DSE 中文卷一（閱讀能力）裏面，有一部分係考核同學對12篇指定篇章嘅認識。雖然範文部分只係佔卷一嘅 30%，但只有呢部分係可以預知到出題嘅範圍，絕對係拎分嘅好機會。不過對於範文點溫，好多同學可能無從入手。以下 NoteSity 小編將會分享溫習範文嘅方法，希望可以幫到你哋！💛🤩

 

文章目錄

一、先將範文分門別類
二、範文要背啲咩？
三、12篇範文考試常見題型
四、即場發揮

 

一、先將範文分門別類

每一篇範文嘅文體都不盡相同，如果先將十二篇範文分類歸納好，就可以幫你提升溫習效率💡 主要嚟講，DSE 中文嘅十二篇範文可以分做四類：

  • 記人
  • 詩詞
  • 遊記
  • 議論

知道範文嘅文體類別，可以令你更加了解每篇範文嘅重點，有明確方向去溫習。例如：

  • 遊記有《岳陽樓記》同《始得西山宴遊記》➡️ 重點溫習作者所寫景色，同抒發咗咩情感。
  • 比較同類型範文嘅異同：《師説》同《勸學》呢兩篇都係有關學習。韓愈同荀子喺學習方式、態度兩方面分別有咩睇法❓💭

同學分好類之後，就可以聯想下唔同指定篇章嘅關聯性，咁就理解得透徹啲，答題目嗰陣更加得心應手。👍🏻

 

二、範文要背啲咩？🧐

小編建議同學要背晒咁多篇範文，範文 past paper 有試過要求考生摘錄原文，而有啲問題嘅答案亦比較直接，只係將原文翻譯做白話文，例如問作者喺西山見到嘅景色有咩特別之處。如果有背到書，呢啲分數就可以十拿九穩。🤩

不過12篇範文咁多，仲要全部都係文言文，可以點樣背？

💛 對照原文同譯文

呢步可以幫你理解篇範文嘅內容大意，亦都可以幫你認得範文詞解、特殊嘅文言虛詞。當你知道文章嘅脈絡，就自然記得文言句子嘅次序。

為求快啲背好書，好多同學可能會囫圇吞棗、不求甚解咁樣去背，但如果唔理解個故事，咁樣只係記緊一大堆毫無意義嘅外星文👽

💛 背默

相信日校老師都會同你哋默一次範文。其實背默呢個最原始嘅方法好有效，因為背默唔單止可以測試你將範文背得熟唔熟，仲可以睇吓你識唔識寫啲字。

小編建議同學循序漸進去默，將一篇範文分為幾個小段，一段一段咁默，最後先一次過默晒成篇文章，咁樣會易背好多！

💛 聲音記憶🔔

曾經有研究指出「聽覺記憶」比起一直望住篇文章嘅「視覺記憶」，更能夠留下深刻印象，溫習效果亦比較好，就好似我哋平時聽完一首流行曲，都會不自覺咁識得唱。

而文言文讀起嚟都琅琅上口，例如係《論仁、論孝、論君子》、詩詞三首嘅句子押韻，可以當做口訣咁背。

💛 複習法

齋背一次係唔夠架，始終 DSE 中文範文有咁多篇，好容易會撈到亂晒。所以小編建議：

  • 經常複習，建立長期記憶
  • 間隔時間要先密後疏，例如係隔日背一次，慢慢增加間隔時間到每三星期背一次

❌❌ 臨到考試之前先再溫翻 ➡️ 因為到時嘅印象已經變得好模糊，等於重新背一次。

💛精選法

如果你真係背唔到好長嘅文章，都可以揀重點嚟背。

就好似《廉頗藺相如列傳》呢篇咁長嘅範文，其實重點都係刻畫廉頗、藺相如嘅人物形象，所以你哋可以背有關人物描寫嘅句子，例如：

  • 「相如持其璧睨柱，欲以擊柱。」（行動描寫）
  • 相如曰：「五步之內，相如請得以頸血濺大王矣！」（語言描寫）

 

三、12篇範文考試常見題型 

除左背範文之外，仲要溫啲咩？小編喺度同大家分析範文常出嘅考試題型，等你哋可以好好準備考試。

💛 字詞句子語譯

  • 仔細溫習範文每個單字嘅詞解，因為同一個字詞可以有唔同意思🌟
    • 例如文言文嘅「固」字，可以解做本來、堅決、姑且等
  • 留意前文後理，判斷字義
  • 特別留意比較艱深嘅關鍵字詞
    • 例如《出師表》嘅「陟罰臧否」
  • 答題目嘅時候，都要留意詞性

💛 內容大意

範文 past paper 有關內容大意嘅部分，通常都問得比較直接。如果你哋有背到書，已經可以輕鬆應對。

所以記得文章嘅脈絡係好重要㗎！好似《廉頗藺相如列傳》有三個小故事，而呢課通常都係問內容情節，所以你哋都要記得每個故事嘅起承轉合。

💛 寫作、修辭手法

四類範文嘅考核重點：

  • 記人：人物描寫手法
  • 詩詞：體裁、抒情手法、語言節奏
  • 遊記：記敘手法、觀察點描寫（步移法 / 時間推移…）、動靜態描寫、抒情手法
  • 議論：中心論點、分論點、論證手法、論據

💛 高階問法

  • 跨篇章比較
    • 呢部分考核唔同文章之間嘅關係，題目通常佔分最高
    • 例如：杜甫喺登樓入面觸景傷情，係咪屬於遷客騷人嘅一種呢？
  • 個人意見
    • 有關範文嘅題目，亦都會問同學對文章嘅睇法

要應對呢兩種題目，你哋可以留意埋文章寫作背景，知道作者喺咩情況下寫呢篇文，就可以令答案更豐富喇！🤓

另外，你哋都可以做多啲坊間練習，好似《透視文言文 (精讀) 》呢本😍，已經幫你整理好每一篇範文嘅考試重點，入面仲有文章比較題做〜 依家上NoteSity 網上書店就有得買喇！✨

 

四、即場發揮

中文閱讀卷嘅時間只有一個半鐘，絕對係分秒必爭🕑 如果你哋已經做好以上準備，即係背熟每篇範文同埋熟讀範文問答，咁你哋已經可以應對大部分嘅題目㗎喇！

至於考試嘅即場發揮，小編有以下建議：

  • 大概花 15-20 分鐘喺範文部分，其餘時間預留畀之後嘅課外篇章
  • 遇上刁鑽嘅問題，千衫唔好過分糾結，可以跳咗嗰題，做完成份卷先返嚟做
  • 細心審題，唔好答非所問
    • 例如 2019 DSE past paper 範文嘅其中一題問：點解西山嘅景色令作者可以從「恆惴慄」嘅心情中釋放出嚟？
    • 題目嘅重點字眼係「為甚麼」，亦即係你哋寫嘅答案要強調因果關係（景色 ➡️ 心境）
    • 但係好多考生只係描述作者嘅心境係點，咁就離題冇分喇😣

 

雖然 DSE 要溫十二篇範文一定會加重咗你哋溫習嘅負擔，但係換個角度睇，呢個絕對係執分嘅好機會！溫範文最緊要兩個字——勤力。

希望你哋鍾意小編今次嘅分享啦，加油！💪🏻💥🔥🔥

 

🔔 唔想錯過最新優惠、DSE 讀書心得、考試資訊的話，記得要 follow NoteSity Instagram 專頁啊！你仲可以 click 呢度 免費訂閱 NoteSity 嘅電子報，小編會定期將 DSE 讀書 TIPS、考試攻略分享俾你～ 

💭 咩係 NoteSity？NoteSity 是全港最大的學生資訊及優惠平台，為大家搜羅全港優惠及學習資訊。由讀書考試、升學、飲食娛樂至電子產品，滿足學生的日常生活所有需要！

📚 訂購高質 DSE 筆記、補充練習與參考書：中文科 | 英文科 | 數學科 | 通識科 | 理科 | 商科 | 文科

 

 

下次再同大家分享更多有用嘅資訊～ 記得密切留意啊🥳