DSE 中文卷一(閱讀卷)成日比人話係死亡之卷。但其實呢份卷都自有一套固定嘅答題方式,只要掌握到箇中技巧,拎分就唔係一件難事。以下 Notesity 小編將會同你地折解大部分嘅題型,希望可以幫你地應試。🤩✨✍🏻

A. 中文卷一答題技巧

⏰ 時間管理:

  • 白話文(45-50 分鐘)
  • 文言文 (20-25分鐘)
  • 小編建議盡量預留時間覆核試卷

 

👀 閱卷次序:

小編建議先細心審題,留意題目關鍵字,之後先睇文,喺睇文過程順便揾題目嘅答案或相關關鍵字。

同時要留意每題嘅分數分配,從而控制答題篇幅,節省時間。

 

✍🏻 答題次序:
小編建議順序做,完成一部份再跳下一部份。否則的話會好容易令自己思緒混亂,亦有機會漏答題目。

而對白話文無信心嘅同學,亦可以先做文言文部分,避免唔覺意花費大量時間喺白話文到。

做緊白話文題目時,同學亦都可以先完成簡單選擇題,增強信心。

最後一點,好多同學可能會問如果真係唔識答點算,如果遇到咁嘅情況,小編建議你地可以嘗試留意下其他題目嘅字眼,因為題目之間互有提示,例如,留意下一題會唔會係承上題咁答,而呢一題可能會唔覺意講左篇文嘅中心思想,或者會有情節暗示。

 

B. 白話文五大題型拆解🔨

同通識科一樣,DSE 中文閱讀卷都會視乎各種題型而有唔一樣嘅答題方式。

小編整合左一啲常見題型同埋答題框架,可以幫你地知道要答啲咩先攞足分數,亦都可以令你地個答案更加飽滿。

 

1. 分段+段落大意

呢類題目連續幾年都有考,難度在於要歸納。如果分錯段,後面寫嘅內容大意都唔會有分,可以話係比較極端又容易失分嘅題目。

👁 要正確分段,你地可以留意:

  • 過渡段:段落之間夾住嘅小段落,通常代表情節上會有轉折,亦可以有承上啟下嘅作用。
  • 折詞語:每段開首有無轉折詞語 (例:但、然而、卻)
  • 文章結構(例:説明文會有總分總嘅模式,可以按此分段)
  • 時間推移(例:頭一至三段講小學時期嘅事,四至六段講中學時期嘅事)
  • 空間推移(城市➡️家鄉)
  • 內容轉變 (失落➡️開心)

至於寫段落大意方面,小編建議避免抄太多文章語句,要用自己文字概括。

✏️ 寫段落大意嘅基本格式:

記敘文

  1. 記述(時、地、人、事)
  2. 描寫(景色/事物)
  3. 帶出(道理、意義)抒發 (情感)

說明文

  1. 舉出/透過 (例子)
  2. 說明/帶出(道理)

 

2. 布局作用題

呢類題目會引用原文句段,問佢喺結構上起左咩作用。而結構作用通常都有呢幾樣:

  • 文首:開宗明義、鋪墊下文、引起懸念等等
  • 文中:承上啟下、轉折
  • 文末:首尾呼應、留下餘韻、深化主題等等

答題方式可以係咁:

  • 作用 (承上啟下)+ 概括上文+ 如何啟下  
  • 作用 (首尾呼應)+ 概括開首、尾段嘅意思 + 如何與尾段呼應 (找相似點)

 

3. 象徵題 (深層意思)

呢種題目考你地掌唔掌握到文章最深層嘅意思,例如以前問過橋、跑道、第九味象徵啲咩,難度最高。

小編建議你地答題嗰陣:

  • 從橋、跑道、第九味等重點字眼嘅表面意思推敲象徵事物 (例如:橋嘅表面意思係連接唔同嘅地方➡️深層意思就係連接人同鄉土)
  • 分別寫本體同喻體嘅特質
  • 再緊密扣連一齊➡️兩者同樣兼顧呢個特質⋯所以⋯

 

4. 寫作手法題

呢種題型比較直接簡單,但就要留意翻點樣先解釋得完滿。

舉幾個例子講下答題要點:📝

  • 比喻(明喻/暗喻/借喻):解釋本體同喻體係咩 + 作用 (使事物形象更生動有趣…)
  • 諷刺:指出該詞語帶原本帶正面意思 + 詞語本意 + 作者反用詞語嘅深層意思
  • 襯托(正襯/反襯):主角嘅行為舉止 + 配角嘅行為舉止 ➡️分別概括成兩種特質 + 以配角嘅特質襯托主角嘅特質
  • 動作描寫:指出做左咩動作 + 呢個動作反映左啲咩 / 刻劃左咩
  • 擬人:指出事物本體係咩 + 如何人格化(賦予左咩人嘅動態俾佢 )+ 作用 

如此類推,只要掌握到呢啲答題要點,就唔駛驚無啦啦比人扣左啲解釋分。而同學得閒都可以記下寫作手法嘅作用,幫助解釋。

 

5. 比較題

有時候,題目可能會改寫原文某一句,之後就想你比較下邊個可取啲。而大部分嘅時候其實原文嗰句係比較好嘅。

要應付呢種題目,有三步曲:

  1. 解釋原本嗰句喺文中嘅重要性 (例如留下懸念,啟發讀者思考、增加文章嘅喧染力、留下餘韻,使讀者意猶未盡、回味無窮)
  2. 解釋改寫後嘅負面效果(例如改寫後,使文章過於平鋪直敘、情感表達過於直白、情節上沒驚喜)
  3. 同時,要結合文章嘅背景嚟作出比較。 例如篇文係講我同父親嘅感情,而原文嘅感情色彩比較含蓄,更能突出我同父親無言以對、但默默關心對方嘅細膩感情,相反,改寫之後,顯得我同父親嘅感情唔深刻……

又或者問你覺得兩篇白話文邊篇寫得較好,同樣有三步曲:

  1. 通常呢兩篇文都有相似之處先會叫你做比較,首先講下自己嘅立場同原因。
  2. 正面:從相異之處揾第一篇文嘅優點
  3. 反面:從相似之處揾第二篇文嘅不足 (例如兩篇文都係諷刺文章,可從諷刺嘅深度作比較)

 

C. 文言文題型拆解

好多同學可能對中文卷一文言文嘅部分無乜信心,但其實文言文嘅問題比較直白,基本上只要將原文譯翻做白話文就係答案。常見嘅題型有:

  • 選擇題
  • 語譯題
  • 填充題
  • 判斷題
  • 比較題
  • 評論題

要應對呢幾種題型,就需要先理解篇文,小編有小小貼士俾你地:

  • 可以先睇題目,再睇篇文,因為題目會有內容暗示
  • 從字詞嘅部首、讀音或前文後理推敲詞義
  • 要對常用嘅文言字詞有基本嘅認識,特別留意「而、乃、其、所、為、與、以、因、於則、之、焉」呢啲字眼。

小編推薦文言文精讀筆記 《虛詞篇》文言文精讀筆記 《實詞篇》呢兩本筆記俾你地👍🏻✨😚 入面整合左好多文言字詞,亦有分享應試技巧,例如運用配詞法、聯想法去推敲詞義。依家喺 Notesity 平台已經有得買啦!✨✨💛

比較題多數會引用另一段文言文,問你呢段喺手法、主題上同本文有無相通之處。答題框架可以係咁:

  • 相通
    • 解釋本文的手法/思想
    • 解釋引文的手法/思想
    • 答:兩者都…… (整合)
  • 相異
    • 解釋本文的手法/思想
    • 解釋引文的手法/思想
    • 答: 本文較……, 而引文缺乏…… (比較)

評論題嘅難度同佔分都比較高。例如叫你以「循其方,由其道」呢個原則評論人物,你地可以咁答:

  1. 先解釋文言句子意思
  2. 你嘅見解 + 原因
  3. 引用文章情節去支持見解
  4. 帶出價值觀/文章深層意義 (親情/ 人生感悟 / 人情冷暖……)
  5. 可以加入日常例子佐證
  6. 扣連如何達到/達唔到句子意思 

今次嘅中文卷一技巧分享就係咁多啦,希望你地可以輕鬆應對呢份 DSE 中文卷。💪🏻🤓✨✨💛

 

🔔 唔想錯過最新優惠、DSE 讀書心得、考試資訊的話,記得要 follow NoteSity Instagram 專頁!你仲可以 click 呢度 免費訂閱 NoteSity 嘅電子報,小編會定期將 DSE 讀書 TIPS、考試攻略分享俾你~ 

 

💭 咩係 NoteSity?NoteSity 是全港最大DSE資源訂購平台,為你搜羅不同導師及出版社的高質 DSE 筆記、補充練習與參考書,一個平台匯聚你需要的 DSE 資源,幫助你考好 HKDSE。

📚 訂購高質 DSE 筆記、補充練習與參考書:中文科 | 英文科 | 數學科 | 通識科 | 理科 | 商科 | 文科

 

下次再同大家分享更多有用嘅資訊~ 記得密切留意啊🥳