 

  1. 內容一針見血

 

小編喺前面都提到唔少類型嘅 DSE 筆記，有雞精型、考試技巧型、增潤型等等，如果筆記重複教科書裏面已有嘅內容，當然就唔算得上係好嘅筆記。好嘅筆記除咗歸納教科書同考試內容之外，亦需要結合唔同特點，例如重要嘅例子、避開中伏位嘅提醒、Past Paper 或 Marking Scheme 裏面需要留意嘅地方、背誦方法、思考方法等等，內容以針對考試爲主。

 

  1. 內容抽絲剝繭

 

DSE 各科要溫嘅內容繁多，所以好嘅筆記應該要將考核內容抽絲剝繭，濃縮成精華，整理得層次分明、簡單易明，例如跟唔同 Topic 嘅深淺、因果關係等排序，又或者會整理唔同 Topic 嘅相關內容做一個比較表格等。而有啲優質嘅筆記嘅精華內容甚至可以令人喺考試前唔睇書，淨係溫筆記。

 

  1. 排版、釘裝舒適

 

DSE 筆記排版係影響同學容唔容易溫書嘅重要因素，坊間主要有兩種筆記，一種係電腦文字筆記，一種係手寫筆記，同學可以因應自己嘅喜好選擇。如果係電腦文字筆記，同學可以睇下筆記整體係咪整齊統一、行距字距唔會密密麻麻（如果有鬆動空位可以寫到自己嘅筆記就更好）、大標題小標題、符號、內容重點係咪簡單清晰等等。如果係手寫筆記，就需要留意字體係咪整齊易睇、Highlight或原子筆嘅顏色會唔會好花、會唔會令人睇落去覺得好亂等等。當然，都係要因應個人嘅接受程度，好似小編咁有啲強迫症嘅會更鐘意電腦打字筆記。

 

另外，都可以留意下筆記嘅大小、釘裝係咪方便使用或者攜帶？例如通常 A5 尺寸會比較便攜，如果係同樣頁數 A4 會顯得比較薄；而有線圈、膠板封面嘅筆記會比較耐用，騎馬釘裝就容易反摺等。

 

有啲優質嘅筆記未必會中曬所有特點，但仍然對於同學有幫助，所以選擇 DSE 筆記嘅時候最重要就係經過自己深思熟慮、覺得適合自己、睇得舒適就可以，千祈唔好人云亦云。另外，筆記都唔係萬能，要有所進步都係需要自己勤力溫習、勤操 Past Paper！

 

以上就係 NoteSity 小編分享嘅選擇合適自己嘅 DSE 筆記嘅方法及注意事項，最後希望各位未來嘅 DSE 考生可以搵到一本好嘅筆記，幫助你更上一層樓，奪取佳績！

 

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁呀！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 網上購買 DSE 溫習筆記、補充練習與參考書：熱門產品 | 優惠套裝 | 產品分類